و خاطره گتيرمهمك گبى دگل؛ بلكه كائنات قدر گنيش بر مرتبۀ حضورى قزانديرديغنى و گنيش و كلّى و دائمى كائنات وسعتنده بر عبوديت دائرهسنى آچديغنى گوردم. حزبِ نورىده (تَفَكُّرُ سَاعَةٍ) الخ. حقيقتى بولونديغنه بڭا قطعى قناعت ويردى.
سعيد النورسى
* * *
﴿بِاسْمِهٖ سُبْحَانَهُ﴾
عزيز قارداشلرم!
بو حزبِ نورينڭ بنم شخصمه عائد پك بيوك بر كرامتِ معنويهسى وار. شيمدى بيان ايتمك زمانى گلدى:
يگرمى اوچ سنه أوّل، أسكى سعيد يڭى سعيده إنقلاب ايتديگى زمان، تفكّر مسلگنده گيتديگى ايچون (تَفَكُّرُ سَاعَةٍ خَيْرٌ مِنْ عِبَادَةِ سَنَةٍ) سرّينى آرادم. هر بر ايكى سنهده او سرّ، يا عربى يا توركجه بر رسالهيى نتيجه ويروب صورت دگيشديرييوردى. عربى قطره رسالهسندن، تا آيت الكبرا رسالهسنه قدر، او حقيقت دوام ايدوب صورتلر دگيشديرهرك، تا حزب الأكبرِ نورى صورتِ دائمهسنه گيردى.
يگرمى سنهدن بريدر كه، نه وقت صيقيلسهم و فكر و قلبه يورغونلق و اوصانج گلسه، بو حزبڭ بر قسمنى متفكّرانه اوقومش ايسهم، او صيقنتىيى و اوصانج و يورغونلغى إزاله ايدييوردى.