نورده صوچ بولامييورز» دييه قرار ويرمشدر. اوتوز سنهدن بَرى يوز بيڭلرله نور طلبهلرينڭ بر تك وقوعاتى گورولمهمشدر. بونڭ ايچون، رسالۀِ نورڭ نشرينه مانع اولمغه چاليشانلر، أمنيت و آسايشڭ دشمنى و وطن و ملّت خائنى آنارشيستلرڭ حسابنه بيلهرك ويا بيلميهرك چاليشانلردر. رسالۀِ نوره ايليشن حكومت دگلدر؛ چونكه أمنيت و ضابطه آڭلامش كه، بديع الزمان و نور طلبهلرنده سياسى بر غايه يوقدر. بونلرڭ مشغوليتى، سادهجه ايمان و إسلاميتدر. ايشته او گيزلى دين دشمنلرينڭ تعرّضلرى قارشيسنده نور طلبهلرى رسالۀِ نوردهكى تحقيقى ايمان درسلرينڭ ويرديگى ايمان قوّتيله متين، صلابتلى و مغلوب ايديلمز بر حزب القرآن و فتح ايديلمز بر قلعه حالندهدرلر. دين دشمنلرى طرفندن هجوملر اولدقجه، نور طلبهلرينڭ رسالۀِ نوره و استادلرينه اولان صداقت و ثبات و فعاليتلرى زيادهلشير، پرچينلهشير. بر طلبهسى استاديمزه شويله يازمش:
«أى بنم عزيز قهرمان استادم! معارضلريمز آرتدقجه قوّتمز چوغالييور.. ربِّ رحيممزه حدسز شكرلر اولسون.»
أوت او بر زمانلر كه، قراڭلقلى، ظلماتلى و أشدِّ ظلم و إستبدادِ مطلق دورنده هركس صوصديريلمش؛ فقط تك بر كيمسه صوصمامش و صوصديريلامامش. بو يكتا و نادر كيمسه اولان بديع الزمانڭ طلبهلرى ده مغلوب ايديلهمهمشلردر...
نور طلبهلرى، أوّلا كندى ايمانلرينى قورتارمق، بونڭله برابر دين قارداشلرينڭ ده ايمانلرينى قورتارمق ايچون قرآنِ حكيمڭ يوكسك و پارلاق بر تفسيرى اولان رسالۀِ نورى اوقومشلر و اوقوتمشلردر. ايمانلرينى قورتارمغه چاليشدقلرى و رضاىِ إلٰهى ايچون قرآنه و ايمانه رسالۀِ نورله خدمت ايتدكلرى صيرهده معروض قالدقلرى هجوم و تعرّضلره هيچ أهمّيت ويرميهرك او گيزلى دين دشمنلرينڭ تسلّطلرينى، صالديريشلرينى كنديلرى ايچون ايمان و قرآن حسابنه بر قامچى و بر تشويقجى