حتّى بِلا إستثنا، هر گيجه صباحه ياقين درت بش ساعت مشغوليتدن گلن اوصانج و يورغونلق، او حزبڭ آلتيسندن بريسنى اوقومقله هيچ بر أثرى قالماديغى بيڭ دفعه تكرّر ايتمش. أوت شيمدى ده دوام ايدييور.
سعيد النورسى
* * *
﴿بِسْمِ اللّٰهِ الرَّحْمٰنِ الرَّحٖيمِ﴾
﴿تَفَكُّرُ سَاعَةٍ خَيْرٌ مِنْ عِبَادَةِ سَنَةٍ﴾
حديثنڭ مظهرى و رسالۀ نورڭ بر برهانِ أنورى و بر وردِ أعظمى و أكبرى و بر مثالِ مصغّرى.. و فكرى بر ذكرِ معظّم و ايمانى بر علمِ محتشم عربى العباره بر رسالهجكدر.
قرآندهكى آية الكبرانڭ عظمتنه و ايكى آية الكبرى و حقيقتنڭ ايكى شاهدِ أكبرى.. و إمامِ على رضى اللّٰه عنهڭ تسميهسيله هر ايكيسى آية الكبرى نامنده اولان (يگرمى طوقوزنجى لمعۀِ عربيه و يدنجى شعاعڭ) إمتزاجندن چيقان أهلِ علمه بر حزبِ أكبر حكمندهدر كه؛ رسالۀِ نورڭ تام عربى بيلن وياخود آية الكبرى و مناجات و يگرمنجى مكتوب رسالهلرى ياننده بولونان و اوقويان شاكردلرينه ايمانى و تفكّرى، آرا صيرا اوقوناجق بر وردِ أعظم اولابيلير.
اون گونده بر دفعه اوقونسه؛ ايمانه بيوك إنكشاف و قوّت ويرر.
سعيد النورسى
* * *