يدنجى نكتهلى إشارت:
معجزاتِ نبويهنڭ بركتِ طعام خصوصنده اولان قسمندن بر قاچ قطعى و معنًا متواتر مثالنه إشارت ايدهجگز. بحثدن أوّل بر مقدّمه ذكرى مناسبدر.
مقدّمه: شو گلهجك بركتلى معجزات مثاللرى، هر برى متعدّد طريقله، حتّى بعضلرى اون آلتى طريقله صحيح بر صورتده نقل ايديلمش. أكثريسى، بر جماعتِ كثيره حضورنده وقوع بولمش؛ او جماعت ايچنده معتبر و صادق إنسانلر اونلردن بحث ايدوب نقل ايتمشلر. مثلا: «صاع دينيلن درت آووج طعامدن يتمش آدم يميشلر، طوق اولمشلر» نقل ايدييور. او يتمش آدم، اونڭ سوزينى ايشيدييور، تكذيب ايتمييور. ديمك سكوت ايله تصديق ايدييورلر. حالبوكه او عصرِ صدق و حقيقتده و او حقپرست و جدّى و طوغرى آدم اولان صحابهلر، ذرّه مقدار يالانى گورسه، ردّ و تكذيب ايدرلر. حالبوكه بحث ايدهجگمز واقعهلرى چوقلر روايت ايتمش و اوتهكيلر ده سكوت ايله تصديق ايتمشلر. ديمك هر بر حادثه معنًا متواتر گبى قطعيدر.
هم صحابهلر، قرآنڭ و آيتلرڭ حفظندن صوڭره أڭ زياده، رسولِ أكرم عليه الصلاة والسلامڭ أفعال و أقوالنڭ محافظهسنه، باخصوص أحكامه و معجزاته دائر أحوالنه بتون قوّتلريله چاليشدقلرينى و صحّتلرينه پك چوق دقّت ايتدكلرينى، تاريخ و سِيَر شهادت ايدييور. رسولِ أكرم عليه الصلاة والسلامه عائد أڭ كوچك بر حركتى، بر سيرتى، بر حالى إهمال ايتمهمشلر. و ايتمدكلرينى و قيد ايتدكلرينى، كتبِ أحاديثيه شهادت ايدييور. هم عصرِ سعادتده، معجزاتى و مدارِ أحكام أحاديثى، كتابتله چوقلر قيد ايدوب يازديلر. خصوصًا عَباَدِلَۀِ سبعه، كتابتله قيد ايتديلر. خصوصًا ترجمانُ القرآن اولان عبد اللّٰه ابن عبّاس و عبد اللّٰه ابن عَمْرو ابن العاص، باخصوص اوتوز قرق سنه صوڭره، تابعينڭ بيڭلر محقّقلرى، أحاديثى و معجزاتى يازى ايله قيد ايتديلر. داها اوندن صوڭره، باشده درت إمامِ مجتهد و بيڭلر محقّق محدّثلر نقل ايتديلر؛ يازى ايله محافظه ايتديلر. داها هجرتدن ايكى يوز سنه صوڭره باشده بخارى، مسلم، كتبِ ستّۀِ مقبوله وظيفۀِ حفظى اوموزلرينه آلديلر. ابن جوزى گبى شدّتلى بيڭلر منقّدلر چيقوب؛ بعض ملحدلرڭ ويا فكرسز ويا حفظسز ويا نادانلرڭ قاريشديردقلرى موضوع أحاديثى تفريق ايتديلر، گوسترديلر. صوڭره أهلِ كشفڭ تصديقيله؛ يتمش دفعه رسولِ أكرم عليه الصلاة والسلام تمثّل ايدوب، يقظه حالنده اونڭ صحبتيله مشرّف اولان جلال الدينِ سيوطى گبى علاّمهلر و محقّقلر، أحاديثِ صحيحهنڭ ألماسلرينى، سائر سوزلردن و موضوعاتدن تفريق ايتديلر. ايشته بحث ايدهجگمز حادثهلر، معجزهلر بويله ألدن أله (قوّتلى، أمين، متعدّد و چوق، بلكه حدسز أللردن) صاغلام اولارق بزه گلمش.
﴿اَلْحَمْدُ لِلّٰهِ هٰذَا مِنْ فَضْلِ رَبّٖى﴾
ايشته بوڭا بناءً؛ «بو زمانه قدر اوزون مسافهدن گلن شو زماندن تا او زمانه قدر بو حادثهلرى ناصل بيلهجگز كه قاريشمامش و صافيدر» خاطره گلمهمليدر.
بركته دائر معجزاتِ قطعيهنڭ برنجى مثالى:
باشده بخارى و مسلم، كتبِ ستّۀِ صحيحه متّفقًا خبر ويرييورلر كه؛ رسولِ أكرم عليه الصلاة والسلامڭ حضرتِ زينب ايله تزوّجى وليمهسنده، حضرتِ أنسڭ والدهسى اُمُّ سُلَيم، بر ايكى آووج خرمايى ياغ ايله قاوورارق بر قابه قويوب حضرتِ أنسله پيغمبر عليه الصلاة والسلامه گوندردى. أنسه فرمان ايتدى كه: «فلان، فلانى چاغير. هم كيمه تصادف ايتسهڭ دعوت ايت.» أنس ده كيمه راست گلدى ايسه چاغيردى. اوچ يوز قدر صحابه گلوب، صفّه و حجرۀِ سعادتى طولديرديلر. فرمان ايتدى:
﴿تَحَلَّقُوا عَشَرَةً عَشَرَةً﴾
يعنى: «اونر اونر حلقه اولڭز!» صوڭره مبارك ألنى او آز طعام اوزرينه قويدى، دعا ايتدى، «بيورڭ» ديدى. بتون او اوچ يوز آدم ييديلر، طوق اولوب قالقديلر. أنسه فرمان ايتمش: «قالدير!» أنس ديمش كه: «بيلمهدم، طعام قابنى قويديغم وقت مى طعام چوقدى، يوقسه قالديرديغم وقت مى چوقدى فرق ايدهمدم.»
