امّا خرابيتِ سد؛ بعض، قيامتده و بعض، قيامته ياقين و بعض، أمارهسى اولمق شرطيله اوزاقدر و بعض، خراب اولمشدر فقط دَكّ اولمامش. قيلهلر چوق. هر حالده نقطۀِ إتّفاق؛ سدّڭ إنهدامى، يرڭ صقالنه بر بياض دوشمك و اوغلى اولان نوعِ بشر ده إختيار اولماسنه بر علامتدر. أگر بو مذاكراتى موازنه و محاكمه ايتمشسهڭ جائزدر، تجويز ايدهسڭ: سدِّ قرآن، سدِّ چيندر كه: چوق فرسخلر ايله اوزون و عجائبِ سبعۀِ مشهورهدن، بر «مؤيّد مِنْ عند اللّٰه» ڭ إرشاديله بنا اولونمش، او زمانڭ أهلِ مدنيتى، أهلِ بدويتڭ شرلرندن تأمين أيلهمشدر. أوت او وحشيلردن هون قبيلهسى آوروپايى هرج و مرج ايتديگى گبى، اونلردن مغول طائفهسى ده آسيايى زير و زبر أيلهمشدر. صوڭره سدّڭ خرابيتى قيامته علامت اولور. باخصوص دَكّ، اوندن باشقهدر. پيغمبر: «أشراطِ ساعتدنم. بن و قيامت بو ايكى پارمق گبى يز.» ديسه نهدن إستغراب اولونسون كه، خرابيتِ سد زمانِ