بشنجى نكتهلى إشارت:
امورِ غيبيهيه دائر حديثلرڭ بر قاچ مثالنى ذكر ايدرز:
رسولِ أكرم عليه الصلاة والسلام، نقلِ صحيح ايله و متواتر بر درجهده بزه واصل اولمش كه؛ منبر اوستنده، جماعتِ صحابه ايچنده فرمان ايتمش كه:
﴿اِبْنٖى حَسَنٌ هٰذَا سَيِّدٌ سَيُصْلِحُ اللّٰهُ بِهٖ بَيْنَ فِئَتَيْنِ عَظٖيمَتَيْن﴾
ايشته قرق سنه صوڭره إسلامڭ أڭ بيوك ايكى اوردوسى قارشى قارشىيه گلديگى وقت، حضرتِ حسن (رض)، حضرتِ معاويه (رض) ايله مصالحه ايدوب، جدِّ أمجدينڭ معجزۀ غيبيهسنى تصديق ايتمشدر.
ايكنجيسى: نقلِ صحيح ايله حضرتِ علىيه ديمش:
﴿سَتُقَاتِلُ النَّاكِثٖينَ وَالْقَاسِطٖينَ وَالْمَارِقٖينَ﴾
هم وقعۀ جمل، هم وقعۀ صفّين، هم وقعۀ خوارج حادثهلرينى خبر ويرمش.
هم حضرتِ على (رض) حضرتِ زبير ايله سَويشديگى بر زمان ديدى: «بو سڭا قارشى محاربه ايدهجك، فقط حقسزدر.»
هم أزواجِ طاهراتنه ديمش: «ايچڭزده بريسى، مهمّ بر فتنهنڭ باشنه گچهجك و أطرافنده چوقلر قتل ايديلهجك. (وَتَنْبَحُ عَلَيْهَا كِلَابُ الْحَوْئَبِ)»
ايشته شو صحيح، قطعى حديثلر؛ اوتوز سنه صوڭره حضرتِ علىنڭ حضرتِ عائشه و زبير و طلحهيه قارشى وقعۀِ جملده.. و معاويهيه قارشى صفّينده.. و خوارجه قارشى حَرَوْراده و نهروانده محاربهسى، او إخبارِ غيبيهنڭ بر تصديقِ فعليسيدر.
هم حضرتِ علىيه: «سنڭ صقالڭى سنڭ باشڭڭ قانيله ايصلاتديرهجق بر آدمى» إخبار ايتمش. حضرتِ على او آدمى طانيرمش؛ او ده عبد الرحمن ابن مُلجم الخارجيدر.
هم خارجيلرڭ ايچنده ذو الثّديه دينيلن بر آدمى، غريب بر نشانله علامت اولارق خبر ويرمشدر كه؛ خوارجلرڭ مقتوللرى ايچنده او آدم بولونمش؛ حضرتِ على، اونى حقّانيتنه حجّت گوسترمش. هم معجزۀِ نبويهيى إعلان ايتمش.
هم رسولِ أكرم عليه الصلاة والسلام؛ اُمُّ سلمهنڭ، داها ديگرلرڭ روايتِ صحيحى ايله خبر ويرمش كه: «حضرتِ حسين، طفّ يعنى كربلاده قتل ايديلهجكدر.» أللى سنه صوڭره، عين وقعۀِ جگرسوز وقوعه گلوب، او إخبارِ غيبىيى تصديق ايتمش.
هم مكرّرًا إخبار ايتمش كه: «بنم آلِ بيتم، بندن صوڭره
﴿يَلْقَوْنَ قَتْلًا وَتَشْرٖيدًا﴾
يعنى؛ قتله و بلايه و نفيه معروض قالاجقلر.» و بر درجه ايضاح ايتمش، عينًا اويله چيقمشدر.