ايكنجى مثال: مهماندارِ نبوى أبو أيوب الأنصارى خانهسنه تشريفِ نبوى هنگامنده أبو أيوب دير كه: رسولِ أكرم عليه الصلاة والسلام و أبو بكر الصدّيقه كافى گلهجك ايكى كيشيلك يمك ياپدم. اوڭا فرمان ايتدى:
﴿اُدْعُ ثَلَاثٖينَ مِنْ اَشْرَافِ الْاَنْصَارِ﴾
اوتوز آدم گلديلر، ييديلر. صوڭره فرمان ايتدى: (اُدْعُ سِتّٖينَ) آلتمش داها دعوت ايتدم؛ گلديلر، ييديلر. صوڭره فرمان ايتدى: (اُدْعُ سَبْعٖينَ) يتمش داها دعوت ايتدم؛ گلديلر، ييديلر. قابلرده يمك داها قالدى. بتون گلنلر او معجزه قارشيسنده إسلاميته گيروب، بيعت ايتديلر. او ايكى كيشيلك طعامدن يوز سكسان آدم ييديلر.
اوچنجى مثال: حضرتِ عُمَر ابن الخطّاب و أبو هريره و سلمه ابن الأكوَعْ و أبو عَمرة الأنصارى گبى، متعدّد طريقلرله دييورلر كه: بر غزوهده اوردو آج قالدى. رسولِ أكرم عليه الصلاة والسلامه مراجعت ايتديلر. فرمان ايتدى كه: «هگبهلريڭزده قالان بقيّۀِ أرزاقى طوپلايڭز!» هركس آزر برر پارچه خرما گتيردى. أڭ چوق گتيرن درت آووج گتيرهبيلدى. بر كليمه قويديلر. سلمه دير كه: «مجموعنى بن تخمين ايتدم، اوطورمش بر كچى قدر آنجق واردى.» صوڭره رسولِ أكرم عليه الصلاة والسلام بركتله دعا ايدوب، فرمان ايتدى: «هركس قابنى گتيرسين!» قوشوشديلر، گلديلر. او اوردو ايچنده هيچ بر قاب قالمادى، هپسنى طولديرديلر. هم فضله قالدى. صحابهدن بر راوى ديمش: «او بركتڭ گيديشاتندن آڭلادم؛ أگر أهلِ أرض گلسه ايدى، اونلره دخى كافى گلهجكدى.»
دردنجى مثال: باشده بخارى و مسلم، كتبِ صحيحه بيان ايدييورلر كه: عبد الرحمن ابن أبى بكر الصدّيق دير: بز يوز اوتوز صحابه، بر سفرده رسولِ أكرم عليه الصلاة والسلام ايله برابردك. درت آووج مقدارى اولان بر صاع، أكمك ايچون خمور ياپيلدى. بر كچى دخى كسيلدى، پيشيريلدى؛ يالڭز جگر و بوبركلرى كباب ياپيلدى. قَسَم ايدرم، او كبابدن يوز اوتوز صحابهدن هر بريسنه بر پارچه كسدى، ويردى. صوڭره رسولِ أكرم عليه الصلاة والسلام، پيشمش أتى ايكى كاسهيه قويدى. بز عموممز طوق اولونجهيه قدر ييدك، فضله قالدى. بن فضلهسنى دوهيه يوكلهدم.
بشنجى مثال: كتبِ صحيحه قطعيتله بيان ايدييورلر كه: غزوۀِ غرّاءِ أحزابده، مشهور يوم الخندقده، حضرتِ جابر الأنصارى قَسَم ايله إعلان ايدييور: او گونده، درت آووج اولان بر صاع آرپه أكمگندن، بر سنهلك بر كچى اوغلاغندن بيڭ آدم ييديلر و اويلهجه قالدى. حضرتِ جابر دير كه: «او گون يمك، خانهمده پيشيريلدى؛ بتون بيڭ آدم او صاعدن، او اوغلاقدن ييديلر، گيتديلر. داها تنجرهمز طولو قاينايور، داها خموريمز أكمك ياپيلييور. او خموره، او تنجرهيه مبارك آغزينڭ صوينى قويوب، بركتله دعا ايتمشدى.
ايشته شو معجزۀ بركتى، بيڭ ذاتڭ حضورنده، اونلرى اوڭا علاقهدار گوسترهرك حضرتِ جابر قَسَمله إعلان ايدييور. ديمك شو حادثه، بيڭ آدم روايت ايتمش گبى قطعى دينيلهبيلير.
آلتنجى مثال: (نقلِ صحيحِ قطعى ايله) خادمِ نبوى حضرتِ أنسڭ عموجهسى مشهور أبو طلحه دير كه: رسولِ أكرم عليه الصلاة والسلام؛ يتمش سكسان آدمى، أنسڭ قولتوغى آلتنده گتيرديگى آز آرپه أكمگندن طوق اولونجهيه قدر ييديردى. «او آز أكمكلرى پارچه پارچه ايديڭز!» أمر ايتدى و بركتله دعا ايتدى. منزل طار اولديغندن، اونر اونر گلوب ييديلر، طوق اولارق گيتديلر.
يدنجى مثال: (نقلِ صحيحِ قطعى ايله) شفاءِ شريف و مسلم گبى كتبِ صحيحه بيان ايدرلر كه: حضرتِ جابر الأنصارى دييور: بر ذات، رسولِ أكرم عليه الصلاة والسلامدن عيالى ايچون طعام ايستدى. رسولِ أكرم عليه الصلاة والسلام، ياريم يوك آرپه ويردى. چوق زمان او آدم عيالى ايله و مسافرلريله او آرپهدن ييديلر. باقييورلر، بيتمييور. نقصانيتنى آڭلامق ايچون ئولچديلر. صوڭره بركت دخى قالقدى، نقصان اولمغه باشلادى. رسولِ أكرم عليه الصلاة والسلامه گلدى، وقعهيى بيان ايتدى. اوڭا جوابًا فرمان ايتدى:
﴿لَوْ لَمْ تَكِلْهُ لَاَكَلْتُمْ مِنْهُ وَلَقَامَ بِكُمْ﴾
يعنى: «أگر كيله ايله تجربه ايتمسه ايديڭز، حياتڭزجه سزه يتردى.»
