أنسالِ آتيهده دوام ايدهجك. عينًا بو معصوم كوچك شاكردلر گبى، رسالۀِ نورڭ جاذبهدار دائرهسنه گيرن اُمّى إختيارلرڭ دخى قرق أللى ياشندن صوڭره رسالۀِ نورڭ خاطرى ايچون يازىيه باشلايوب يازدقلرى قرق أللى پارچهيى، ايكى اوچ مجموعه ايچنده درج ايتدك. بو اُمّى إختيارلرڭ و قسمًا چوبان و أفهلرڭ بو زمانده، بو عجيب شرائط ايچنده هر شيئه ترجيحًا رسالۀِ نوره بو صورتله چاليشمهلرى گوسترييور كه: بو زمانده رسالۀِ نوره أكمكدن زياده إحتياج وار كه؛ خرمانجيلر، چيفتجيلر، چوبانلر، يوروك أفهلرى حاجاتِ ضروريهدن زياده رسالۀِ نوره چاليشمهلرى، رسالۀِ نورڭ حقّانيتنى گوسترييورلر. بو جلدده آز، سائر آلتى جلدِ آخَرده معصوملرڭ و إختيار اُمّيلرڭ يازيلرينڭ تصحيحنده چوق زحمت چكدم؛ وقت مساعده ايتمييوردى. خاطريمه گلدى و معنًا دينيلدى كه: صيقيلمه! بونلرڭ يازيلرى چابوق اوقونمديغندن، عجلهجيلرى يواش يواش اوقومغه مجبور ايتديگندن، رسالۀِ نورڭ غدا و طعام حكمندهكى حقيقتلرندن هم عقل، هم قلب، هم روح، هم نفس، هم حسّ، حصّهلرينى آلابيليرلر. يوقسه يالڭز عقل جزئى بر حصّه آلير، اوتهكيلر غداسز قالابيليرلر. رسالۀِ نور، سائر علملر و كتابلر گبى اوقونماملى. چونكه اوندهكى ايمانِ تحقيقى علملرى، باشقه علملره و معرفتلره بڭزهمز. عقلدن باشقه چوق لطائفِ إنسانيهنڭ ده قوت و نورلريدر.
الحاصل: معصوملرڭ و اُمّى إختيارلرڭ نقصان يازيلرنده ايكى فائده وار:
برنجيسى: تأنّى و دقّتله اوقومغه مجبور ايتمكدر.
ايكنجيسى: او معصومانه و خالصانه، صميمى و طاتلى ديللرندن، درسلرندن رسالۀ نورڭ شيرين و درين مسئلهلرينى لذّتلى بر حيرتله ديڭلهمك، درس آلمقدر.
سعيد النورسى
* * *