و بزمله علاقهدار هم دڭزليده، هم حپسنده عمومنه و خصوصنه و تام عدالتنى گورديگمز محكمه هيئتنه چوق سلام و دعالر ايدرز.
سعيد النورسى
* * *
﴿بِاسْمِهٖ سُبْحَانَهُ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
بشنجى نقطه: رسالۀِ نور، بو آناطولى مملكتنه بلالرڭ دفعنه أهمّيتلى بر وسيلهدر. صدقه ناصل بلايى دفع ايدييور، اونڭ إنتشارى و اوقونماسى كلّى بر صدقه نوعنده سماوى و أرضى بلالرڭ دفعنه وسيله اولديغى چوق أمارهلر و چوق حادثهلرله تبيّن ايتمش. حتّى قرآنڭ إشارتيله تحقّق ايتمش. و يازماسنى و إنتشارينى منع ايتمك زمانلرنده درت دفعه زلزلهلرڭ باشلاماسى و إنتشاريله طورمالرى و آناطوليده أكثر يرلرده اوقونماسى، حربِ عمومينڭ آناطولىيه گيرمهمسنه بر وسيله اولديغى سورۀِ (وَالْعَصْرِ) إشارت ايتديگى حالده، بو ايكى آى قوراقلق زماننده محكمهنڭ رسالۀِ نورڭ برائتنه و وطنه منفعتلى اولديغنه دائر قرارينى محكمۀِ تمييز تصديق ايدهرك تام بر سربستيتله رسالۀِ نورڭ إنتشارى و اوقونماسنى بكلركن، بتون بتون عكسنه اولارق منع ايديلمسى و محكمهدهكى رسالهلرى صاحبلرينه إعاده ايديلديگى حالده، بزى ده او جهتجه قونوشمقدن منع ايتمهلرى جهتيله، بلالرڭ دفعنه وسيله اولان بو كلّى صدقۀِ معنويه بلايه قارشى چيقامدى، گناهمز نتيجهسى قوراقلق باشلادى.