سكزنجى مثال: ترميذى و نسائى و بيهقى و شفاءِ شريف گبى كتبِ صحيحه بيان ايدييورلر كه: حضرتِ سَمُرَةَ بنِ جندب دير: رسولِ أكرم عليه الصلاة والسلامه بر كاسه أت گلدى. صباحدن آقشامه قدر فوج فوج آدملر گلديلر، ييديلر.
ايشته مقدّمهده بيان ايتديگمز سرّه بناءً؛ شو واقعۀِ بركت، يالڭز سَمُرهنڭ روايتى دگل، بلكه سَمُره، او يمگى يين جماعتلرڭ ممثّلى گبى، اونلرڭ نامنه و تصديقلرينه بناءً إعلان ايدييور.
طوقوزنجى مثال: شفاءِ شريف صاحبى و مشهور ابن أبى شيبه و طَبَرَانى گبى موثوق و صحيح محقّقلر روايتيله، حضرتِ أبو هريره دير: رسولِ أكرم عليه الصلاة والسلام بڭا أمر ايتدى: «مسجدِ شريفڭ صفّهسنى مسكن إتّخاذ ايدن يوزدن زياده فقراىِ مهاجرينى دعوت ايت!» بن دخى اونلرى آرادم، طوپلادم. عموممزه بر طبله طعام قونولدى. بز، ايستديگمز قدر ييدك، قالقدق. او كاسه قونولديغى وقت ناصل ايدى، ينه اويله طولو قالدى؛ يالڭز پارمقلرڭ ايزى طعامده گورونويوردى.
ايشته حضرتِ أبو هريره، عموم كاملينِ أهلِ صفّه تصديقنه إستنادًا، اونلر نامنه خبر ويرر. ديمك، معنًا عموم أهلِ صفّه روايت ايتمش گبى قطعيدر. هم هيچ ممكن ميدر كه، او خبر حق و طوغرى اولماسه، او صادق و كامل ذاتلر سكوت ايدوب، تكذيب ايتمهسينلر.
اوننجى مثال: (نقلِ صحيحِ قطعى ايله) حضرتِ إمامِ على دير: رسولِ أكرم عليه الصلاة والسلام، بنى عبد المطّلبى جمع ايتدى. اونلر قرق آدم ايديلر. اونلردن بعضلرى بر دوه ياوروسنى ير ايدى و درت قِيّه سوت ايچردى. حالبوكه عموم اونلره، بر آووج قدر بر يمك ياپدى؛ عموم يهيوب طوق اولديلر. يمك أسكيسى گبى قالدى. صوڭره اوچ درت آدمه آنجق كافى گلير آغاجدن بر قاب ايچنده سوت گتيردى. عمومًا ايچديلر، طويديلر. ايچيلمهمش گبى باقى قالدى.
ايشته حضرتِ علىنڭ شجاعتى و صداقتى قطعيتنده بر معجزۀ بركت!..
اون برنجى مثال: (نقلِ صحيح ايله) حضرتِ على و فاطمة الزهرا وليمهسنده، رسولِ أكرم عليه الصلاة والسلام، بلالِ حبشىيه أمر ايتدى: «درت بش آووج اون أكمك ياپيلسين و بر دوه ياوروسى كسيلسين.» حضرتِ بلال دير: بن طعامى گتيردم، مبارك ألنى اوستنه ووردى؛ صوڭره طائفه طائفه صحابهلر گلديلر، ييديلر، گيتديلر. او يمكدن باقى قالان مقداره ينه بركتله دعا ايتدى، بتون أزواجِ طاهراته هر برينه برر كاسه گوندرلدى. أمر ايتدى كه: «هم ييسينلر، هم يانلرينه گلنلره ييديرسينلر.»
أوت بويله مبارك بر إزدواجده، ألبته بويله بر بركت لازمدر و وقوعى قطعيدر!..
اون ايكنجى مثال: حضرتِ إمامِ جعفرِ صادق، پدرلرى إمامِ محمّد الباقردن، او ده پدرى إمامِ زين العابديندن، او دخى إمامِ علىدن نقل ايدر كه: فاطمة الزهرا، يالڭز ايكيسنه كافى گلهجك بر يمك پيشيردى. صوڭره علىيى گوندردى؛ تا رسولِ أكرم عليه الصلاة والسلام گلسين، برابر ييسينلر. تشريف ايتدى و أمر ايتدى كه: او يمكدن هر بر أزواجنه برر كاسه گوندرلدى. صوڭره كندينه، هم علىيه، هم فاطمه و أولادلرينه برر كاسه آيرلدقدن صوڭره، حضرتِ فاطمه دير: «تنجرهمزى قالديردق، داها طولو اولوب طاشييوردى. مشيئتِ إلٰهيه ايله، خيلى زمان او يمكدن ييدك.»
عجبا نيچون بو نورانى، يوكسك سلسلۀ روايتدن گلن شو معجزۀ بركته، گوزڭ ايله گورمش گبى اينانمييورسڭ؟ أوت بوڭا قارشى، شيطان دخى بهانه بولاماز.
اون اوچنجى مثال: أبو داود و أحمد ابن حنبل و إمامِ بيهقى گبى صدوق إماملر، دكين الأحمسى ابن سعيد المُزينيدن، هم آلتى قارداش ايله برابر صحبته مشرّف و صحابهلردن اولان نعمان ابن مقرّن الأحمسى المُزينيدن، هم جريردن نقل ايدهرك، متعدّد طريقلرله حضرتِ عُمَر ابن الخطّابدن نقل ايدييورلر كه: رسولِ أكرم عليه الصلاة والسلام، حضرتِ عُمَره أمر ايتدى: «أحمسى قبيلهسندن گلن درت يوز آتلىيه يولجيلق ايچون زاد و ذخيره وير!» حضرتِ عُمَر ديدى: «يا رسول اللّٰه! موجود ذخيره، بر قاچ صاعدر. كومهسى، اوطورمش بر دوه ياوروسى قدردر.» فرمان ايتدى: «گيت وير!» او ده گيتدى، ياريم يوك خرمادن، درت يوز سوارىيه كفايت درجهسنده زاد و ذخيره ويردى. و ديدى: هيچ نقصان اولمامش گبى أسكى حالنده قالدى.
