رعدڭ بو يوكسك و شدّتلى تسبيحاتيله اويله بر رحمت ياغدى كه؛ أڭ معنّده دخى ليلۀِ رغائبڭ قدسيتنى و حضرتِ رسالتڭ بر درجه، بر جهتده عالمِ شهادته تشريفنڭ عموم كائناتجه و بتون عصرلرده نظرِ أهمّيتده و رحمةً للعالمين اولديغنى إثبات ايتدى و كائنات او گيجهيى آلقيشلايور دييه گوستردى. عجبا، دعالريمزده إسپارطه بو مملكتله برابردى، بو ياغمورده حصّهسى وار مى، مراق ايدييورم. شيمدىيه قدر چوق أمارهلرله رسالۀِ نور بر وسيلۀِ رحمت اولماسندن، بو رحمت ايما ايدر كه، هر حالده بر فتوحاتى پرده آلتنده واردر و بلكه سربستيتنه بر إشارتدر. (حاشيه-١) هم بوراده «لمعهلر»ڭ ويردكلرى إشتياق جهتيله يازيجيلرڭ چوغالمهسى، إن شاء اللّٰه بر نوع مقبول دعا حكمنه گچدى.
رسالۀِ نور طلبهلرى نامنه
أوت أوت
محمد جيلان
دعاڭزه محتاج قارداشڭز
سعيد النورسى
* * *
___
(حاشيه): صوڭره تحقّق ايتدى كه؛ عين زمانده هم فتوحاتى هم سربستيتى پرده آلتنده تحقّق ايتمش.