إسپارطهيه گوندريلن بر فقرهدر
رسالۀِ نور كندى صادق و ثباتكار شاكردلرينه قزانديرديغى چوق بيوك كار و قزانج و پك چوق قيمتدار نتيجهيه مقابل فيآت اولارق، او شاكردلردن تام و خالص بر صداقت و دائمى صارصيلماز بر ثبات ايستر. أوت رسالۀِ نور اون بش سنهده مدرسهده قزانيلان قوّتلى ايمانِ تحقيقىيى، اون بش هفتهده و بعضلره اون بش گونده قزانديرديغنه، يگرمى بيڭ ذات تجربهلريله شهادت ايدرلر.
هم إشتراكِ أعمالِ اُخرويه دستوريله، هر بر شاكردينڭ، هر بر گونده بيڭلر خالص لسانلريله ايديلن مقبول دعالرى و بيڭلر أهلِ صلاحتڭ ايشلدكلرى أعمالِ صالحهنڭ مِثل ثوابلرينى قزانديروب، هر بر حقيقى، صادق و ثباتكار شاكردلرينى عملجه بيڭلر آدم حكمنه گتيرديگنه دليل؛ كرامتكارانه و تقديركارانه إمامِ علىنڭ اوچ إخبارى و كرامتِ غيبيۀِ غوثِ أعظمدهكى تحسينكارانه و تشويقكارانه بشارتى و قرآنِ معجز البيانڭ قوّتلى إشارتلرى، او خالص شاكردلرڭ أهلِ سعادت و أهلِ جنّت اولاجقلرينى پك قطعى إثبات ايدرلر. ألبته بويله بر قزانج، اويله فيآت ايستر.
مادام حقيقت بودر. رسالۀِ نور دائرهسنڭ ياقيننده بولونان أهلِ علم و أهلِ طريقت و صوفىمشرب ذاتلر، اونڭ جرياننه گيرمك و علم و طريقتدن گلن سرمايهلريله اوڭا قوّت ويرمك و گنيشلمهسنه چاليشمق و شاكردلرينى تشويق ايتمك و بر بوز پارچهسى اولان أنانيتنى، تام بر حوض قزانمق ايچون، او دائرهدهكى آبِ حيات حوضنه آتوب أريتمك گركدر. يوقسه باشقه بر چيغير آچمقله هم او ضرر ايدر، هم بو مستقيم و متين جادّۀِ قرآنيهيه بيلميهرك ضرر ويرر؛ بلكه زندقهيه بيلميهرك بر نوع يارديم حسابنه گچر.
سعيد النورسى
* * *