سورهنڭ آيتلرينڭ عددلرينه توافقى، هر حالده شعورسز حكمتسز تصادفڭ ايشى اولاماز. بلكه معنوى و لفظى بر إعجازِ قرآنينڭ بر شعاعى حروفاته عكس ايدوب تنظيم ايله يالديزلانمش. أوت اِنَّا اَنْزَلْنَاهُ ايله برابر ضُحٰى، اَلَمْ نَشْرَحْ لَكَ، زلزال، تكاثر، الماعون، أڭ أوّل نازل اولان نصفِ أوّلِ علق، و التّين، القارعة و هُمَزة اولان اون سورهنڭ توافقى بوزميان كوچك كسوراتدن قطعِ نظر يوز عددنده توافقلرى اولديغى گبى؛ ينه سورۀِ اِنَّا اَنْزَلْنَاهُ، الفجر، عبس، المرسلات، البروج، المطفّفين، الإنشقاق، النّازعات، النّبأ، المنافقون، جمعه اولان اون سورهنڭ يوز كسور عددِ كلماتنه يوزلكده معنيدار توافق ايتمكله برابر ينه اِنَّا اَنْزَلْنَاهُ حروفاتى سورۀِ إسراء، كهف، طٰهٰ، يوسف، هود، يونس، نحل، أنبياء، مؤمنون، توبه، مائده اولان اون سورهنڭ هر برينڭ يوز كسور عدد آيتلرينه معنيدار توافقلرى و بو سورهلرڭ ده بر توافقِ عجيبه ضمننده بربريله توافقلرى ايچنده بيڭلر توافق بولونديغى حالده؛ هيچ ممكن اولور مى كه، تصادف ايچنه گيرهبيلسين؟ هيچ ممكن ميدر كه، بو إتّفاقڭ اوجلرنده مهمّ نكتهلر، إشارتلر بولونماسين؟
اوچنجى مثال:
سورۀِ إخلاصڭ أبجدى مقامِ حروفىسى بيڭ اوچدر. بويله بيوك يكونلردهكى توافقه ضرر ويرمهين كوچك كسوراتدن قطعِ نظر سورۀِ نور، حجّ، أنفال، نحل، إسراء، كهف، أنبياء، مؤمنون، زُمَر، يونس، يوسف، نمل، شعراء، طٰهٰ اولان اون درت سورهلرڭ هر برينڭ بيڭ كسور كلمات عددلرينه توافقيله برابر؛ حروف جهتنده سورۀِ سبأ، الحاقّه، ممتحنه، سورۀِ إنسان، طُور، سجده، الذّاريات، رحمٰن، تحريم، طلاق، دخان سورهلرينڭ هر برينڭ بيڭ كسور عددِ حروفلرينه معنيدار توافقى ألبته بر ثُلثِ قرآن عدّ ايديلن سورۀِ إخلاصڭ حكمتدار بر نكتهسيدر. و بو توافقڭ بر سرِّ عظيمى وار و شعورسز، حكمتسز تصادفڭ ايشى دگلدر. بلكه شعاعاتِ إعجازيهنڭ إنعكاسيدر.