أصليه جزا محكمهسى يوكسك مقامنه
اورفه
محترم حاكملر!
مساعدهڭزله بر ايكى معروضاتمى مجبورًا سويلهيهجگم:
شيمدى بو وطنڭ هر طرفنده و عالمِ إسلامڭ حتّى ديگر أجنبى مملكتلرينڭ مهمّ مركزلرنده قرآن نامنه إنتشار ايتمش و ميليونلرله كيمسهلرڭ ايمانلرينى تقليددن تحقيقه چويرمش و بو ملّته أڭ قيمتلى و بيوك تأثيرينى فيضلى درسلريله إثبات ايتمش، قرآنڭ نورى رسالۀِ نورڭ نشر ايتمهمسى و بزم گبى حياتى تهلكهده، ايمانسزلق و ضلالت واديلرنده قوشان بيچارهلرڭ اوقومامسى ايچون دينمزڭ گيزلى دشمنلرى اولان قومونيست ويا طبيعيّون اولان فارماصونلر درلو دسيسهلرله عدليهلرى و حكومتلرى شاشيرتمق ايچون چوق چاليشديلر. قاچ دفعه نورلرى اوقويان مبارك طلبهلرى و باشده داهى بر متفكّر و قهرمانِ إسلام اولان بديع الزمان سعيد نورسىيى محكمهلره ويرديرديلر. أسكيشهر، إسپارطه، دڭزلى، آنقره، آفيون، إستانبول آغير جزا محكمهلرى… نتيجهده گيزلى درس، طريقتجيلق، جمعيت قورمق گبى إتهاملرڭ تمامًا خلافِ حقيقت اولديغى إثبات ايديلهرك برائتلر ويريلدى.
محكمهلرجه تبيّن ايتدى كه: رسالۀِ نور سراپا إسلاميت، قرآن، ايمان حقيقتلرندن عبارتدر و نور طلبهلرى قرآنه قوپماز رابطهلرله باغلانمشلردر. دينى هيچ بر شخصى، دنيوى، سفلى منفعتلره آلَت ايتمدكلرى و سادهجه رضاىِ إلٰهى ايچون چاليشدقلرى گونش گبى تظاهر ايتدى. چونكه رسالۀِ نور بيڭ سنهدن بَرى إسلاميت عليهنه و إنسانيت ضررينه تخريباتجى، كلّ جريانلره قارشى صارصيلماز دليل و حجّتلرله تام مقابله ايدوب دين دشمنلرينڭ تمللرينى طاغيتييور.
ايشته بز ده بزم أبدى حياتمزى و أبدى سعادتمزڭ آناختارى ايمانمزى بو ضلالت عصرنده بزه قزانديران رسالۀِ نورى اوقوركن و يازدقلريمزى تصحيح ايدركن صانكه دينسز، قومونيستلرڭ صاچمه و دوزمهجه زهر صاچان أوراقلرينى اوقويورمشز گبى ياقالانوب محكمهيه ويريلييورز.
معصوم ديندارلرڭ عليهنده اولان دينسز قومونيستلر هم أطرافه أوهام ويرهرك بزم گبى غربتده، يالڭز درسلريله علاقهدار، سياستدن حتّى دنيادن خبرسز ايكى اوچ طلبهنڭ بر قاچ كيشى ياننه گلوب گيتمهسيله و اونلرڭ كندى درسلرينى بر ايكى كيشينڭ ديڭلهمسيله هم بزى هم عدليهيى هم ضابطهيى معناسز مشغلهلرله اوغراشديرييورلر. هر عصرده أڭ آز اوچ يوز أللى ميليون منسوبى بولونان، ميليونلرله حافظلرڭ لساننده هر زمان تكرارلانان قرآنمزڭ أمثالسز تفسيرى رسالۀِ نور طلبهلرى اولان بزلرى، حياتمزدن داها چوق سَوْديگمز ايمانى درسلريمزدن محروم ايتمك ايستهيورلر. حبّهيى قبّه ياپارق، فورماليتهلره اويديرهرهق، بر إسم طاقهرق، لاستيكلى بر قانون مادّهسنه راست گتيروب بزى قانونًا مسئول گوسترمك ايستهيورلر. فقط عادل، وجدانلى حاكملر نتيجهده حقيقتى ميدانه چيقارييورلر.