ايشته شو معجزۀِ بركت، درت يوز آدمله و باخصوص حضرتِ عُمَر ايله مناسبتدار بر صورتده وقوعه گلمشدر. روايتلرڭ آرقهسنده بونلر وار. بونلرڭ سكوتى، تصديقدر. ايكى اوچ خبرِ واحد دييوب گچمه! بويله حادثهلر خبرِ واحد دخى اولسه، تواترِ معنوى حكمنده قناعت ويرر.
اون دردنجى مثال: باشده بخارى و مسلم، كتبِ صحيحه خبر ويرييورلر كه: حضرتِ جابرڭ پدرى وفات ايدر؛ بورجى چوق، زياده مديون. بورج صاحبلرى ده يهوديلر. جابر، پدرينڭ أصل مالنى غُرَمايه ويردى، قبول ايتمديلر. حالبوكه باغندهكى ميوهلرى، قاچ سنهده دَيْننه كافى گلميهجك. رسولِ أكرم عليه الصلاة والسلام فرمان ايتدى: «باغڭ ميوهلرينى قوپاريڭز، خرمان ايديڭز!» اويله ياپديلر. رسولِ أكرم عليه الصلاة والسلام خرمان ايچنده گزدى، دعا ايتدى. صوڭره جابر خرماندن پدرينڭ بتون غُرماسنڭ بورجلرينى ويردكدن صوڭره، ينه بر سنهده باغدن گلن محصولات قدر خرمانده قالدى. بر روايتده، بتون غُرَمايه ويرديگى قدر قالدى. او حادثهدن بورج صاحبلرى اولان يهوديلر، چوق تعجّب ايدوب حيرتده قالديلر.
ايشته شو معجزۀِ باهرۀِ بركت، يالڭز حضرتِ جابر گبى بر قاچ راويلرڭ خبرى دگل، بلكه معنوى تواتر حكمنده، او حادثه ايله مناسبتدار، حدِّ تواتر درجهسنده چوق آدملرى تمثيل ايدهرك روايت ايتمشلر.
اون بشنجى مثال: باشده ترميذى و إمامِ بيهقى گبى محقّقلر، حضرتِ أبو هريرهدن نقلِ صحيح ايله برابر خبر ويرييورلر كه: أبو هريره ديمش كه: بر غزوهده (باشقه بر روايتده غزوۀِ تبوكده) اوردو آج قالدى. رسولِ أكرم عليه الصلاة والسلام فرمان ايتدى:
﴿هَلْ مِنْ شَىْءٍ؟﴾
«بر شى وار مى؟» دييه أمر ايتدى. بن ديدم: «هگبهده بر پارچه خرما وار.» (بر روايتده، اون بش دانه ايمش.) ديدى: «گتير!» گتيردم. مبارك ألنى صوقدى، بر قبضه چيقاردى، بر قابه بيراقدى؛ بركتله دعا بيورديلر. صوڭره اونر اونر عسكرى چاغيردى، عمومًا ييديلر. صوڭره فرمان ايتدى:
﴿خُذْ مَا جِئْتَ بِهٖ وَاقْبِضْ عَلَيْهِ وَلَا تَكُبَّهُ﴾
بن آلدم، أليمى او هگبهيه صوقدم. أوّل گتيرديگم قدر أليمه گچدى. صوڭره رسولِ أكرم عليه الصلاة والسلام حياتنده، أبو بكر و عُمَر و عثمان حياتنده، او خرمالردن ييدم. باشقه بر طريقده روايت ايديلمش كه: او خرمالردن قاچ يوك، فى سبيل اللّٰه صرف ايتدم. صوڭره حضرتِ عثمانڭ قتلنده، او خرما قابى ايله نَهب و غارات ايديلدى، گيتدى.
ايشته خواجۀِ كائنات اولان فخرِ عالم عليه الصلاة والسلامڭ قدسى مدرسهسى و تكيهسى اولان صفّهنڭ دميرباش بر مهمّ طلبهسى و مريدى و قوّۀِ حافظهنڭ زيادهسى ايچون دعاىِ نبويهيه مظهر اولان حضرتِ أبو هريره، غزوۀِ تبوك گبى بر مجمعِ ناسده وقوعنى خبر ويرديگى شو معجزۀ بركت؛ معنًا بر اوردو سوزى قدر قطعى و قوّتلى اولمق گركدر.
اون آلتنجى مثال: باشده بخارى، كتبِ صحيحه (نقلِ قطعى ايله) بيان ايدييورلر كه: حضرتِ أبو هريره آج اولمش، رسولِ أكرم عليه الصلاة والسلامڭ آرقهسندن گيدوب، منزلِ سعادته گيتمشلر. باقارلر كه بر قدح سوت، اورايه هديه گتيريلمش. رسولِ أكرم عليه الصلاة والسلام أمر ايتدى كه: «أهلِ صفّهيى چاغير!» بن قلبمدن ديدم كه: «بو سوتڭ بتوننى بن ايچهبيليرم. بن داها زياده محتاجم.» فقط أمرِ نبوى ايچون اونلرى طوپلادم، گتيردم. يوزى متجاوز ايديلر. فرمان ايتدى: «اونلره ايچير!» بن ده او قدحدهكى سوتى برر برر ويردم. هر بريسى طويونجيه قدر ايچر، ديگرينه ويررم. بويله برر برر ايچيرهرك، بتون أهلِ صفّه او صافى سوتدن ايچديلر. صوڭره فرمان ايتدى كه:
﴿بَقِىَ اَنَا وَاَنْتَ فَاشْرَبْ﴾
بن ايچدم. «ايچدكجه، ايچ!» فرمان ايدر؛ تا بن ديدم: «سنى حق ايله إرسال ايدن ذاتِ ذو الجلاله قَسَم ايدرم، ير قالمادى كه ايچهيم.» صوڭره كنديسى آلدى. بسم اللّٰه دييوب حمد ايدهرك بقيّهسنى ايچدى. يوز بيڭ عافيت اولسون.