شو مقامده بر مهمّ سؤال واردر كه؛ دينيلير كه:
«حضرتِ على، او درجه خلافته لياقتى اولديغى و رسولِ أكرم عليه الصلاة والسلامه قرابتى و خارق العاده جسارت و علمى ايله برابر، نهدن خلافتده تقدّم ايتديريلمهدى و نهدن اونڭ خلافتى زماننده إسلام چوق كشماكشه مظهر اولدى؟»
الجواب: آلِ بيتدن بر قطبِ أعظم ديمش كه: «رسولِ أكرم عليه الصلاة والسلام، حضرتِ علىنڭ (رض) خلافتنى آرزو ايتمش، فقط غائبدن اوڭا بيلديريلمش كه: مرادِ إلٰهى باشقهدر. او ده، آرزوسنى بيراقوب، مرادِ إلٰهىيه تابع اولمش.» مرادِ إلٰهينڭ حكمتلرندن بريسى شو اولمق گركدر كه:
وفاتِ نبويدن صوڭره، أڭ زياده إتّفاق و إتّحاده گلمگه محتاج اولان صحابهلر؛ أگر حضرتِ على باشه گچسه ايدى، حضرتِ علىنڭ خلافتى زماننده ظهوره گلن حادثاتڭ شهادتيله و حضرتِ علىنڭ مماشاتسز، پرواسز، زاهدانه، قهرمانانه، مستغنيانه طورى و شهرتگيرِ عالم شجاعتى إعتباريله، چوق ذاتلرده و قبيلهلرده رقابت طمارينى حركته گتيروب، تفرقهيه سبب اولمق قويًا محتملدى.
هم حضرتِ علىنڭ خلافتنڭ تأخّر ايتمهسنڭ بر سرّى ده شودر كه: غايت مختلف أقوامڭ بربرينه قاريشمهسيله، پيغمبر عليه الصلاة والسلامڭ خبر ويرديگى گبى، صوڭره إنكشاف ايدن يتمش اوچ فرقه أفكارينڭ أساسلرينى طاشييان او أقوام ايچنده، فتنهأنگيز حادثاتڭ ظهورى زماننده، حضرتِ على گبى خارق العاده بر جسارت و فراست صاحبى، هاشمى و آلِ بيت گبى قوّتلى، حرمتلى بر قوّت لازم ايدى كه، طايانهبيلسين. أوت طاياندى... رسولِ أكرم عليه الصلاة والسلامڭ خبر ويرديگى گبى: «بن قرآنڭ تنزيلى ايچون حرب ايتدم، سن ده تأويلى ايچون حرب ايدهجكسڭ!»
هم أگر حضرتِ على اولماسه ايدى، دنيا سلطنتى، ملوكِ أمويهيى بتون بتون يولدن چيقارمق محتملدى. حالبوكه قارشيلرنده حضرتِ على و آلِ بيتى گوردكلرى ايچون، اونلره قارشى موازنهيه گلمك و أهلِ إسلام نظرنده موقعلرينى محافظه ايتمك ايچون ايستر ايستهمز أمويه دولتى رئيسلرينڭ عمومى، كنديلرى اولماسه ده، هر حالده تشويق و تصويبلريله أتباعلرى و طرفدارلرى، بتون قوّتلريله حقائقِ إسلاميهيى و حقائقِ ايمانيهيى و أحكامِ قرآنيهيى محافظهيه و نشره چاليشديلر. يوز بيڭلرله مجتهدينِ محقّقين و محدّثينِ كاملين و أوليالر و أصفيالر يتيشديرديلر. أگر قارشيلرنده آلِ بيتڭ غايت قوّتلى ولايت و ديانت و كمالاتى اولماسه ايدى، عبّاسيلرڭ و أمويلرڭ آخرلرندهكى گبى، بتون بتون چيغيردن چيقمق قويًا محتملدى.
أگر دينيلسه: نهدن خلافتِ إسلاميه آلِ بيتِ نبويده تقرّر ايتمدى؟ حالبوكه أڭ زياده لايق و مستحق اونلردى.
الجواب: سلطنتِ دنيويه آلداتيجيدر. آلِ بيت ايسه، حقائقِ إسلاميهيى و أحكامِ قرآنيهيى محافظهيه مأمور ايديلر. خلافت و سلطنته گچن، يا نبى گبى معصوم اولمالى، وياخود خلفاىِ راشدين و عُمَر ابن عبد العزيزِ أموى و مهدئِ عبّاسى گبى خارق العاده بر زهدِ قلبى اولمالى كه آلدانماسين. حالبوكه مصرده آلِ بيت نامنه تشكّل ايدن دولتِ فاطميه خلافتى و آفريقاده موحّدين حكومتى و ايرانده صفويلر دولتى گوسترييور كه؛ سلطنتِ دنيويه آلِ بيته ياراماز، وظيفۀِ أصليهسى اولان حفظِ دينى و خدمتِ إسلاميتى اونلره اونوتديرر. حالبوكه سلطنتى ترك ايتدكلرى زمان، پارلاق و يوكسك بر صورتده إسلاميته و قرآنه خدمت ايتمشلر.