أزجمله: بو صوڭ دفعه آفيون محكمهسى درت سنه دوام ايتديگى حالده، صوڭنده ذاتًا سربست اولان رسالۀِ نور ينه سربست بيراقيلدى.
بتون يوكسك مقاملره ويريلن استاديمز بديع الزمان سعيد نورسىنڭ مدافعهسندن بر كوچك پارچهسى شو كه:
حشردهكى محكمۀِ كبرايه بر عرضحالدر و درگاهِ إلٰهيهيه بر شكوادر و بو زمانده محكمۀِ تمييز و إستقبالدهكى دار الفنونلرڭ منوّر معلّم و طلبهلرى دخى ديڭلهسينلر…
… بن ده اوتوز قرق سنه حياتمى بيلنلرى و نورڭ بيڭلر خاص شاكردلرينى إشهاد ايدهرك ديرم: إستانبولى إشغال ايدن إنگليزڭ باش قوماندانى إسلام ايچنده إختلاف آتوب حتّى شيخ الإسلامى و بر قسم خواجهلرى قانديروب بربرى عليهنه سَوق ايدهرك إئتلافجى، إتّحادجى فرقهلرى بربرينه اوغراشديرماسيله و يونانڭ غلبهسنه و حركاتِ ملّيهنڭ مغلوبيتنه زمين حاضرلاديغى بر صيرهده، إنگليز و يونان عليهنده «خطواتِ ستّه» أثريمى أشرف أديبڭ غيرتيله طبع و نشر ايتمكله او قوماندانڭ دهشتلى پلاننى قيران و اونڭ إعدام تهديدينه قارشى گرى چكيلمهين و آنقره رئيسلرى او خدمتى ايچون اونى چاغيردقلرى حالده آنقرهيه قاچميان و أسارتده روسڭ باش قومانداننڭ إعدام قرارينه أهمّيت ويرمهين و ٣١ مارت حادثهسنده سكز طابورى بر نطقله إطاعته گتيرن و ديوانِ حربِ عُرفيده، محكمهدهكى پاشالرڭ؛ سن مرتجعسڭ، شريعت ايستهمشسڭ دييه سؤاللرينه قارشى إعدامه بش پاره أهمّيت ويرمهيوب «أگر مشروطيت بر فرقهنڭ إستبدادندن عبارت ايسه بتون جنّ و إنس شاهد اولسون كه بن مرتجعم و شريعتڭ بر تك مسئلهسنه روحمى فدا ايتمگه حاضرم.» ديين و او بيوك ضابطلرى حيرتله تقديره سَوق ايدوب إعدامنى بكلركن برائتنه قرار ويردكلرى و تخليه اولوب دونركن و اونلره تشكّر ايتميهرك «ظالملر ايچون ياشاسين جهنّم!» دييه يولده باغيران و آنقرهده ديوانِ رياستده م. كمال اوڭا حدّتله ديدى: «بز سنى بورايه چاغيردق كه بزه يوكسك فكرلرى بيان ايدهسڭ، سن گلدڭ نمازه دائر شيلرى يازدڭ، ايچمزه إختلاف ويردڭ.» اوڭا قارشى «ايماندن صوڭره أڭ يوكسك نمازدر. نماز قيلميان خائندر… خائنڭ حكمى مردوددر…» دييه قرق أللى مبعوثڭ حضورنده سويلهين و او دهشتلى قوماندان اوڭا بر نوع ترضيه ويروب حدّتنى گرى آلان و آلتى ولايت ضابطهسى و حكومتى آسايشڭ إخلالنه دائر بر تك مادّه قيد ايتمهين و يوز بيڭلرله نور شاكردلرينڭ هيچ بر وقوعاتى گورونمهين، هيچ بر شاكردنده بر جنايت ايشيديلمهين و هانگى حپسه گيرمش ايسه محبوسلرى إصلاح ايدن و يوز بيڭلر نسخه رسالۀِ نوردن إنتشار ايتمكله برابر منفعتدن باشقه هيچ بر ضررى اولمادقلرينى يگرمى اوچ سنه حياتنڭ اوچ حكومت و محكمهلرڭ برائتلر ويرمهلرينڭ و نورڭ قيمتنى بيلن يوز بيڭ شاكردلرينڭ قَولاً و فعلاً تصديقلرينڭ شهادتيله إثبات ايدن و منزوى، مجرّد، غريب، إختيار، فقير، كندينى قبر قپوسنده گورن و بتون قوّت و قناعتيله فانى شيلرى بيراقوب أسكى قصوراتنه بر كفّارت و حياتِ باقيهسنه بر مدار آرايان و دنيانڭ رتبهلرينه هيچ أهمّيت ويرمهين و شدّتِ شفقتندن معصوملره، إختيارلره ضرر گلمهمك ايچون كندينه ظلم و تعذيب ايدنلره بددعا ايتمهين بر آدم حقّنده «بو إختيار منزوى آسايشى بوزار، أمنيتى إخلال ايدر و مقصدى دنيا أنتريقهلريدر، اويله ايسه صوچليدر.» ديينلر و اونى پك آغير شرائط آلتنده محكوم ايدنلر، يردن گوگه قدر صوچليدرلر. محكمۀِ كبراده حسابنى ويرهجكلر.»
