ده ظاهر اولمادى. بِالعكس محاسنڭ ترقّيسيله برابر، مساوى دخى ترقّى ايدوب داها دهشتلى و آلداتيجى بر شكله گيرييور. أوت ناصلكه نواميسِ حكمت، دساتيرِ حكومتدن مستغنى دگلدر. اويله ده، وجدانه حاكم اولان قوانينِ شريعت و فضيلته أشدِّ إحتياج ايله محتاجدر. ايشته شويله موهومه اولان مَلكۀِ تعديلِ أخلاق، قواىِ ثلاثه يى حكمت و عفّت و شجاعتده محافظه ايتمهسنه كافى دگلدر. بناءً عليه إنسان بِالضروره وجدان و طبيعتلره مؤثّر و نافذ اولان ميزانِ عدالتِ إلٰهيه يى طوتهجق بر نبىيه محتاجدر.
إشارت: بيڭلرجه أنبياء، نوعِ بشرده نبوّتى إدّعا ايدهرك بيڭلرجه معجزاتله مدّعايى إثبات ايتمشلردر. ايشته او أنبيانڭ جميع معجزاتلرى لسانِ واحد ايله نبوّتِ مطلقه يى إعلان ايدر. بزم شو صغرامزه دخى بر برهانِ قاطعدر. بوڭا تواترِ بِالمعنا ويا نه تعبير ايله دييورسهڭز دييڭز، متين بر دليلدر.