ايشته باق! حضرتِ حسنڭ نسلندن گلن أقطابلر، خصوصًا أقطابِ أربعه و بِالخاصّه غوثِ أعظم اولان شيخ عبد القادرِ گيلانى و حضرتِ حسينڭ نسلندن گلن إماملر، خصوصًا زين العابدين و جعفرِ صادق كه، هر برى برر معنوى مهدى حكمنه گچمش، معنوى ظلمى و ظلماتى طاغيتوب، أنوارِ قرآنيهيى و حقائقِ ايمانيهيى نشر ايتمشلر. جدِّ أمجدلرينڭ برر وارثى اولدقلرينى گوسترمشلر.
أگر دينيلسه: مبارك إسلاميت و نورانى عصرِ سعادتڭ باشنه گلن او دهشتلى قانلى فتنهنڭ حكمتى و وجهِ رحمتى نهدر؟ چونكه اونلر، قهره لايق دگل ايديلر؟
الجواب: ناصلكه بهارده دهشتلى ياغمورلى بر فورطنه، هر طائفۀِ نباتاتڭ، تخملرڭ، آغاجلرڭ إستعدادلرينى تحريك ايدر، إنكشاف ايتديرر؛ هر برى كندينه مخصوص چيچك آچار؛ فطرى برر وظيفه باشنه گچر.
اويله ده: صحابه و تابعينڭ باشنه گلن فتنه دخى، چكردكلر حكمندهكى مختلف آيرى آيرى إستعدادلرى تحريك ايدوب قامچيلادى؛ «إسلاميت تهلكهدهدر، يانغين وار!» دييه هر طائفهيى قورقوتدى، إسلاميتڭ حفظنه قوشديردى. هر برى، كندى إستعدادينه گوره جامعۀِ إسلاميتڭ كثرتلى و مختلف وظيفهلرندن بر وظيفهيى اوموزينه آلدى، كمالِ جدّيتله چاليشدى. بر قسمى حديثلرڭ محافظهسنه، بر قسمى شريعتڭ محافظهسنه، بر قسمى حقائقِ ايمانيهنڭ محافظهسنه، بر قسمى قرآنڭ محافظهسنه چاليشدى و هكذا.. هر بر طائفه بر خدمته گيردى. وظائفِ إسلاميتده حُمّالى بر صورتده سعى ايتديلر. مختلف رنكلرده چوق چيچكلر آچيلدى. پك گنيش اولان عالمِ إسلاميتڭ أقطارينه، او فورطنه ايله تخملر آتيلدى؛ يارى يرى گلستانه چويردى. فقط مع التأسّف او گللر و گلستان ايچنده أهلِ بدعه فرقهلرينڭ تيكنلرى دخى چيقدى.
گويا دستِ قدرت، جلال ايله او عصرى چالقالادى، شدّتله تحريك ايدوب چويردى، أهلِ همّتى غيرته گتيروب ألكتريقلنديردى. او حركتدن گلن بر قوّۀِ عَنِ المركزيه ايله پك چوق منوّر مجتهدلرى و نورانى محدّثلرى، قدسى حافظلرى، أصفيالرى، أقطابلرى عالمِ إسلامڭ أقطارينه اوچوردى، هجرت ايتديردى. شرقدن غربه قدر أهلِ إسلامى هيجانه گتيروب، قرآنڭ خزينهلرندن إستفاده ايچون گوزلرينى آچديردى... شيمدى صدده گلييورز.
رسولِ أكرم عليه الصلاة والسلامڭ، امورِ غيبيهدن خبر ويرديگى گبى طوغرى وقوعه گلن ايشلر بيڭلردر، پك چوقدر. بز يالڭز جزئى بر قاچ مثالنه إشارت ايدهجگز:
ايشته باشده بخارى و مسلم، صحّتله مشهور كتبِ ستّۀِ حديثيه صاحبلرى، بيان ايدهجگمز خبرلرڭ چوغنده متّفق و او خبرلرڭ چوغى معنًا متواتر و بر قسمى دخى، أهلِ تحقيق اونلرڭ صحّتنه إتّفاق ايتمهسيله، متواتر گبى قطعى دينيلهبيلير.