محترم حاكملر!
بويله بر إسلام قهرمانى و بو عصرڭ و إستقبالمزڭ بر هدايت سردارى و أشنه راستلانميان إسلاميت فدائيسى بديع الزمانڭ أثرلرينى اوقومق؛ دينسزلرڭ، قومونيستلرڭ، ايماندن بىخبرلرڭ ألبته ايشنه گلمز.
استاديمز بديع الزمانڭ بيانى كه:
رسالۀِ نور قوجه بر جنّتڭ فيآتى اولاجق بر ثروت و حياتِ أبديهيى قزانديرهجق بر آبِ حيات و حقيقته معارض بتون فيلسوفلرى إلزام ايدوب حيرتده بيراقهجق بر كشفياتدر. رسالۀِ نور صحابۀِ كرامڭ آلى سجيهسنى و حضرتِ پيغمبر (عصم) نورانى مشربنى بيان ايدن بر نور و فيض خزينهسيدر. رسالۀِ نور بو عصرده قرآنِ حكيمڭ بر معجزۀِ معنويهسى؛ حقيقى، يوكسك و پارلاق بر تفسيريدر. رسالۀِ نور شو زمانڭ يارهلرينه أڭ مناسب بر علاج، بر مرهم و ظلماتڭ تهاجمنه معروض هيئتِ إسلاميهيه أڭ نافع بر نور و ضلالت واديلرنده حيرته دوشنلر ايچون أڭ طوغرى بر رهبر اولديغنى يوز بيڭلرله كيمسهلر طرفندن إدراك و تصديق ايديلن بر أثر كلّياتيدر. رسالۀِ نور، وراثتِ نبوّت يوليله طوغريدن طوغرىيه حقيقة الحقائقه يول آچمش جادّۀِ كبراءِ قرآنيهدر. بونڭ ايچوندر كه آوروپانڭ فلسفى ضلالتلرينه غلبه ايدييور و جرح ايديلمز عقلى، منطقى، علمى حجّتلرله، دنيايى صاران قومونيزمى و ماصونلغى كوكندن ييقييور. رسالۀِ نور، عوامدن أڭ عالم و أڭ منوّره قدر هر صنفڭ كندى إستعدادى نسبتنده إستفاده ايدهبيلهجگى بر أثر كلّياتيدر.
ايشته بو حقيقتلر ايچوندر كه نورلرى اوقويان و يازان نورجيلر، دنيانڭ هر طرفنده گيتدكجه چوغالمقدهدر.
محترم حاكملر!
