مؤلّفڭ وصيتنامهسى مناسبتيله، خليل إبراهيمڭ رسالۀِ نور حقّنده، نور شاكردلرى نامنه يازديغى بر فقرهسنڭ بر پارچهسيدر.
﴿بِاسْمِهٖ سُبْحَانَهُ﴾
رسالۀِ نور نوردن بر إبريشمدر كه، كائنات و كائناتدهكى موجوداتڭ تسبيحاتلرى اونده ديزيلمشدر.
رسالۀِ النور آخذه و ناقله ايله مجهّز بر راديوئِ قرآنيهدر كه؛ اونڭ تل و لامبالرى و آيينه و بطاريالرى حكمندهكى سطرلرى، كلمهلرى، حرفلرى اويله إنتظامكارانه و اعجازدارانه بسط ايديلمشدر كه؛ يارين هر علم و فن آدملرى و هر مشرب و مسلك صاحبلرى علم و إقتدارلرى مقدارنجه عالمِ غيب و عالمِ شهادتدن و روحانيات عالمندن و كائناتدهكى جريان ايدن هر حادثاتدن خبردار اولابيلير. زيرا رسالۀِ النور، منشورِ قرآندر.
رسالۀِ النور مؤمنلره؛ هداياىِ هدايت، وسيلۀِ سعادت، مظهرِ شفاعت و فيّاضِ رحماندر.
رسالۀِ النور كائناته، نَوبهارڭ فيضنى ويرن بر آبِ حيات و عينِ رحمت و محضِ حقيقت و بر گلزارِ گلستاندر.
رسالۀِ النور لطفِ يزدان، كمالِ ايمان، إشاراتِ قرآن و بركتِ إحساندر.
رسالۀِ النور كافره خسران، منكِره طوقات، ضلالته دشمندر.
رسالۀِ النور بر كنزِ مخفى، بر صندوقچۀِ جواهر و منبعِ أنواردر.