إسپارطهيه گوندريلن بر مكتوب
عزيز، صدّيق قارداشلرم!
نماز تسبيحاتنڭ سرّينه گوره: ناصلكه نمازدن صوڭره تسبيح و ذكر و تهليل ايله ختمۀِ معظّمۀِ محمّديه و ذكر و تسبيح ايدن و روىِ زمين قدر گنيش بر حلقۀِ تحميداتِ أحمديه دائرهسنه تصوّرًا و نيّةً گيرمك مدارِ فيوضات اولديغى گبى؛ بز دخى رسالۀِ نورڭ گنيش دائرۀِ درسنده و حلقۀِ أنوارنده درس آلان و چاليشان بيڭلر معصوم لسانلرڭ، مبارك إختيارلرڭ دعالرينه و أعمالِ صالحهلرينه حصّهدار اولمق و دعالرينه آمين ديمك حكمنده اولارق، اونلرله طىِّ مكان ايدهرك، غيابًا اوموز اوموزه، ديز ديزه بولونمق خياليله و نيّتيله و تصوّريله كنديمزى فوق الحدّ بختيار بيلييورز. خصوصًا آخر عمرمده بويله قيمتدار، معنوى أولادلرى و يوزر عبد الرحمانلرى بولمق، بنم ايچون دنياده جنّت حياتى حكمنه گچييور.
گچن رمضانِ شريفده، خستهلق مناسبتيله، هر بر قارداشم بنم حسابمه بر ساعت چاليشماسنڭ بيوك بر نتيجهسنى عين اليقين و حقّ اليقين گورديگمدن؛ بويله دعالرى ردّ ايديلمز معصوملرڭ و مبارك إختيارلرڭ و استادلرينڭ، بنم حسابمه اولان دعالرى و چاليشمهلرى، بنم رسالۀِ نوره خدمتمڭ اُخروى بر نتيجۀ باقيهسنى دنياده دخى بڭا گوستردى.
اَلْبَاقِى هُوَ الْبَاقِى
قارداشڭز
سعيد النورسى
* * *