آرقداشمله تصحيحات ياپاركن ياقالانوب مصادره ايديلن، دڭزليده برائت ايدن و تمييزڭ ده تصديق ايتديگى بيوك متفكّر بديع الزمان سعيد نورسىنڭ آيت الكبرا رسالهسنڭ بر يرنده، كائنات خالقنى و صاحبنى آرايان دنيا سيّاحى شويله سويلهيور:
«بو دنياده حياتڭ غايهسى و حياتڭ حياتى ايمان اولديغنى بيلن و يورولماز و طوق اولماز يولجى كندى قلبنه ديدى كه: آراديغمز ذاتڭ سوزى و كلامى دينيلن، بو دنياده أڭ مشهور و أڭ پارلاق و أڭ حاكم و اوڭا تسليم اولميان هركسه هر عصرده ميدان اوقويان قرآنِ معجز البيان نامندهكى كتابه مراجعت ايدوب او نه دييور بيلهلم. فقط أڭ أوّل بو كتاب، بزم خالقمزڭ كتابى اولديغنى إثبات ايتمك لازمدر دييه تحرّىيه باشلادى. بو سيّاح بو زمانده بولونديغى مناسبتيله، أڭ أوّل معنوى إعجازِ قرآنيهنڭ لمعهلرى اولان رسالۀِ نوره باقدى و اونڭ يوز اوتوز رسالهلرى آياتِ فرقانيهنڭ نكتهلرى و ايشيقلرى و أساسلى تفسيرلرى گوردى و رسالة النور بو قدر معنّد و ملحد بر عصرده هر طرفده حقائقِ قرآنيهيى مجاهدانه نشر ايتديگى حالده قارشيسنه كيمسه چيقامديغندن إثبات ايدر كه اونڭ استادى و منبعى اولان قرآن سماويدر، بشر كلامى دگلدر. حتّى رسائل النورڭ يوزر حجّتلرندن بر تك حجّتِ قرآنيه اولان يگرمى بشنجى سوز و اون طوقوزنجى مكتوبڭ آخرى قرآنڭ قرق وجهله معجزه اولديغنى اويله إثبات ايتمش كه كيم گورمش ايسه دگل تنقيد و إعتراض بلكه إثباتلرينه حيران اولمش، تقدير ايدهرك چوق ثنا ايتمش.»
ايشته محترم هيئتِ حاكمه! مادام حقيقت بودر. بن ده استادم گبى ديرم: «مادام قبر قپوسى قپانمييور و مادام گوزينى قپايان يالڭز كندينه گوندوزى گيجه ياپار. و مادام جنّت اوجوز دگل، جهنّم دخى لزومسز دگلدر.»
بز طلبهلر رسالۀِ نورڭ گونش گبى حقيقتلرينه قارشى گوزيمزى قپايهمييورز…
حقيقتِ قرآنيه گونشى ايسه اوفلهمكله سونمز. نورلانانلر ده نور يولندن هيچ بر بشرى قوّتله دونمز. گيزلى دين دشمنلريمز ضابطهيى، حكومتى، عدليهيى إغفال ايتمگه چاليشانلر دنيامزى باشمزه آتش ياپسهلر نورلرى اوقويهجغز و يازاجغز. إن شاء اللّٰه عدالت نامنه حركت ايدنلرى، او مفسدلر آلداتهميهجقلردر. ديگر محكمهلرده حق نامنه عدالت ايچون چاليشانلرڭ قرآنڭ لمعاتى و ترشّحاتى اولان و بشرى غفلت سرسملگندن ايقاظ ايدن رسالۀِ نورى سربست بيراقمالرى گوسترييور كه ذكر ايتديگم گبى بو عصرڭ قرآن دلاّلى اولان رسالۀِ نوره هركسڭ چوق بيوك إحتياجى واردر. و رسالۀِ نور شخصى، سفلى، دنيوى منفعتلره آلَت اولامييور. بزم گبى معصوم ديندارلره مسلّط اولانلر و اونلرى ايمانى درسلرندن آييرمايى توهّم ايدنلر، لائكلك پرنسبنى دينسزلگه و قومونيزمه آلَت ايتمك ايستهينلردر.
عصريمزڭ داهىسى بيوك متفكّر بديع الزمان سعيد نورسىنڭ بيانى وجهله: أكثرِ أنبيانڭ شرقده و آسياده ظهورلرى و أغلبِ حكمانڭ غربده و آوروپاده گلمهلرى قدرِ أزلينڭ بر إشارتيدر كه آسياده دين حاكمدر، فلسفه ايكنجى درجهدهدر. بو رمزِ قدره بناءً آسياده حكم سورن، ديندار اولماسه ده دين لهنه چاليشانلره ايليشمهملى و تشويق ايتملى.