ايشته (نقلِ صحيحِ قطعى ايله) أصحابنه خبر ويرمش كه: «سز عموم دشمنلريڭزه غلبه ايدهجكسڭز؛ هم فتحِ مكّه، هم فتحِ خيبر، هم فتحِ شام، هم فتحِ عراق، هم فتحِ ايران، هم فتحِ بيت المقدسه موفّق اولاجقسڭز. هم او زمانڭ أڭ بيوك دولتلرى اولان ايران و روم پادشاهلرينڭ خزينهلرينى بيْنڭزده تقسيم ايدهجكسڭز!..» خبر ويرمش، هم «تخمينم بويله ويا ظن ايدرم» ديمهمش. بلكه گورور گبى قطعى إخبار ايتمش، خبر ويرديگى گبى چيقمش. حالبوكه خبر ويرديگى وقت، هجرته مجبور اولمش. صحابهلرى آز، مدينه أطرافى و بتون دنيا دشمندى.
هم (نقلِ صحيحِ قطعى ايله) چوق دفعه فرمان ايتمش:
﴿عَلَيْكُمْ بِسٖيرَةِ الَّذَيْنِ مِنْ بَعْدٖى اَبٖى بَكْرٍ وَعُمَرَ﴾
دييوب، أبو بكر و عُمَر كندندن صوڭرهيه قالاجقلر، هم خليفه اولاجقلر، هم مكمّل بر صورتده و رضاءِ إلٰهى و مرضئِ نبوى دائرهسنده حركت ايدهجكلر. هم أبو بكر آز قالاجق، عُمَر چوق قالاجق و پك چوق فتوحات ياپاجق.
هم فرمان ايتمش كه:
﴿زُوِيَتْ لِىَ الْاَرْضُ فَاُرٖيتُ مَشَارِقَهَا وَمَغَارِبَهَا وَسَيَبْلُغُ مُلْكُ اُمَّتٖى مَا زُوِىَ لٖى مِنْهَا﴾
دييوب: «شرقدن غربه قدر بنم اُمّتمڭ ألنه گچهجكدر. هيچ بر اُمّت، او قدر ملك ضبط ايتمهمش.» خبر ويرديگى گبى چيقمش.
هم (نقلِ صحيحِ قطعى ايله) غزاءِ بدردن أوّل فرمان ايتمش:
﴿هٰذَا مَصْرَعُ اَبٖى جَهْلٍ، هٰذَا مَصْرَعُ عُتْبَةَ، هٰذَا مَصْرَعُ اُمَيَّةَ، هٰذَا مَصْرَعُ فُلَانٍ وَفُلَانٍ﴾
دييوب، مشرك قُريش رئيسلرينڭ هر برى نرهده قتل ايديلهجگنى گوسترمش و ديمش: «بن كندى ألمله اُبَى ابن خَلَفى ئولديرهجگم.» خبر ويرديگى گبى چيقمش.
هم (نقلِ صحيحِ قطعى ايله) بر آى اوزاق مسافهده شام أطرافنده، موته نام موقعدهكى غزوۀ مشهورهده محاربه ايدن صحابهلرينى گورور گبى فرمان ايتمش:
﴿اَخَذَ الرَّايَةَ زَيْدٌ فَاُصٖيبَ، ثُمَّ اَخَذَهَا اِبْنُ رَوَاحَةَ فَاُصٖيبَ، ثُمَّ اَخَذَهَا جَعْفَرُ فَاُصٖيبَ، ثُمَّ اَخَذَهَا سَيْفٌ مِنْ سُيُوفِ اللّٰهِ﴾
دييوب، برر برر حادثاتى أصحابنه خبر ويرمش. ايكى اوچ هفته صوڭره يعلى ابن مُنَبِّهْ ميدانِ حربدن گلدى؛ داها سويلهمدن مخبرِ صادق (عصم) حربڭ تفصيلاتنى بيان ايتدى. يعلى قَسَم ايتدى: «ديديگڭ گبى عينًا اويله اولدى.»
هم (نقلِ صحيحِ قطعى ايله) فرمان ايتمش:
﴿اِنَّ الْخِلَافَةَ بَعْدٖى ثَلَاثُونَ سَنَةً ثُمَّ تَكُونُ مُلْكًا عَضُوضًا وَاِنَّ هٰذَا الْاَمْرَ بَدَاَ نُبُوَّةً وَرَحْمَةً ثُمَّ يَكُونُ رَحْمَةً وَخِلَافَةً ثُمَّ يَكُونُ مُلْكًا عَضُوضًا ثُمَّ يَكُونُ عُتُوًّا وَجَبَرُوتًا﴾
دييوب، حضرتِ حسنڭ آلتى آى خلافتيله؛ جهارِ يارِ گزينڭ (خلفاىِ راشدينڭ) زمانِ خلافتلرينى و اونلردن صوڭره سلطنت شكلنه گيرمسنى، صوڭره او سلطنتدن جبروت و فسادِ اُمّت اولاجغنى خبر ويرمش. خبر ويرديگى گبى چيقمش.
