ايديلهبيلييور. استاديمز بيورييورلر كه: «بر سنه رسالۀِ نور درسلرينى آڭلايهرق و قبول ايدهرك اوقويان كيمسه، بو زمانڭ مهمّ و حقيقتلى بر عالمى اولابيلير.»
رسالۀِ نور، رسولِ أكرم عليه الصلاة والسلام أفنديمزڭ نورانى مشربنى و صحابۀِ كرامڭ عالى سجيهسنى بيان ايدن بر نور و فيض خزينهسيدر. ايشته بو مذكور وضعيت، بوگونكى دنيايه تاپتازه، نورانى بر حيات و يَپْيڭى بر وجهه ويرهرك شو حقيقتى گوسترييور كه؛ چوقدندر بربرينه معارض ظن ايديلن أهلِ مكتبله أهلِ مدرسهيى و أهلِ تكيهيى، رسالۀِ نور توحيد و تأليف ايدييور. هم ده، معارضه حالنده اولان شرقله غربى باريشديرييور. إتّحادِ إسلامى ميدانه گتيرمك ايچون چاليشان أهلِ إسلامه يگانه چارهنڭ رسالۀِ نور اولديغى، متخصّص ذاتلر طرفندن قبول و تصديق ايديلمكدهدر. هم بوگونكى دنيادهكى إختلافلرى حلّ ايدهجك اولان؛ عقلاً، فكرًا ترقّى ايتمش يگرمنجى عصر إنسانلرينه حق و حقيقتى آڭلاتابيلهجك يَپْيڭى بر علمى كشفياتى و بر تجدّدى آمريقاده، آوروپاده خصوصًا آلمانياده، تحرّى ايدن جريانلر ميدانه گلمش؛ أگر إدراك ايدهبيليرلر و گورهبيليرلرسه، ايشته رسالۀ نور كلّياتى... نتهكيم بو حقيقتڭ إدراك ايديلمگه باشلانديغنى گوسترن أمارهلر، بختيار آلمان ملّتى ايچنده گورولمكدهدر. (حاشيه)
أسكى زمان غرب فيلسوفلرينڭ چوزهمدكلرى و يڭى زمان فيلسوفلرينڭ ده «فلسفه هنوز بونى حلّ ايدهمهمشدر» ديدكلرى دوگوملر، رسالۀِ نورده قرآنڭ فيضيله كشف و حلّ ايديلهرك عقلاً و منطقًا إثبات ايديلمشدر. شرقڭ داهى حكمالرينڭ قرق صحيفهده آڭلاتمغه چاليشدقلرى مشكللر، رسالۀ نورڭ بر صحيفهسنده وجيز بر شكلده إفاده ايديلمشدر.
___
(حاشيه): آوروپاده خرستيانلر ايچنده بر تك قصبهده آلتمش بش عدد صاريقلى گنج نور طلبهسنڭ چيقماسى، بونڭ بر نمونهسيدر.