قرآنِ حكيم، بو زمين قفاسنڭ عقلى و قوّۀِ متفكّرهسيدر. اَلْعِيَاذُ بِاللّٰه، قرآن كُرۀِ أرضڭ باشندن چيقسه أرض ديوانه اولاجق؛ عقلدن بوش قالان قفاسنى بر سيّارهيه چارپمق، بر قيامت قوپماسنه سبب اولمق عقلدن اوزاق دگلدر. أوت قرآن، فرشى عرشله و عرشى فرشله باغلامش بر زنجيردر، بر حبل اللّٰهدر. جاذبۀِ عموميهدن زياده زمينى محافظه ايدييور. ايشته بو قرآنِ عظيم الشانڭ حقيقى و قوّتلى بر تفسيرى اولان رسالۀِ نور بو عصرده، بو وطنده، بو ملّته يگرمى سكز سنهدن بَرى تأثيرينى گوسترمش بيوك بر نعمتِ إلٰهيه و سونمز بر معجزۀِ قرآنيهدر. حكومت اوڭا ايليشمك و طلبهلرينى اوركودوب اوندن واز گچيرمك دگل، حمايه ايتمك و اوقوماسنه تشويق ايتمك گركدر.
ايشته بتون بو جرح ايديلمز حقيقتلردن صوڭره، ينه أوت رسالۀِ نورله مشغوليته دنياده هيچ بر عادل محكمه صوچ دييهمز. فقط سزه بر آد طاقوب بر بهانه ايله إشكنجه ياپمق ايستهيورلر، دينيلسه: بن ده ديرم:
﴿حَسْبُنَا اللّٰهُ وَنِعْمَ الْوَكٖيلُ ۞ نِعْمَ الْمَوْلٰى وَنِعْمَ النَّصٖيرُ﴾
١٧.٢.١٩٥٣
اورفه، يوسف پاشا محلّهسى
قاضى اوغلى جامعى موقعنده مقيم
عبد اللّٰه يگڭ
* * *
أصليه جزا محكمهسى يوكسك مقامنه
اورفه
محترم هيئتِ حاكمه!
بزلره ياپيلان گيزلى مكتب ظن ويا إتهامى بتون بتون حقيقت خلافنهدر. چونكه بولونديغمز جامع اوڭنده چشمهلر وار، بورايه و جامعه گونده ايكى يوز كيشينڭ گلمهسى، بويله بر يرڭ گيزلى اولاميهجغى، چوجقلرڭ دخى بيلهجگى بر حقيقتدر. هم بزم شهرڭ أڭ ايشلك بر يرنده قالمامز گوسترييور كه گيزليلكله و گيزلى شيلرله علاقهمز يوقدر.
مكتب آچمشسڭز سوزى ده بوسبتون ياڭليش بر شايعهدر. بونى ايشيدنلر گولويورلر. بز قرآنِ كريمڭ غايت پارلاق و يوكسك تفسيرى رسالۀِ نوره چاليشان طلبهلرز. أوت، أصلا إنكار ايتمهيز. بز اوقوركن گلوب ديڭلهينلر اولويور، بو بر مكتب ميدر؟ شاهدلرڭ گوروشلرى طوغريدر فقط حكملرى ياڭليشدر، حقيقت خلافنهدر.
بز او گون آرقداشمله كندى أليمزله يازديغمز ايكى عدد آيت الكبرا رسالهسنى تصحيح ايتمك ايچون برابر اوقويوردق و او ايكى آرقداش ده ديڭلهيوردى. بو وضعيتده، صانكه قومونيستلرڭ و دينسزلرڭ أثرلرينى اوقويورمشز گبى هم عدليهيى هم ضابطهيى هم محكمهيى بزمله مشغول ايدهرك بر بهانه ايله محكمهلره سَوق ايتديرييورلر.
هم سزلرڭ ده بيلديگڭز گبى اورفهنڭ أكثرى أولرنده دينى بر كتابى، برى اوقويوب ديگرلرى دقّتله ديڭلهيورلر. هم بر يرده، ياساق اولميان بر أثرى اوقويوب باشقهلرينڭ ديڭلهمسيله بر مكتب مى آچيلمش اولور؟ سادهجه كتاب اوقومق و ديڭلهمكدن عبارتدر.
بو وضعيتدن آڭلاشيلييور كه بز يالڭز بو عصرده قرآنڭ يوكسك و پارلاق بر تفسيرى و كائناتده أڭ يوكسك اولان ايمان حقيقتلرينى بيان ايدن رسالۀِ نورى اوقويورز. ايمانى و إسلامى كتابلرى اوقويوب ديڭلهمگه تدريسات سوسى ويرمك، قوّتلى بر إجبارله اوزريمزه مكتب آچمشسڭز أتيكتنى ياپيشديرمغه غيرت ايتمك اولديغنى؛ بزم معصوم، ديندار، ايمان و آخرتيله مشغول اولان گنجلر اولديغمزى هركسڭ بيلديگى گبى سزجه ده معلومدر.