ايشته شو صافى، خالص سوت گبى لطيف، شبههسز معجزۀِ باهرۀِ بركت، بشيوز بيڭ حديثى حفظنه آلان حضرتِ بخارى باشده اولارق، كتبِ ستّۀِ صحيحه ايله نقللرى، گوزله گورمك قدر قطعى اولمقله برابر؛ مدرسۀِ قدسيۀِ أحمديه (عصم) اولان صفّهنڭ نامدار، صادق، حافظ بر شاكردى اولان أبو هريرهنڭ، عموم أهلِ صفّهيى معنًا إشهاد ايدهرك، عادتا عمومنى تمثيل ايدوب شو إخبارى، تواتر درجهسنده قطعى تلقّى ايتمهينڭ يا قلبى بوزوق ويا عقلى يوق. عجبا حضرتِ أبو هريره گبى صادق و بتون حياتنى حديثه و دينه وقف ايدن،
﴿وَمَنْ كَذَبَ عَلَىَّ مُتَعَمِّدًا فَلْيَتَبَوَّاْ مَقْعَدَهُ مِنَ النَّارِ﴾
حديثنى ايشيدن و نقل ايدن؛ هيچ ممكن ميدر كه، حفظندهكى أحاديثِ نبويهنڭ قيمتنى و صحّتنى شبههيه دوشوروب، أهلِ صفّهنڭ تكذيبنه هدف ايدهجك مخالف بر سوز و أصلسز بر وقعه سويلهسين؟ حاشا...
يا ربّ! شو رسولِ أكرم عليه الصلاة والسلامڭ بركتى حرمتنه، بزه إحسان ايتديگڭ مادّى و معنوى رزقمزه بركت إحسان ايت!..
بر نكتۀ مهمّه: معلومدر كه؛ ضعيف شيلر إجتماع ايتدكجه قوّتلشير. اينجهجك ايپلر طوپاق ياپيلسه، قوّتلى خلاط اولور. قوّتلى خلاطلر طوپاق ياپيلسه، كيمسه قوپاراماز. ايشته اون بش أنواعِ معجزاتدن يالڭز بركت قسمندهكى معجزاتى و او قسمڭ اون بش قسمندن آنجق بر قسمنى، اون بش مثال ايله گوستردك. هر بر مثال، تك باشيله، نبوّتى إثبات ايدر بر درجهده قوّتلى ايدى. فرضِ محال اولارق، بونلرڭ بر قسمنى قوّتسز صايسهق ده، ينه قوّتسز دييهمهيز. چونكه قوى ايله إتّفاق ايدن قويلشير.
هم شو اون بش مثالڭ إجتماعى؛ قطعى شبههسز بر تواترِ معنوى ايله، قوّتلى بر معجزۀِ كبرايى گوسترر. شيمدى شو مجموعدهكى معجزۀِ كبرا، بركت معجزهلرندن ذكر ايديلمهمش اولان اون درت قسمِ آخَره مزج ايديلسه؛ قوّتلى خلاطلرى طوپاق ياپمق گبى، قوپاريلمسى ممكن اولميان بر معجزۀِ أكبر، ايچنده گورونور. صوڭره شو معجزۀِ أكبرى، سائر اون درت نوع معجزاتڭ مجموعنه علاوه ايت، گور كه: نه درجه قوّتلى، صارصيلماز، قطعى بر برهانِ نبوّتِ أحمديهيى (عصم) گوسترر. ايشته نبوّتِ أحمديهنڭ (عصم) ديرگى، شو مجموعدن تشكّل ايدن طاغ گبى قوّتلى بر ديركدر. شيمدى جزئياتده و مثاللرده، سوءِ فهمدن گلن شبههلرله، او متين سقفِ معلاّيى ثباتسز و قابلِ سقوط گورمك نه درجه عقلسزلق اولديغنى آڭلادڭ. أوت بركته دائر او معجزهلر گوسترييورلر كه: محمّدِ عربى عليه الصلاة والسلام، عمومه رزق ويرن و رزقلرى خلق ايدن بر ذاتِ رحيم و كريمڭ سَوْگيلى مأموريدر، پك حرمتلى بر عبديدر كه؛ رزقڭ أنواعنده، خلافِ عادت اولارق، اوڭا هيچدن و صِرف غيبدن ضيافتلر گوندرييور. معلومدر كه: جزيرة العرب، صويى و زراعتى آز بر يردر. اونڭ ايچون أهاليسى، خصوصًا بدايتِ إسلامدهكى صحابهلر، ضيقِ معيشته معروضديلر. هم صوسزلغه چوق دفعه گرفتار اولويورلردى. ايشته بو حكمته بناءً، معجزاتِ باهرۀِ أحمديه عليه الصلاة والسلامڭ مهملرى، طعام و صو خصوصنده تظاهر ايتمش. بو خارقهلر دعواىِ نبوّته دليل و معجزه اولمقدن زياده، إحتياجه بناءً رسولِ أكرم عليه الصلاة والسلامه بر إكرامِ إلٰهى، بر إحسانِ ربّانى، بر ضيافتِ رحمانيه حكمندهدر. چونكه او معجزاتى گورنلر، نبوّتى تصديق ايتمشلر. فقط معجزه ظهور ايتدكجه، ايمان زيادهلشير، «نُورٌ عَلٰى نُور» اولور.
سكزنجى إشارت:
صو خصوصنده تظاهر ايدن بر قسم معجزاتى بيان ايدر.
مقدّمه: معلومدر كه جماعتلر ايچنده وقوع بولان حادثهلر آحادى بر صورتده نقل ايديلسه، تكذيب ايديلمديگى وقت، طوغريلغنى گوسترر. چونكه إنسانڭ فطرتنده يالانه يالاندر ديمگه جبلّى بر مَيل واردر. خصوصًا هر قَومدن زياده يالانه قارشى سكوت ايتمز صحابهلر اولسه.. خصوصًا حادثهلر، رسولِ أكرم عليه الصلاة والسلامه تعلّق ايتسه و بِالخاصّه نقل ايدن، مشاهيرِ صحابهدن اولسه؛ ألبته او خبرِ واحد صاحبى، او حادثهيى گورن جماعتى تمثيل ايدر حكمنده روايت ايدر. حالبوكه شيمدى بحث ايدهجگمز معجزاتِ مائيهيى، هر بر مثالى چوق طريقلرله، چوق صحابهلرڭ أللرندن، بيڭلر تابعينڭ محقّقلرى أل آتوب آلمشلر؛ صاغلام اولارق ايكنجى عصر مجتهدلرينڭ أللرينه ويرمشلر. اونلر ده، كمالِ جدّيتله و حرمتله أل آتوب، قبول ايدوب، آرقهلرندهكى عصرڭ محقّقلرينڭ أللرينه ويرمشلر. هر طبقه، بيڭلر قوّتلى أللردن گچوب، گله گله تا عصريمزه گلمش. هم عصرِ سعادتده يازيلان كتبِ أحاديثيه صاغلام اولارق دور ايديلوب، تا بخارى و مسلم گبى علمِ حديثڭ داهى إماملرينڭ ألنه گچمش. اونلر ده، كمالِ تحقيق ايله مراتبنى تفريق ايدهرك، صحّتى شبههسز اولانلرى جمع ايدهرك بزه درس ويرمشلر، تقديم ايتمشلر.
