او سماىِ معنويهيى بعضًا و ظاهرًا بحسب الحكمة آفاقى بر بلوط كتلهسى قاپلار. او جلاللى سمادن اويله بر بارانِ فيض و رحمت تقطّر ايدر كه إستعدادلر؛ تخملر، چكردكلر، حبّهلر گبى او صيقيجى و او طار عالمده گرچه برآز مضطرب اولورلر، فقط تا او صيقيلمقدن اوزرلرندهكى قشرلرى چاتلار و ييرتيلير؛ او آنده بلوطلر ده افقلره چكيلوب نوبتجى وضعيتنده بكلمهسى، بر إمتحانِ ربّانى و بر إنكشافِ فيضانى و بر رحمتِ نورانيدر كه؛ أوّلجه بر حبّه، بر چكردك يڭيدن تازه بر حياته آتيلير، إشتياقله و نشئۀِ إنكشافله ميوهدار قوجه بر آغاج صورتنى آلير و (يُبَدِّلُ اللّٰهُ سَيِّئَاتِهِمْ حَسَنَاتٍ) سرّينه مظهر اولورلر.
أوت يگرمى سنهدر دوام ايدن شو موسمِ شتا، إن شاء اللّٰه تعالى نهايت بولمش اوله... دنيايه يڭى و فيضلى بر فصلِ نَوبهار گله و عالمڭ يوزى نور ايله گوله...
رسالۀِ النور قرآنِ معجز البيانڭ تحتِ تصرّفنده اولديغندن، اوڭا اوزانان و ايليشمك ايستهين هر أل قيريلير و هر ديل قورور.
عموم نور شاكردلرى نامنه
خليل إبراهيم
مدرسة الزهرانڭ أركانلرى نامنه بز ده إشتراك ايدييورز.
عثمان، رشدى، رأفت، خسرو، سعيد، حلمى، محمد، خليل إبراهيم، محمد نورى
* * *