هم (نقلِ صحيحِ قطعى ايله) فرمان ايتمش:
﴿يُقْتَلُ عُثْمَانُ وَهُوَ يَقْرَاُ الْمُصْحَفَ وَاِنَّ اللّٰهَ عَسٰى اَنْ يُلْبِسَهُ قَمٖيصًا وَاِنَّهُمْ يُرٖيدُونَ خَلْعَهُ﴾
دييوب، حضرتِ عثمان خليفه اولاجغنى و خلعى ايستهنيلهجگنى و مظلوم اولارق قرآن اوقوركن قتل ايديلهجگنى خبر ويرمش. خبر ويرديگى گبى چيقمش.
هم (نقلِ صحيحِ قطعى ايله) حجامت ايدوب مبارك قاننى عبد اللّٰه ابن زبير تبرّكًا شربت گبى ايچديگى زمان فرمان ايتمش:
﴿وَيْلٌ لِلنَّاسِ مِنْكَ وَوَيْلٌ لَكَ مِنَ النَّاسِ﴾
دييوب، خارقه بر شجاعتله اُمّتڭ باشنه گچهجگنى و مدهش هجوملره معروض قالاجقلرينى و إنسانلر اونڭ يوزندن دهشتلى حادثهلره گرفتار اولاجقلرينى خبر ويرمش. خبر ويرديگى گبى چيقمش. عبد اللّٰه ابن زبير، أمويلر زماننده خلافتى مكّهده إعلان ايدهرك قهرمانانه چوق مصادمه ايتمش؛ نهايت حَجّاجِ ظالم بيوك بر اوردو ايله اوزرينه هجوم ايدهرك، شدّتلى مصادمهدن صوڭره او قهرمانِ عاليشان شهيد ايديلمش.
هم (نقلِ صحيحِ قطعى ايله) أمويه دولتنڭ ظهورينى و اونلرڭ پادشاهلرينڭ چوغى ظالم اولاجغنى و ايچلرنده يزيد و وليد بولونهجغنى و حضرتِ معاويه اُمّتڭ باشنه گچهجگنى،
﴿وَ اِذَا مَلَكْتَ فَاَسْجِحْ﴾
فرمانيله، رفق و عدالتى توصيه ايتمش. و أمويهدن صوڭره
﴿يَخْرُجُ وَلَدُ الْعَبَّاسِ بِالرَّايَاتِ السُّودِ وَيَمْلِكُونَ اَضْعَافَ مَا مَلَكُوا﴾
دييوب، دولتِ عبّاسيهنڭ ظهورينى و اوزون مدّت دوام ايدهجگنى خبر ويرمش. خبر ويرديگى گبى چيقمش.
هم (نقلِ صحيحِ قطعى ايله) فرمان ايتمش:
﴿وَيْلٌ لِلْعَرَبِ مِنْ شَرٍّ قَدِ اقْتَرَبَ﴾
دييوب، جنگيز و هلاكونڭ دهشتلى فتنهلرينى و عرب دولتِ عبّاسيهسنى محو ايدهجكلرينى خبر ويرمش. خبر ويرديگى گبى چيقمش.
هم (نقلِ صحيحِ قطعى ايله) سعد ابن أبى وقّاص غايت آغير خسته ايكن اوڭا فرمان ايتمش:
﴿لَعَلَّكَ تُخَلَّفُ حَتّٰى يَنْتَفِعَ بِكَ اَقْوَامٌ وَيَسْتَضِرَّ بِكَ اٰخَرُونَ﴾
دييوب، ايلريده بيوك بر قوماندان اولاجغنى، چوق فتوحات ياپاجغنى، چوق ملّتلر و قَوملر اوندن منفعت گوروب، يعنى إسلام اولوب و چوقلر ضرر گورهجك، يعنى دولتلرى اونڭ أليله خراب اولاجغنى خبر ويرمش. خبر ويرديگى گبى چيقمش. حضرتِ سعد اوردوىِ إسلام باشنه گچدى، دولتِ ايرانيهيى زير و زبر ايتدى؛ چوق قَوملرڭ دائرۀ إسلامه و هدايته گيرمهلرينه سبب اولدى.
هم (نقلِ صحيحِ قطعى ايله) ايمانه گلن حبش مَلِكى اولان نجاشى، هجرتڭ يدنجى سنهسنده وفات ايتديگى گون أصحابنه خبر ويرمش، حتّى جنازه نمازينى قيلمش. بر هفته صوڭره جواب گلدى كه، عين گونده وفات ايتمش.
