مسلمان؛ هم أنبيايى، هم ربّنى، هم بتون كمالاتى محمّدِ عربى عليه الصلاة والسلام واسطهسيله بيلييور. اونڭ تربيهسنى بيراقان و زنجيرندن چيقان داها هيچ بر پيغمبرى (عس) طانيماز و اللّٰهى ده طانيماز. و روحنده كمالاتى محافظه ايدهجك هيچ بر أساساتى بيلهمز. چونكه پيغمبرلرڭ أڭ آخرى و أڭ بيوكلرى و دينى و دعوتى عموم نوعِ بشره باقديغى ايچون و معجزاتجه و دينجه عمومه فائق و بتون نوعِ بشره بتون حقائقده استادلق ايدوب، اون درت عصرده پارلاق بر صورتده إثبات ايدن و نوعِ بشرڭ مدارِ إفتخارى بر ذاتڭ تربيۀِ أساسيهلرينى و اصولِ ديننى ترك ايدن، ألبته هيچ بر جهتده بر نور، بر كمال بولاماز. سقوطِ مطلقه محكومدر.
ايشته أى حياتِ دنيويهنڭ ذوقنه مبتلا و أنديشۀِ إستقبال ايله إستقبالنى و حياتنى تأمين ايچون چابالايان بيچارهلر! دنيانڭ لذّتنى، ذوقنى، سعادتنى، راحتنى ايسترسهڭز؛ مشروع دائرهدهكى كيفه إكتفا ايديڭز. او، كيفڭزه كافيدر. خارجنده و غيرِ مشروع دائرهدهكى بر لذّتڭ ايچنده بيڭ ألم اولديغنى سابق بياناتده ألبته آڭلاديڭز. أگر ماضى، يعنى گچمش زمانڭ حادثاتنى، سينهما ايله حالِ حاضرده گوستردكلرى گبى؛ إستقبالدهكى أحوال دخى، مثلا أللى سنه صوڭرهكى حاللرى بر سينهما ايله گوستريلسه ايدى، أهلِ سفاهت شيمديكى گولدكلرينه يوز بيڭلرجه نفرين و نفرت ايدوب آغلايهجقديلر. دنيا و آخرتده أبدى و دائمى سرورى ايستهين، ايمان دائرهسندهكى تربيۀِ محمّديهيى (عصم) كندينه رهبر ايتمك گركدر.
* * *