ذو الفقارڭ خاتمه‌سى
حِزْبُ الْوِرْدِ الْاَكْبَرِ مِنْ رِسَالَةِ النُّورِيَّه
بر گون جوشن الكبير ايله حزبِ نورى‌يى اوقودم. گوردم كه: جوشن الكبير و رسالۀ نور و حزبِ نورى كائناتى باشدن باشه نورلانديرييور، ظلمات قراڭلقلرينى طاغيتييور.. غفلتلرى و طبيعتلرى پارچه پارچه ايدييور. أهلِ غفلت و أهلِ ضلالتڭ آلتنده صاقلانمق ايستدكلرى پرده‌لرى ييرتييور، كائناتى أنواعيله پاموق گبى حلاّج ايدييور، طراقلر ايله طرييور مشاهده ايتدم. أهلِ ضلالتڭ بوغولديغى أڭ صوڭ و أڭ گنيش كائنات پرده‌لرينڭ آرقه‌سنده، أنوارِ توحيدى گوسترر. و قوزموغرافياجيلر گبى أهلِ فنّڭ أڭ صوڭ و گنيش نقطۀِ إستنادلرى و مدارِ غفلتلرى اولان پرده‌لرده ده نورِ أحديتى گوسترييور. اوراده دخى دشمنلرينى تعقيب ايدييور. أڭ اوزاق تحصّنگاهلرينى بوزويور. هر يرده، حضوره يول گوسترييور. أگر گونشه قاچسه، اوڭا دير: «او بر صوبا، بر لامبادر. اودوننى، غازياغنى ويرن كيمدر؟ بيل، آييل!» دييه باشنه وورور.
هم كائناتى باشدن باشه آيينه‌لر حكمنده تجلّياتِ أسمايه مظهريتلرينى اويله گوسترييور كه، غفلتڭ إمكانى اولمايور. هيچ بر شى، حضوره مانع اولمايور. أهلِ طريقت و حقيقتڭ حضورِ دائمى قزانمق ايچون، كائناتى يا نفى ايتمك ويا اونوتمق