﴿جَزَاهُمُ اللّٰهُ خَيْرًا كَثٖيرًا﴾
ايشته رسولِ أكرم عليه الصلاة والسلامڭ مبارك پارمقلرندن صويڭ آقماسى و پك چوق آدمه ايچيرمسى متواتردر. اويله بر جماعت نقل ايتمش كه، يالانه إتّفاقلرى محالدر. شو معجزه غايت قطعيدر. هم اوچ دفعه، اوچ مجمعِ عظيمده تكرّر ايتمش. باشده بخارى، مسلم، إمامِ مالك، إمامِ شعيب، إمامِ قتاده گبى پك چوق أهلِ صحيح بر جماعت، صحابهلردن، باشده خادمِ نبوى حضرتِ أنس، حضرتِ جابر، حضرتِ ابن مسعود گبى مشاهيرِ صحابهنڭ بر جماعتندن، پارمقلرندن صويڭ كثرتله آقماسى و اوردويه ايچيرمسى نقلِ صحيحِ قطعى ايله بيان ايديلمشدر. بو نوع معجزۀِ مائيهدن، پك چوق مثاللرندن طوقوز مثالى بيان ايدهجگز.
برنجى مثال: باشده بخارى، مسلم، كتبِ صحيحه حضرتِ أنسدن نقلِ صحيح ايله خبر ويرييورلر كه: حضرتِ أنس دييور: زَوْرا نام محلده، اوچ يوز كيشى قدر، رسولِ أكرم عليه الصلاة والسلام ايله برابردك. ايكندى نمازى ايچون آبدست آلمايى أمر ايتدى. صو بولونمادى. يالڭز بر پارچه صو أمر ايتدى، گتيردك. مبارك أللرينى ايچنه باتيردى. گوردم كه، پارمقلرندن چشمه گبى صو آقييور. صوڭره بتون معيتندهكى اوچ يوز آدم گلديلر، عمومى آبدست آلوب ايچديلر. ايشته شو مثالى حضرتِ أنس، اوچ يوز كيشىيى تمثيل ايدهرك خبر ويرييور. ممكن ميدر كه، او اوچ يوز كيشى، شو خبره معنًا إشتراك ايتمهسينلر؛ هم إشتراك ايتمدكلرى حالده، تكذيب ايتمهسينلر.
ايكنجى مثال: باشده بخارى، مسلم، كتبِ صحيحه خبر ويرييورلر كه: حضرتِ جابر ابن عبد اللّٰه الأنصارى بيان ايدييور: بز بيڭ بش يوز كيشى، غزوۀِ حديبيهده صوصادق. رسولِ أكرم عليه الصلاة والسلام قربه دينيلن دريدن بر قاب صودن آبدست آلدى، صوڭره ألنى ايچنه صوقدى. گوردم كه، پارمقلرندن چشمه گبى صو آقييور. بيڭ بش يوز كيشى ايچوب، قابلرينى او قربهدن طولديرديلر. سالم ابن أبى الجعد، جابردن صورمش: «قاچ كيشى ايديڭز؟» جابر ديمش كه: «يوز بيڭ كيشى ده اولسيدى، ينه كافى گليردى. فقط بز، اون بش يوز (يعنى بيڭ بش يوز) ايدك.» ايشته شو معجزۀِ باهرهنڭ راويلرى، معنًا بيڭ بش يوز قدردرلر. چونكه فطرتِ بشريهده، يالانه يالان ديمك بر مَيلِ آرزوسى واردر. صحابهلر ايسه صدق و طوغريلق ايچون، جان و مال و پدر و والدهلرينى و قوم و قبيلهلرينى فدا ايدوب، صدق و حق ايچون فدائى اولدقلرى حالده؛ هم «بندن بيلهرك يالان بر شى خبر ويرن، جهنّم آتشندن يرينى حاضرلاسين!» مئالندهكى حديثِ شريفڭ تهديدينه قارشى، يالانه مقابل سكوت ايتمهلرى ممكن دگلدر. مادام سكوت ايتديلر؛ او خبرى قبول ايتديلر، معنًا إشتراك ايدوب تصديق ايدييورلر ديمكدر.
اوچنجى مثال: غزوۀ بواطده، ينه بخارى، مسلم باشده، كتبِ صحيحه بيان ايدييورلر كه: حضرتِ جابر ديدى كه: رسولِ أكرم عليه الصلاة والسلام فرمان ايتدى:
﴿نَادِ بِالْوُضُوءِ﴾
«آبدست آلمق ايچون ندا ايت» ديديلر. «صو يوق» دينيلدى. رسولِ أكرم عليه الصلاة والسلام ديدى: «بر پارچه صو بولڭز.» غايت آز صو گتيردك. صوڭره او آز صو اوستنه ألنى قپادى، بر شيلر اوقودى؛ بيلمهدم نه ايدى. صوڭره فرمان ايتدى:
﴿رِدْنَا بِجَفْنَةِ الرَّكْبِ﴾
يعنى، قافلهنڭ بيوك تشتنى (تكنه) گتير. بڭا گتيريلدى؛ بن ده رسولِ أكرم عليه الصلاة والسلامڭ اوڭنه قويدم. او ده ألنى ايچنه قويدى، پارمقلرينى آچدى. بن ده او آز صويى، مبارك ألى اوزرينه دوكويوردم. گوردم كه، مبارك پارمقلرندن كثرتله صو آقدى؛ صوڭره تشت طولدى. صويه محتاج اولانلرى چاغيردم؛ بتون گلديلر، او صودن آبدست آلوب ايچديلر. بن ديدم: «داها كيمسه قالمادى.» ألنى قالديردى، او جفنه (يعنى تكنه) لَبالَب طولو قالدى.
