تنبيه: شو محاكماتڭ جهت الوحدتى بودر كه: أگر جميع فنون أله آلينيرسه و فنونلرڭ قواعدينڭ كلّيتلريله كشف ايتدكلرى إتّساق و إنتظامه تماشا ايديليرسه، هم ده مصالحِ جزئيۀِ متفرّقهنڭ مايهسى و عقدۀِ حياتيهسى حكمنده اولان بر لذّتى ويا بر محبّتى ويا بر أمرِ آخَرى ايچنه آتيلمقله (أكل و نكاهدهكى گبى) پريشان اولان امور و أفعال او مايه ايله إرتباط و إتّصال ايتدكلرينى، عنايتِ إلٰهيه نقطۀِ نظرنده نظرِ دقّته آلينيرسه؛ هم ده حكمتڭ شهادتيله ثابت اولان عدمِ عبثيت و عدمِ إهمالى مطالعهيه آلينيرسه، إستقراءِ تامله نتيجه ويرييور كه: مصالحِ كلّيهنڭ قطب و محورى و معدنِ حياتى حكمنده اولان نبوّت، نوعِ بشرده ضروريدر... فرضا اولمازسه، پريشان اولان نوعِ بشر؛ گويا مختل بر عالمدن شو منتظم عالمه دوشوب جريانِ عمومينڭ آهنگنى إخلال ايتديگى قبول اولونورسه، بز إنسانلر سائر كائناته قارشى نه يوزيمز قالاجقدر؟..