هم داهى متفكّر استاديمز بديع الزمان اوتوز سنهدن بَرى سياستى ترك ايتمش (اَعُوذُ بِاللّٰهِ مِنَ الشَّيْطَانِ وَالسِّيَاسَةِ) ديمش و طلبهلرينه ده «بز ايمانڭ جريانندهيز، غايهمز رضاىِ إلٰهيهدر، سياسى جريانلره گيرمهيڭز.» دييه درس ويرديگندن هيچ بر سياسى و دنيوى سفلى شيلرله علاقهمز يوقدر. هم آلتى ولايتڭ ضابطهسى، استاديمز بديع الزمان سعيد نورسى حقّنده: «بديع الزمان و رسالۀِ نور طلبهلرى ايمانله قفالره بر ياساقجى بيراقوب أمنيت و آسايشى محافظه ايدييورلر.» دييه راپور ويرمشلر.
محترم حاكملر!
بزم بتون اوقويوب يازديغمز و دائما مشغول اولاجغمز رسالۀِ نور، بتون محكمهلرده برائت ايتمش و صِرف إسلاميت و ايمان و قرآن حقيقتلرندن عبارت اولديغى گونش گبى تظاهر ايدهرك قضيۀِ محكمه حالنه گلمشدر. صوڭ آفيون محكمهسنده بتون كتاب، رساله و مكتوبلرى إعاده ايتمگه إتّفاقًا قرار ويرمشلردر.
رسالۀِ نور: يوز اوتوز پارچه خارق العاده رسالهلردن متشكّل بر شاه أثر كلّياتى و يگرمنجى عصرڭ فنونِ مثبتهسيله علومِ ايمانيه و حقائقِ قرآنيهيى مزج و تأليف ايدهرك، بو عصره قدر هيچ بر أثرده گورولمديگى أهلِ علم و حقيقتجه، فيلوزوف و پروفسورلرجه مصدّق اولان أمثالسز بر خصوصيته مالك أثرلرينڭ نشرياتى؛ آناطولى، عربستان، مصر، پاكستان، آوروپا و آمريقايه قدر إنكشاف ايتمش. مؤلّفى بيوك إسلام داهىسى بديع الزمان سعيد نورسى رسالۀِ نور حقّنده شويله دييور:
«رسالۀِ نور، معنوى حقيقتلرى و ايمان علمنى آوروپانڭ فن علملريله مزج ايدهرك غايت قوّتلى برهان و حجّتلرله عقلاً و منطقًا إثبات ايدر. رسالۀِ نور، حال و إستقبالڭ علمى، ايمانى، عقلى و فكرى إحتياجلرينه تام جواب ويرر بر قوّت و ماهيت و خصوصيتدهدر. رسالۀِ نورده باشقه أثرلردن نقل يوقدر، قرآنڭ معجزۀِ معنويهسيدر. رسالۀِ نور، يوز معنوى كشفياتى حاوى و طلسمِ كائناتڭ معمّاسنى كشف و حلّ ايدن بر كشّافدر. رسالۀِ نور، يالڭز بو وطن و بو ملّت ايچون دگل، عالمِ إسلام و بشريت ايچون يازيلمشدر. رسالۀِ نور، شو زمانڭ يارهلرينه أڭ مناسب بر علاج، بر مرهم و ظلماتڭ تهاجمنه معروض هيئتِ إسلاميهيه أڭ نافع بر نور و ضلالت واديلرنده حيرته دوشنلر ايچون أڭ طوغرى بر رهبر اولديغى يوز بيڭلرله كيمسهلر طرفندن تصديق ايديلن بر أثر كلّياتيدر.»
محترم هيئتِ حاكمه!