ايشته شو معجزۀِ باهرۀِ أحمديه (عصم) معنًا متواتردر. چونكه حضرتِ جابر او ايشده باشده اولديغى ايچون، برنجى سوز اونڭ حقّيدر. او، عمومڭ نامنه إعلان ايدييور. چونكه او وقت خدمت ايدن او ذات ايدى؛ إعلان، باشده اونڭ حقّيدر. ابن مسعود ده، عينًا روايتنده دييور كه: بن گوردم كه: رسولِ أكرم عليه الصلاة والسلامڭ پارمقلرندن چشمه گبى صو آقييور. عجبا مشاهيرِ صدّيقينِ صحابهدن اولان أنس، جابر، ابن مسعود گبى بر جماعت ديسه: «بن گوردم.» گورمهمسى ممكن ميدر؟ شيمدى شو اوچ مثالى برلشدير، نه قدر قوّتلى بر معجزۀِ باهره اولديغنى گور و شو اوچ طريق برلشسه، حقيقى تواتر حكمنده پارمقلرندن صو آقماسنى قطعى إثبات ايدر.
حضرتِ موسى عليه السلامڭ طاشدن اون ايكى يرده چشمه گبى صو آقيتماسى، رسولِ أكرم عليه الصلاة والسلامڭ اون پارمغندن اون موصلق صويڭ آقماسنڭ درجهسنه چيقاماز. چونكه طاشدن صو آقماسى ممكندر، عاديات ايچنده نظيرى بولونور. فقط أت و كميكدن آبِ كوثر گبى صويڭ كثرتله آقماسنڭ نظيرى، عاديات ايچنده يوقدر.
دردنجى مثال: باشده إمامِ مالك، مُوَطَّأْ كتابِ معتبرنده، معاذ ابن جبل گبى مشاهيرِ صحابهدن خبر ويرييور كه: حضرتِ معاذ ابن جبل ديدى كه: غزوۀِ تبوكده بر چشمهيه راست گلدك، سيجيم قالينلغنده گوچ ايله آقييوردى. رسولِ أكرم عليه الصلاة والسلام أمر ايتدى كه: «بر پارچه او صويى طوپلايڭز.» آووجلرنده بر پارچه طوپلاديلر. رسولِ أكرم عليه الصلاة والسلام، اونڭله ألنى يوزينى ييقادى؛ صويى چشمهيه قويدق. بردن چشمهنڭ منفذى آچيلوب، كثرتله آقدى؛ بتون اوردويه كافى گلدى. حتّى بر راوى اولان إمام ابن إسحٰق دير كه: گوك گورولتيسى گبى، طوپراق آلتنده او چشمهنڭ صويى گورولتى ياپارق اويله آقدى. رسولِ أكرم عليه الصلاة والسلام، حضرتِ معاذه فرمان ايتدى كه:
﴿يُوشِكُ يَا مُعَاذُ اِنْ طَالَتْ بِكَ حَيَاةٌ اَنْ تَرٰى مَا هٰهُنَا قَدْ مُلِئَ جِنَانًا﴾
يعنى: بو أثرِ معجزه اولان مبارك صو دوام ايدوب، بورالرى باغه چويرهجك؛ عمرڭ وارسه گورهجكسڭ. و اويله اولمشدر.
بشنجى مثال: باشده بخارى حضرتِ براءدن و مسلم حضرتِ سلمة ابنِ أكوَعدن و سائر كتبِ صحيحه باشقه راويلردن متّفقًا خبر ويرييورلر كه: غزوۀِ حديبيهده بر قويويه راست گلدك. بز بڭ درت يوز كيشى ايدك. او قويونڭ صويى، أللى كيشىيى آنجق إداره ايدردى. بز صويى چكدك، ايچنده بر شى بيرقمدق. رسولِ أكرم عليه الصلاة والسلام گلدى، قويونڭ باشنه اوطوردى، بر قوغه صو ايستدى؛ گتيردك. قوغهنڭ ايچنه مبارك آغزينڭ صوينى بيراقدى و دعا ايتدى، صوڭره او قوغهيى قويويه دوكدى. بردن قويو جوشدى و قاينادى؛ آغزينه قدر طولدى. بتون اوردو، كنديلرى و حيواناتى طويونجيه قدر ايچديلر، قابلرينى ده طولديرديلر.
آلتنجى مثال: ينه مسلم و ابن جريرِ طبرى گبى حديثڭ داهى إماملرى باشده اولارق، كتبِ صحيحه نقلِ صحيح ايله مشهور أبى قتادهدن خبر ويرييورلر كه: أبى قتاده دييور: موته غزوۀِ مشهورهسنده، رئيسلرڭ شهادتلرى اوزرينه إمداده گيدييوردق. بنده بر قربه واردى. رسولِ أكرم عليه الصلاة والسلام بڭا فرمان ايتدى:
﴿اِحْفَظْ عَلَىَّ مٖيضَئَتَكَ فَسَيَكُونُ لَهَا نَبَاٌ عَظٖيمٌ﴾
يعنى: «قربهڭى صاقلا، اونڭ بيوك ايشى وار.» صوڭره صوسزلق باشلادى. يتمش ايكى كيشى ايدك، (طبرينڭ نقلنه گوره، اوچ يوز ايدك) صوسز قالدق. رسولِ أكرم عليه الصلاة والسلام ديدى: «قربهڭى گتير.» بن گتيردم. او ده آلدى، آغزينى آغزينه گتيردى، ايچنه نَفَس ايتدى ايتمدى بيلمم؛ صوڭره يتمش ايكى كيشى گلديلر، ايچديلر، قابلرينى طولديرديلر. صوڭره بن آلدم، ويرديگم گبى قالمشدى.
ايشته شو معجزۀ باهرۀ أحمديهيى (عصم) گور،
(اَللّٰهُمَّ صَلِّ وَسَلِّمْ عَلَيْهِ وَعَلٰى اٰلِهٖ بِعَدَدِ قَطَرَاتِ الْمَاءِ) دى.
