بديع الزمانڭ ١٩٣٥ سنهسنده إعدام ايديلمك اوزره ويريلديگى آغير جزا محكمهسندهكى مدافعاتندن بر ايكى جمله: «رسالۀِ نور، سونمز، سوندوريلهمز. رسالۀِ نور، سوندوريلمك ايچون اوفلندكجه پارلايان بر نوردر. رسالۀِ نور، طلسمِ كائناتڭ معمّاسنى كشف و حلّ ايدن بر كشّافدر.»
هم حشرِ جسمانى مسئلهسنده، حكمادن ابن سينا گبى مشهور بر داهىنڭ، «حشر نقليدر، ايمان ايدرز؛ عقل بو يولده گيدهمز» ديديگى بر حقيقت، رسالۀِ نورده، هم عمومڭ إستفاده ايدهبيلهجگى أمثالسز بر طرزده، قرآنڭ فيضيله عقلاً إثبات ايديلمشدر.
ضلالتآلود آوروپا فيلسوفلرينڭ و صاپقين طلبهلرينڭ بعض متشابه آياتِ كريمه و أحاديثِ شريفهنڭ ظاهرى معنالرينى آڭلاميهرق ياپدقلرى قصدلى إعتراضلره، رسالۀِ نورده عقلاً، منطقًا جوابلر ويريلهرك، او آيتلرڭ و او حديثلرڭ برر معجزه اولدقلرى إثبات ايديلمشدر. بويلهلكله ده، بو زمانده فن و فلسفهدن گلن ضلالت و شبههلرى رسالۀ نور كوكندن كسمشدر. رسالۀ نور بونى ياپاركن ده مثبت بر اصول تعقيب ايتمشدر.
رسالۀِ نور، فوق العاده مستثنا بر أدبى اوستونلگه مالكدر. أڭ مشهور أثرلرله بيله قابلِ قياس اولميان و باشلى باشنه بر خصوصيتى حائز اولان اُسلوبنده يوكسك بر بلاغت، فصاحت و سلاست و ايجاز واردر. حتّى بديع الزمانڭ أثرلرينى عالمِ إسلامڭ إصرارله آرزو ايتمهسيله عربجهيه ترجمه ايتديرمك ايچون بيوك إسلام عالملرينه «عصاىِ موسى مجموعهسى» گوتورولديگى وقت، اوقومشلر و ديمشلردر كه: «بديع الزمانڭ أثرلرينى آنجق كنديسى ترجمه ايدهبيلير. رسالۀِ نوردهكى يوكسك بلاغتى و مِثلسز اولان فصاحت و ايجازى ترجمهده محافظه ايتمكدن و