رسالۀِ نورڭ غايت خارقه بر جزئى اولان آيت الكبرا رسالهسنڭ بيانى وجهيله: مادام بيڭ سنهدن بَرى ايمان و قرآن عليهنده تراكم ايدن آوروپا فيلسوفلرينڭ إعتراضلرى و شبههلرى يول بولوب أهلِ ايمانه هجوم ايدييور. بر سعادتِ أبديهنڭ، بر حياتِ باقيهنڭ و بر جنّتِ دائمهنڭ آناختارى، مدارى، أساسى اولان ايمانى صارصمق ايستهيورلر. ألبته هر شيدن أوّل ايمانمزى تقليددن تحقيقه چويروب قوّتلنديرملىيز.
رسالۀِ نورله مبارزه ايديلمز، او مغلوب اولماز، يگرمى سنهدر أڭ معنّد فيلسوفلرى ده صوصديرييور. (شيمدى يگرمى سكز سنه اولدى.) ايمان حقيقتلرينى گونش گبى گوسترييور، بو مملكته حكم ايدن اونڭ قوّتندن إستفاده ايتمك گركدر. رسالۀِ نور، سوندورمك ايچون اوفلندكجه پارلايان بر نوردر. اونڭ طلبهلرى باشقهلره بڭزهمزلر، مغلوب اولمازلر. رسالۀِ نورى مغلوب ايدهبيلمك ايچون كائناتى ألنده طوتان بر قوّت لازمدر.
چونكه رسالۀِ نور دنيوى ايشلره، شخصى و سفلى منفعتلره آلَت اولاماز. گونش گبى حقيقتِ ايمانيه و قرآنيه يردهكى موقّت ايشيقلرڭ جاذبهسنه تابع و آلَت اولماديغى گبى او حقيقتى طانييان، رسالۀِ نورى دگل دنيا جريانلرينه بلكه كائناته ده آلَت ايدهمز.
أوت، رسالۀِ نورڭ وظيفهسى ايسه حياتِ أبديهيى محو ايدن و حياتِ دنيويهيى ده دهشتلى بر زهره چويرن كفرِ مطلقه قارشى، ايمانى اولان حقيقتلريله غايت قطعى و أڭ متمرّد زنديق فيلسوفلرى ده ايمانه گتيرن قوّتلى برهانلرله قرآنه خدمت ايتمكدر. اونڭ ايچون رسالۀِ نورى هيچ بر شيئه آلَت ايدهمهيز و بِالفعل اويلهيز.
هيئتِ حاكمه!
بيڭ سنهدن بَرى قرآنڭ بايراقدارى و مجاهدى و عالمِ إسلامڭ قهرمان مجاهدى اولان و قرآنى جهانڭ جهاتِ ستّهسنده إعلان ايدن نجيب و مبارك قهرمان أجداديمزڭ أولادلرينى نورِ ايماندن آييرمق و إسلاميت دفترينه گچن مفاخرِ عاليهسنه ضد اولارق مادّى و معنوى هلاكتلره معروض بيراقمق اولان دهشتلى سوءِ قصدلره و او قهرمان أجدادڭ طورونلرى اولان بوگونكى گنجلگى و گلهجك نسللرى او شرفِ عالىدن محروم ايتمك اولان دهشتلى دينسزلك تلقينلرينه قارشى؛ قرآنِ كريمڭ اون دردنجى عصرِ محمّديدهكى (عصم) عزيز دلاّلى و بو عصرڭ بر هدايت مدارى و بو مدهش زمانڭ مدهش ظلماتنه قارشى نورِ قرآنله مقابله ايدن بيوك فداكارى و رسالۀِ نورڭ يوز بيڭلر نسخهلرينى، ميليونلر طلبهلرينڭ قلملريله هر طرفده نشر ايدوب دينسزلگه و كفرِ مطلقه و قومونيزمه قارشى بر سدِّ قرآنى تأسيس ايدن محتشم قهرمانى بديع الزمان سعيد نورسى و يوز بيڭ باشلار فدا اولدقلرى حقيقته باشمز دخى فدا اولسون دييهرك نورِ إسلامى سوندورمك و نورِ ايمانى يوق ايتمك ايچون ياپيلان دهشتلى زندقه هجوملرينه قارشى مقابله ايدن؛ إستبدادلره، إجبارلره قارشى عزّتِ إسلاميهيى محافظه و شرفِ ايمانى عالمه إعلان ايدن، قرآنِ معجز البياندن قلبِ منوّرلرينه گلن و ايمان حقيقتلرينى گونش گبى پارلاق دليل و حجّتلرله إثبات ايدن و رسالۀِ نورله دينسزلك، ضلالت أژدرلرينه ميدان اوقويان و دالقاووقلق ياپميان و محكمهلرده «باشمدهكى صاچلرم عددنجه باشلارم بولونسه، هر گون برى كسيلسه زندقهيه تسليمِ سلاح ايدوب وطن و ملّت و إسلاميته خيانت ايتمهم و حقيقتِ قرآنه فدا اولان بو باشى ظالملره أگمهم.» ديين و أهلِ ضلالته ميدان اوقويان و خدمتِ ايمانيه يولنده هم دنيوى هم لزوم اولسه اُخروى حياتلرينى فدا ايدن و محكمهلرده دعوا ايتديگى گبى بر تك حقيقتِ ايمانيهيى دنيا سلطنتيله دگيشديرمهين قهرمانِ إسلام اولان استاديمز بديع الزمان و رسالۀِ نوردن بزى اوزاقلاشديراجق هيچ بر بشرى قوّت يوقدر. هم رسالۀِ نور ايكى حياتمزڭ خلاصكارى و سرمايۀِ عمريمز و غايۀِ حياتمزدر.
