تنبيه: أى برادر! أگر برهانِ صانعڭ صُغْراسى سنڭ صحيفۀِ ذهنڭده إنتقاش ايتمش ايسه، حاضر اول!. كبراسى اولان نبوّتِ محمّدڭ بحثنه گچييورز:
إشارت و إرشاد: كبرا صادقدر. زيرا صحيفۀِ إعتبارِ عالمده منقوش اولان آثارِ أنبيايى مطالعه ايتسهڭ و لسانِ تاريخده جريان ايدن أحواللرينى ديڭلرسهڭ و حقيقتى، يعنى جهت الوحدتى تأثيرِ زمان و مكان ايله گيرديگى صورتلردن تجريد ايدهبيليرسهڭ گورهجكسڭ كه: عنايتِ إلٰهيهنڭ ضياسى اولان محاسنِ مجرّدهنڭ شعلهسى اولان حقوق اللّٰه و حقوقِ عبادى؛ أنبياء، دستورِ حركت ايتدكلرينى و نوعِ بشر طرفندن أنبيايه قارشى كيفيتِ تلقّيلرى و اُممه قارشى صورتِ معاملهلرى و تركِ منافعِ شخصيه و سائر امورلر كه اونلره نبى ديديرمش و نبوّته مدار اولمش اولان أساسلر ايسه؛ أولادِ بشرڭ سنِّ تكمّل و كهولتده اولان استادى و مدرسۀِ جزيرة العربده منبعِ علومِ عاليه و معلّمى اولان ذاتِ محمّدده داها أكمل و داها أظهر بولونور.