ايكنجى رمزڭ مهمّ بر ذيلى:
ينه كنز العرش دعاسنڭ فيضندن گلن ايكنجى نكتۀ توافقيهدر. بو نكتهدن نمونه ايچون اوچ مثال:
برنجيسى:
سُوَرِ قرآنيهنڭ عددِ حروفاتى اوچ بيڭده توافقاتى پك خارقه و معجزانهدر. مثلا: أڭ قيصه سوره اولان سورۀِ كوثرڭ حروفاتى أبجدى مقامى اوچ بيڭ اولمقله هم سورۀِ يٰسڭ اوچ بيڭ عددِ حروفنه، هم سورۀِ فرقانڭ اوچ بيڭ، هم سورۀِ فاطرڭ اوچ بيڭ، هم سورۀِ والصّافّاتڭ اوچ بيڭ، هم سورۀِ صادڭ اوچ بيڭ، هم رعدڭ اوچ بيڭ، هم الرّومڭ اوچ بيڭ، هم الزّخرفڭ اوچ بيڭ، هم سورۀِ شورىنڭ اوچ بيڭ، هم إبراهيمڭ اوچ بيڭ. بو سورهلرينڭ اوچ بيڭ حروفاتنه توافقى و اون بر سورهنڭ بو اوچ بيڭده بربريله موافقتى و مطابقتى بِالبداهه تصادف ايشى اولاماز. بلكه إعجازِ قرآنڭ بر شعلهسيدر كه، حروفاته سرپيلمسيدر و يالديزلاماسيدر. هم أڭ قيصه سوره اولان سورۀِ كوثرڭ حروفنڭ مقامِ أبجديسى اولان اوچ بيڭ عدديله، أڭ اوزون سوره اولان البقرهنڭ عُرفى يعنى كلام حكمندهكى كلماتنڭ اوچ بيڭ عددينه و آلِ عمرانڭ حقيقى كلماتنڭ اوچ بيڭ عددينه و سورۀِ نساء كلماتنڭ اوچ بيڭ عددينه توافقى ألبته كور تصادفڭ ايشى دگل و راست گله و شعورسز و إتّفاقى بر وضعيت اولاماز. بلكه سرِّ إعجازڭ بر جلوهسنڭ شعاعى ايله بر إنتظامدر. بويله بيوك توافقاتده كوچك كسورات مناسباتِ توافقيهيى بوزماديغندن نظره آلينمادى.
ايكنجى مثال:
سورۀ (اِنَّٓا اَنْزَلْنَاهُ فٖى لَيْلَةِ الْقَدْرِ) ڭ إعجازكار بر توافقندن بحثدر. شويله كه: سورۀِ قدرڭ يوز يگرمى حرفى وار. غيرِ ملفوظ همزه صاييلمازسه يوز اون درت. سُوَرِ قرآنيهيه توافقله إشارت ايدن يوز اون درتدر. ايشته بو عددله (اِنَّا اَنْزَلْنَاهُ كنديله برابر اون سورهنڭ حروفاتنڭ عددلرينه و اون سورهنڭ كلماتنڭ عددلرينه و اون