بز رسالۀِ نور شاكردلرى دنيايه چوق أهمّيت ويرمديگمزدن، دنيايه يالڭز رسالۀِ نور ايچون باقديغمزدن، بو ياغمورسزلقده دخى او نقطهدن باقييورز. ايشته دڭزليده محكمهيه ويريلن جزئى بر قسم رسالۀِ نور، صاحبلرينه إعادهسنڭ عين زماننده، بوراده دخى بر قسم ذاتلر يازمغه باشلامالرى عين وقتده، بو ياغمورسزلقده بر درجه رحمت ياغدى، فقط رسالۀِ نورڭ سربستيتى جزئى اولماسندن، رحمت دخى جزئى قالدى. إن شاء اللّٰه ياقينده بنم ده رسالهلرم إعاده ايديلهجك، تام سربست و إنتشارى كلّيلشهجك و رحمت دخى تام اولاجق. (حاشيه)
* * *
﴿بِاسْمِهٖ سُبْحَانَهُ﴾
﴿اَلسَّلَامُ عَلَيْكُمْ بِعَدَدِ قَطَرَاتِ الْمَطَرِ فٖى لَيْلَةِ الرَّغَائِبِ﴾
عزيز قارداشلرم!
سزه ايكى پوصلهيى ليلۀِ رغائبدن آلتى ساعت أوّل يازدم. «حزبِ نوريه» و خسروڭ كاغدى ايله تسليمدن صوڭره، قطعيًا بنم قناعتمده بر نوع معجزۀِ أحمديه اولارق، ايكى آيدن بَرى متماديًا قوراقلق و ياغمورسزلق و هر طرفده دائما نمازلردن صوڭره پك چوق دعالرڭ عقيم قالديغى و هركس مأيوسيتندن دردِ معيشت أنديشهسيله قلبًا آغلاركن، بردن ليلۀِ رغائب (بتون عمرمده هيچ ايشيتمديگم و باشقهلرى ده ايشيتمديگى) اوچ ساعتده يوز دفعه، بلكه فضله تكرارله مَلكِ
___
(حاشيه): هم عينًا اويله اولدى، بز گوردك.