رسالۀِ نور أجزالرينى محكمهدن آلوب، بڭا گتيروب تسليم ايدن حافظ مصطفىيه خطابدر.
﴿بِاسْمِهٖ سُبْحَانَهُ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ بِعَدَدِ حُرُوفَاتِ رَسَائِلِ النُّورِ﴾
سن بيڭلر صفالرله گلدڭ، بنى أبدى منّتدار ايتدڭ. و صادق آرقداشلرڭ ايله رسالۀِ نورڭ سربستيتنه خدمتڭز او درجه بيوك و قيمتداردر، دگل يالڭز بزى و رسالۀِ نور شاكردلرينى، بلكه بو مملكتى، بلكه عالمِ إسلامى معنًا منّتدار ايتديڭز كه؛ أهلِ ايمانڭ إمدادينه يتيشمگه رسالۀِ نورڭ يولنى سربستجه آچديڭز. بن، بر سنهدن بَرى سنى و سنڭله برابر رسالۀِ نورڭ بو سربستيتنه چاليشانلرى، حافظ على و خسرو گبى رسالۀِ نورڭ قهرمانلريله برابر معنوى قزانجلريمه و دعالريمه شريك ايتمشم؛ هم دوام ايدهجك. بورايه قدر يولدهكى هر بر دقيقه، بر گون خدمتده بولونمق گبى بنى منّتدار أيلهدڭ.
حاكمِ عادل نامنى آلان معلوم ذاتى و لهمزده اونڭله برابر چاليشانلرى، بو حقيقى عدالته خدمتلرى ايچون آخر عمريمه قدر اونوتميهجغم. آلتى يدى آيدر اونلرى ده عينًا معنوى قزانجلريمه شريك ايدييورم. بڭا تسليم ايتدكلرى رسالهلرڭ بر قسمنى، قارداشلريمه جواب ويرهجگم، بتوننى يازسينلر، اونلره هديه ايدهجگم. چونكه اونلر، رسالۀِ نورڭ بوندن صوڭرهكى خدمتنه تام حصّهداردرلر. بو مسئلهده بن دڭزلى شهرينى كندى قريهمه آرقداش ايدوب بتون أمواتنى و أهلِ ايمانڭ حياتده اولانلرينى هم كندم، هم رسالۀِ نورڭ طلبهلرى، معنوى قزانجلريمزه حصّهدار ايتمگه قرار ويردك. دڭزلى حپسخانهسنى ده، بر إمتحان مدرسهمز تلقّى ايدييورز.