مقدّمه: أگر چندان هر آدم عالمدهكى رعايتِ مصالح و إنتظامده إستقراءِ تام ايدهمز و إحاطه ايدهمز. فقط نوعِ بشردهكى تلاحقِ أفكار سايهسنده، كائناتڭ هر بر نوعنه مخصوص قواعدِ كلّيۀِ منتظمهدن عبارت اولان بر فن تشكّل ايتمش و ايتمكدهدر.
بونڭله برابر بر أمرده إنتظام اولمازسه حكم كلّيتيله جريان ايدهمديگى ايچون، قاعدهنڭ كلّيتى نوعڭ حسنِ إنتظامنه دليلدر. ديمك جميعِ فنونِ أكوان قاعدهلرڭ كلّيتلرينه بناءً، إستقراءِ تامله نظامِ أكملى إنتاج ايدن برر برهاندرلر. أوت فنونِ كائنات بِتَمَامِهَا موجوداتڭ سلسلهلرندهكى حلقهلردن آصيلمش اولان مصالح و ثمراتى و إنقلاباتِ أحوالڭ تلافيفنده صاقلانمش اولان حكَم و فوائدى گوسترمك ايله صانعڭ قصد و حكمتنه پارمق ايله شهادت و إشارت ايتدكلرى گبى، شياطينِ أوهامه قارشى برر نجمِ ثاقبدر.
إشارت: جهلِ مركّبى إنتاج ايدن، نظرِ سطحى يى توليد ايدن الفتدن تجريدِ نظر ايتسهڭ و عقله قارشى سدِّ