رسالۀِ النور حقيقتِ قرآن و معراجِ ايماندر.
رسالۀِ النور سرتاجِ أوليا، سلطان الأثر و زبدة المعانى و عطاياىِ إلٰهى و هداياىِ سبحانيدر.
رسالۀِ النور بر بحرِ حقائق و بر سرِّ دقائق و كنز المعارف و بحر المكارمدر.
رسالۀِ نور خستهلره شفاخانۀِ حكمت و ماءِ زمزم، صاغلره معيشتِ حقيقت و ريحِ ريحان و مسكِ عنبردر.
رسالۀِ نور موعدِ أحمدى (عصم) و مؤيّدِ حيدرى (رض) و تعاونِ غوثى (قس) و توصيۀِ غزالى (قس) و إخبارِ فاروقيدر (قس).
رسالۀِ النور شمسِ قرآنِ معجز البيانڭ ألوانِ سبعهسى، رسالۀِ النورڭ منشورِ حقيقتنده تام تجلّى ايتديگندن، هم بر كتابِ شريعت، هم بر كتابِ دعا، هم بر كتابِ حكمت، هم بر كتابِ عبوديت، هم بر كتابِ أمر و دعوت، هم بر كتابِ ذكر، هم بر كتابِ فكر، هم بر كتابِ لدنّيات، هم بر كتابِ تصوّف، هم بر كتابِ منطق، هم بر كتابِ علم الكلام، هم بر كتابِ علمِ إلٰهيات، هم بر كتابِ تشويقِ صنعت، هم بر كتابِ بلاغت، هم بر كتابِ إثباتِ وحدانيت و معارضلرينه بر كتابِ إلزام و إسكاتدر.
رسالۀِ نور أجزالرى بر سماءِ معنويهنڭ گونشلرى و آيلرى و ييلديزلريدر. ناصلكه ظاهرًا، پردۀِ أسباب اولان گونشدن، قمردن و كواكبدن بتون كائنات تنوّر و تزيّن و بتون أشيا نشو و نما و حيات بولويور. ايشته رسالۀِ نور دخى بو عصرده بتون عالمِ بشريته حياتِ جاودان و آدمه كامل إنسان و قلوبه نشئۀِ ايمان و عقوله يقينِ إطمئنان و أفكاره إنكشاف و نفوسه تسليمِ رضا و جان شعاعلرينى قرآنِ معجز البياندن آلوب صاچمقدهدر.