قومونيستلر و دينسزلر كاغد و مركّبى قالديرسهلر أگر ممكن اولسه دريمزى كاغد و قانمزى مركّب ياپوب ينه رسالۀِ نورى يازاجغز.
هيئتِ حاكمه بيلسينلر كه: خليفۀِ روىِ زمين حضرتِ عُمَر (رض) خلافتى زماننده عادى بر خرستيان ايله برلكده محكمهده محاكمه اولديلر (*). حالبوكه او خرستيان، إسلام حكومتنڭ مقدّس رژيملرينه، دينلرينه، قانونلرينه مخالف ايكن محكمهده اونڭ او حالى نظره آلينمامسى آچيقجه گوسترر كه: عدالت هيچ بر جريانه قاپيلماز، هيچ بر طرفگيرلك گودهمز.
___
(*): بو حقيقتى استاديمز إستانبول عدليهسنده بيان ايتمشدر.
___
ايشته بونڭ ايچوندر كه محكمهده قهرمانِ إسلام اولان بديع الزمان سعيد نورسىنڭ بيانى وجهله:
أهلِ ايماندن بتون گلنلر ماضىيه گيدنلره مغفرت دعالريله و حسناتلرينى اونلرڭ روحلرينه باغيشلاملريله يارديملرينه بناءً دڭزلى محكمهسنده ديمشدم: محكمۀِ حشرده ميليارلر أهلِ ايماندن دعواجيلر طرفندن، قرآن حقيقتلرينه خدمت ايدن نور طلبهلرينى محكوم و پريشان ايتمك ايستهينلردن و سزلردن صورولسه كه:
سربستيت قانونلريله دينسزلرڭ، قومونيستلرڭ نشرياتلرينه و آنارشيلگى يتيشديرن جمعيتلرينه مسامحهكارانه باقوب ايليشمديگڭز حالده؛ وطن و ملّتى آنارشيلكدن، دينسزلكدن و أخلاقسزلقدن، وطنداشلرى ئولومڭ إعدامِ أبديسندن قورتارمغه چاليشان رسالۀِ نور طلبهلرينى حپسلر و تضييقلرله پريشان ايتمك ايستديڭز دييه سزلردن صورولسه نه جواب ويرهجكسڭز، بز ده سزلردن صورييورز دييه او زمان اونلره ديمشدم، او زمان او إنصافلى و عدالتلى ذاتلر بزى برائت ايتديرديلر.
ايشته حاكملر! بو آلى حقيقتلره رغمًا بزه ديسهڭز كه سزى محكمهيه سَوق ايتديرمك و بيچيلمش بر قفتان گيديرمك ايستهيورلر. بو تقديرده شو آيتِ كريمهنڭ قلعۀِ قدسيهسنه إلتجا ايدييورم:
﴿حَسْبُنَا اللّٰهُ وَنِعْمَ الْوَكٖيلُ ۞ نِعْمَ الْمَوْلٰى وَنِعْمَ النَّصٖيرُ﴾
١٧.٢.١٩٥٣
اورفه، يوسف پاشا محلّهسنده
حسنى بايرام
* * *