هم (نقلِ صحيحِ قطعى ايله) جهارِ يارِ گزين ايله برابر اُحُد ويا حراء طاغنڭ باشنده ايكن طاغ تيترهدى، زلزلهلندى. طاغه فرمان ايتدى كه:
﴿اُثْبُتْ فَاِنَّمَا عَلَيْكَ نَبِىٌّ وَصِدّٖيقٌ وَشَهٖيدٌ﴾
دييوب، حضرتِ عُمَر و عثمان و علىنڭ شهيد اولاجقلرينى خبر ويرمش. خبر ويرديگى گبى چيقمش.
شيمدى أى بدبخت، قلبسز، بيچاره آدم! محمّدِ عربى عقللى بر آدم ايدى دييه او شمسِ حقيقته قارشى گوزينى يومان بيچاره إنسان! اون بش أنواعِ كلّيۀِ معجزاتندن بر تك نوعى اولان امورِ غيبيهدن اون بش و بلكه يوز قسمندن بر قسمنى ايشيتدڭ. معنوى تواتر درجهسنده قطعى بر قسمنى طويدڭ. شو إخبارِ غيب قسمنڭ يوزدن بريسنى عقل گوزيله گورن بر ذاته «داهئِ أعظم» دينيلير كه، فراستيله إستقبالى كشف ايدييور. بناءً عليه سنڭ گبى هايدى دها ديسهك؛ يوز داهئِ أعظم درجهسنده بر دهاىِ قدسيهيى طاشييان بر آدم ياڭليش گورور مى؟ ياڭليش خبر ويرمگه تنزّل ايدر مى؟ بويله يوز درجه بر دهاىِ أعظم صاحبنڭ سعادتِ داريْنه دائر سوزلرينى ديڭلهمهمك، ألبته يوز درجه ديوانهلگڭ علامتيدر.
آلتنجى نكتهلى إشارت:
(نقلِ صحيحِ قطعى ايله) حضرتِ فاطمهيه (رض) فرمان ايتمش كه:
﴿اَنْتِ اَوَّلُ اَهْلِ بَيْتٖى لُحُوقًا بٖى﴾
دييوب، «آلِ بيتمدن هركسدن أوّل وفات ايدوب، بڭا إلتحاق ايدهجكسڭ.» دييه سويلهمش. آلتى آى صوڭره، خبر ويرديگى گبى عينًا ظهور ايتمش.
هم أبا ذره فرمان ايتمش:
﴿سَتُخْرَجُ مِنْ هُنَا وَتَعٖيشُ وَحْدَكَ وَتَمُوتُ وَحْدَكَ﴾
دييوب، مدينهدن نفى ايديلوب، يالڭز حيات گچيروب، يالڭز بر صحراده وفات ايدهجگنى خبر ويرمش. يگرمى سنه صوڭره خبر ويرديگى گبى چيقمش.
هم أنس ابن مالكڭ خالهسى اولان اُمُّ حرامڭ خانهسنده اويقودن قالقمش، تبسّم ايدوب فرمان ايتمش:
﴿رَاَيْتُ اُمَّتٖى يَغْزُونَ فِى الْبَحْرِ كَالْمُلُوكِ عَلَى الْاَسِرَّةِ﴾
اُمُّ حرام نياز ايتمش: «دعا ايديڭز، بن ده اونلرله برابر اولايم.» فرمان ايتمش: «برابر اولاجقسڭ.» قرق سنه صوڭره، زوجى اولان عباده ابن صامت رفاقتيله قبريسڭ فتحنه گيتمش؛ قبريسده وفات ايدوب، مزارى زيارتگاه اولمش. خبر ويرديگى گبى عينًا ظهور ايتمش.
هم (نقلِ صحيحِ قطعى ايله) فرمان ايتمش كه:
﴿يَخْرُجُ مِنْ ثَقٖيفَ كَذَّابٌ وَمُبٖيرٌ﴾
يعنى: «ثقيف قبيلهسندن برى دعواىِ نبوّت ايدهجك؛ و برى، خونخار ظالم ظهور ايدهجك.» دييوب، نبوّت دعوا ايدن مشهور مختارى و يوز بيڭ آدم ئولديرن حَجّاجِ ظالمى خبر ويرمش.
