إشارت و هم او حروفاتده خارق العاده منتظم چوق نكتهلر و سرلرڭ بولونديغنه دلالت، هم حروفِ قرآنيهنڭ هر برى اون عدددن اون بيڭه قدر ثواب ميوهلرى ويرمسنه لياقتنه و قابليتنه شهادت، هم حروفِ قرآنيهنڭ تبديلنه چاليشانلرڭ نهايت درجهده بلاهت و خسارتلرينه قطعى دلالت، هم حروفِ قرآنيه عينًا كلماتى گبى قصدى بر إنتظام و معنيدار بر وضعيته تابع اولديغنه قطعى شهادت ايتديگنى عقلى اولان قبول ايتمگه و قلبنده گوزى اولانلرى گورمگه مجبور ايدر. گورمهين كوردر، قبول ايتمهين قلبسزدر.
﴿قَدْ يُنْكِرُ الْمَرْءُ ضَوْءَ الشَّمْسِ مِنْ رَمَدٍ § وَيُنْكِرُ الْفَمُ طَعْمَ الْمَاءِ مِنْ سَقَمٍ﴾
دستوريله گوزلرندهكى خستهلقلرله بو حقيقت گونشنڭ ضياسنى گورمزلر و ديللرندهكى مرضله آبِ حيات اولان شو طاتلى صويڭ لذّتنى حسّ ايدوب طاتمازلر.
﴿رَبَّنَا لَا تُؤَاخِذْنَٓا اِنْ نَسٖينَٓا اَوْ اَخْطَاْنَا﴾
﴿سُبْحَانَكَ لَا عِلْمَ لَنَٓا اِلَّا مَا عَلَّمْتَنَٓا اِنَّكَ اَنْتَ الْعَلٖيمُ الْحَكٖيمُ﴾
* * *