يدنجى مثال: باشده بخارى و مسلم اولارق كتبِ صحيحه، حضرتِ عمران ابن حُصَينْدن خبر ويرييورلر كه: عمران دير: بر سفرده، رسولِ أكرم عليه الصلاة والسلام ايله برابر صوسز قالدق. بڭا و علىيه فرمان ايتدى كه: «فلان موقعده بر قادين، ايكى قربه صويى حيوانه يوكلتمش گيدييور؛ آلوب بورايه گتيريڭز.» بن و على برابر گيتدك، عين يرده قادينى، صو يوكى ايله بولدق، گتيردك. صوڭره أمر ايتدى: «بر قابه بر پارچه صو بوشالتڭز.» بوشالتدق. بركتله دعا ايتدى. صوڭره ينه صويى، او حيواندهكى قربهيه قويدق. فرمان ايتدى كه: «هركس گلسين، قابنى طولديرسون.» بتون قافله گلدى، قابلرينى طولديرديلر، ايچديلر. صوڭره فرمان ايتدى: «قادينه بر شيلر طوپلايڭز.» قادينڭ أتگنى طولديرديلر. عمران دييور كه: بن تخيّل ايدييوردم كه، گيتدكجه ايكى قربه طولويور، داها زيادهلشيور. رسولِ أكرم عليه الصلاة والسلام او قادينه فرمان ايتدى كه:
﴿اِذْهَبٖى فَاِنَّا لَمْ نَاْخُذْ مِنْ مَائِكِ شَيْئًا وَلٰكِنَّ اللّٰهَ سَقٰينَا﴾
يعنى: سنڭ صويڭدن آلمادق، بلكه جنابِ حق بزه خزينهسندن صو ايچيردى.
سكزنجى مثال: باشده مشهور ابن خزيمه صحيحنده، راويلر حضرتِ عُمَردن نقل ايدييورلر كه: غزوۀِ تبوكده صوسز قالدق. حتّى بعضلر دوهسنى كسر، صوسزلقدن ايچنى صيقار، ايچردى. أبو بكر الصدّيق، رسولِ أكرم عليه الصلاة والسلامه دعا ايتمك ايچون رجا ايتدى. رسولِ أكرم عليه الصلاة والسلام ألنى قالديردى؛ داها ألنى اينديرمهدن بلوط طوپلاندى؛ ياغمور اويله گلدى كه، قابلريمزى طولديردق. صوڭره صو چكيلدى، اوردومزه مخصوص اولارق حدوديمزى تجاوز ايتمدى. ديمك تصادف ايچنه قاريشمامش، صِرف بر معجزۀِ أحمديهدر. (عصم)
طوقوزنجى مثال: مشهور عبد اللّٰه ابن عَمْرو ابن العاصڭ حفيدى و درت إمامڭ اوڭا إعتماد ايدوب و اوندن تخريجِ حديث ايتدكلرى عَمْرو ابن شعَيبدن نقلِ صحيح ايله خبر ويرييورلر كه، ديمش: نبوّتدن أوّل، رسولِ أكرم عليه الصلاة والسلام عموجهسى أبو طالب ايله دوهيه بينوب عرفه جوارنده ذى المجاز نام موقعه گلدكلرى وقت أبو طالب ديمش: «بن صوصادم.» رسولِ أكرم عليه الصلاة والسلام اينمش، يره آياغنى وورمش، صو چيقمش؛ أبو طالب ايچمشدر. محقّقيندن بريسى ديمش كه: شو حادثه نبوّتدن أوّل اولديغندن، إرهاصات قبيلندن اولمقله برابر، بيڭ سنه صوڭره عين يرده عرفات چشمهسى چيقماسى، او حادثهيه بناءً بر كرامتِ أحمديه (عصم) صاييلابيلير.
ايشته شو طوقوز مثاللر گبى، طقسان مثال اولماسه ده، بلكه طقسان صورتده روايتلر؛ معجزاتِ مائيهيى خبر ويرمشلر. باشدهكى يدى مثال، معنوى تواتر گبى قطعى و قوّتليدرلر. آخردهكى ايكى مثال، چندان او درجه طريقلرى قوّتلى و متعدّد دگل، راويلرى چوق دگللر. فقط سكزنجى مثالده، حضرتِ عُمَردن روايت اولونان معجزۀ سحابيهيى تأييد و تقويه ايدن ايكنجى بر معجزۀ سحابيه:
باشده إمامِ بيهقى و حاكم اولارق، كتبِ صحيحه، حضرتِ عُمَردن خبر ويرييورلر كه: حضرتِ عُمَر، رسولِ أكرم عليه الصلاة والسلامدن ياغمور دعاسنى نياز ايتدى. چونكه اوردو صويه محتاجدى. رسولِ أكرم عليه الصلاة والسلام ألنى قالديردى، بردن بلوط طوپلاندى، ياغمور گلدى. اوردونڭ إحتياجى قدر صو ويردى، گيتدى. عادتا يالڭز اوردويه صو ويرمك ايچون مأمور ايدى. گلدى، إحتياجه گوره ويردى گيتدى.
شو حادثه، ناصلكه سكزنجى مثالى تأييد و قطعى إثبات ايدر؛ اويله ده: شو حادثهده، مشهور علاّمهلردن و تصحيحده چوق مشكلپسند، حتّى چوق صحيحلره موضوع دييوب قبول ايتمهين ابن جوزى گبى بر محقّق دير كه: شو حادثه غزوۀِ مشهورۀِ بدرده وقوع بولمش.
﴿َيُنَزِّلُ عَلَيْكُمْ مِنَ السَّمَٓاءِ مَٓاءً لِيُطَهِّرَكُمْ بِهٖ﴾
آيتِ كريمهسى، او حادثهيى بيان ايدوب، إفاده ايدر. مادام آيت او حادثهيى گوسترر؛ قطعيتنده شبهه قالماز.
هم دعاءِ نبوى ايله، بردن و سرعتله و داها ألنى اينديرمهدن ياغمورڭ گلمهسى، چوق تكرّر ايتمش، تك باشيله بر معجزۀِ متواترهدر. بعض دفعه جامعده، منبر اوستنده ألنى قالديرمش، داها اينديرمهدن ياغمش؛ تواتر ايله نقل ايديلمش.