هم (نقلِ صحيحِ قطعى ايله)
﴿سَتُفْتَحُ الْقُسْطَنْطٖينِيَّةُ فَنِعْمَ الْاَمٖيرُ اَمٖيرُهَا وَنِعْمَ الْجَيْشُ جَيْشُهَا﴾
دييوب، إستانبولڭ إسلام أليله فتح اولاجغنى و حضرتِ سلطان محمد فاتحڭ يوكسك بر مرتبه صاحبى اولديغنى خبر ويرمش. خبر ويرديگى گبى ظهور ايتمش.
هم (نقلِ صحيحِ قطعى ايله) فرمان ايتمش كه:
﴿اِنَّ الدّٖينَ لَوْ كَانَ مَنُوطًا بِالثُّرَيَّا لَنَالَهُ رِجَالٌ مِنْ اَبْنَاءِ فَارِسَ﴾
دييوب، باشده أبو حنيفه اولارق ايرانڭ أمثالسز بر صورتده يتيشديرديگى علما و أوليايه إشارت ايدييور، خبر ويرييور.
هم فرمان ايتمش كه:
﴿عَالِمُ قُرَيْشٍ يَمْلَءُ طِبَاقَ الْاَرْضِ عِلْمًا﴾
دييوب، إمامِ شافعىيه إشارت ايدوب خبر ويرييور.
هم (نقلِ صحيحِ قطعى ايله) فرمان ايتمش كه:
﴿سَتَفْتَرِقُ اُمَّتٖى ثَلَاثًا وَسَبْعٖينَ فِرْقَةً اَلنَّاجِيَةُ وَاحِدَةٌ مِنْهَا.
قٖيلَ : مَنْ هُمْ؟ قَالَ : مَا اَنَا عَلَيْهِ وَاَصْحَابٖى﴾
دييوب، اُمّتى يتمش اوچ فرقهيه إنقسام ايدهجگنى و ايچنده فرقۀ ناجيۀ كامله، أهلِ سنّت و جماعت اولديغنى خبر ويرييور.
هم فرمان ايتمش كه:
﴿اَلْقَدَرِيَّةُ مَجُوسُ هٰذِهِ الْاُمَّةِ﴾
دييوب، چوق شُعْبهلره إنقسام ايدن و قدرى إنكار ايدن قدريه طائفهسنى خبر ويرمش. هم چوق شُعْبهلره إنقسام ايدن رافضيلرى خبر ويرمش.
هم (نقلِ صحيحِ قطعى ايله) إمامِ علىيه (رض) ديمش: سنده حضرتِ عيسى (عس) گبى ايكى قسم إنسان هلاكته گيدر. بريسى، إفراطِ محبّت؛ ديگرى، إفراطِ عداوتله. حضرتِ عيسىيه نصرانى محبّتندن حدِّ مشروعدن تجاوز ايله حاشا «ابنُ اللّٰه» ديديلر. يهودى، عداوتندن چوق تجاوز ايتديلر، نبوّتنى و كمالنى إنكار ايتديلر. سنڭ حقّڭده ده بر قسم، حدِّ مشروعدن تجاوز ايدهجك، محبّتڭدن هلاكته گيدهجكدر.
﴿لَهُمْ نَبْزٌ يُقَالُ لَهُمُ الرَّافِضِيَّةُ﴾
ديمش. بر قسمى، سنڭ عداوتڭدن چوق ايلرى گيدهجكلر، اونلر ده خوارجدر و أمويلرڭ مفرط بر قسم طرفدارلريدر كه، اونلره ناصبه دينيلير.
أگر دينيلسه: آلِ بيته محبّتى، قرآن أمر ايدييور. حضرتِ پيغمبر عليه الصلاة والسلام چوق تشويق ايتمش. او محبّت، شيعهلر ايچون بلكه بر عذر تشكيل ايدر. چونكه أهلِ محبّت، بر درجه أهلِ سكردر. نه ايچون شيعهلر خصوصًا رافضيلر، او محبّتدن إستفاده ايتمييورلر؛ بلكه إشارتِ نبويه ايله او فرطِ محبّتده محكومدرلر؟
الجواب: محبّت ايكى قسمدر.
برى: معناىِ حرفيله، يعنى: رسولِ أكرم عليه الصلاة والسلام حسابنه، جنابِ حق نامنه، حضرتِ على ايله حسن و حسين و آلِ بيتى سَوْمكدر. شو محبّت رسولِ أكرم عليه الصلاة والسلامڭ محبّتنى زيادهلشديرر. جنابِ حقّڭ محبّتنه وسيله اولور. شو محبّت مشروعدر، إفراطى ضرر ويرمز، تجاوز ايتمز، باشقهلرينڭ ذمّنى و عداوتنى إقتضا ايتمز.
ايكنجيسى: معناىِ إسميله محبّتدر. يعنى بِالذّات اونلرى سَور. حضرتِ پيغمبر عليه الصلاة والسلامى دوشونمهدن حضرتِ علىنڭ قهرمانلقلرينى و كمالنى و حضرتِ حسن و حسينڭ يوكسك فضيلتلرينى دوشونوب سَور. حتّى اللّٰهى بيلمسه ده، پيغمبرى طانيماسه ده ينه اونلرى سَور. بو سَوْمك، رسولِ أكرم عليه الصلاة والسلامڭ محبّتنه و جنابِ حقّڭ محبّتنه سببيت ويرمز؛ هم إفراط اولسه، باشقهلرڭ ذمّنى و عداوتنى إقتضا ايدر.
ايشته إشارتِ نبويه ايله، حضرتِ على حقّنده زياده محبّتلرندن، حضرتِ أبو بكر الصدّيق ايله حضرتِ عُمَردن تبرّى ايتدكلرندن خسارته دوشمشلر. و او منفى محبّت، سببِ خسارتدر.
هم (نقلِ صحيحِ قطعى ايله) فرمان ايتمش كه:
﴿اِذَا مَشَوُا الْمُطَيْطَاءَ وَخَدَمَتْهُمْ بَنَاتُ فَارِسَ وَالرُّومِ، رَدَّ اللّٰهُ بَاْسَهُمْ بَيْنَهُمْ وَسَلَّطَ شِرَارَهُمْ عَلٰى خِيَارِهِمْ﴾
دييوب، «نه وقت سزه فارس و روم قيزلرى خدمت ايتدى؛ او وقت بلاڭز، فتنهڭز ايچڭزه گيرهجك، حربڭز داخلى اولاجق؛ شريرلريڭز باشه گچوب، خيرليلر و اييلريڭزه مسلّط اولاجقلر!» خبر ويرمش. اوتوز سنه صوڭره خبر ويرديگى گبى چيقمش.
هم (نقلِ صحيحِ قطعى ايله) فرمان ايتمش كه:
﴿وَتُفْتَحُ خَيْبَرُ عَلٰى يَدَىْ عَلِىٍّ﴾
دييوب، «خيبر قلعهسنڭ فتحى، علىنڭ أليله اولاجق.» مأمولڭ پك فوقنده ايكنجى گون بر معجزۀِ نبويه اولارق خيبر قلعهسنڭ قپوسنى حضرتِ على چكوب قالقان گبى إستعمال ايدهرك، فتحه موفّق اولدقدن صوڭره قپويى يره آتمش؛ سكز قوّتلى آدم، او قپويى يردن قالديرهمامش؛ بر روايتده قرق آدم قالديرهمامش.
هم فرمان ايتمش كه:
﴿لَا تَقُومُ السَّاعَةُ حَتّٰى تَقْتَتِلَ فِئَتَانِ دَعْوَاهُمَا وَاحِدَةٌ﴾
دييه، صفّينده حضرتِ على ايله معاويهنڭ حربنى خبر ويرمش.
هم فرمان ايتمش كه:
﴿اِنَّ عَمَّارًا تَقْتُلُهُ الْفِئَةُ الْبَاغِيَةُ﴾
دييه، «باغى بر طائفه، عمّارى قتل ايدهجك.» صوڭره، صفّين حربنده قتل ايديلدى. حضرتِ على، اونى معاويهنڭ طرفدارلرى باغى اولدقلرينه حجّت گوستردى. فقط معاويه تأويل ايتدى. عَمرو ابن العاص ديدى: «باغى يالڭز اونڭ قاتللريدر، عموممز دگلز.»
هم فرمان ايتمش كه:
﴿اِنَّ الْفِتَنَ لَا تَظْهَرُ مَا دَامَ عُمَرُ حَيًّا﴾
دييه، «حضرتِ عُمَر صاغ قالدقجه، ايچڭزده فتنهلر ظهور ايتمز!» خبر ويرمش، اويله ده اولمش.
هم سهيل ابن عَمرو داها ايمانه گلمهدن أسير اولمش. حضرتِ عُمَر، رسولِ أكرم عليه الصلاة والسلامه ديمش كه: «إذن وير، بن بونڭ ديشلرينى چكهجگم. چونكه او فصاحتيله كفّارِ قُريشى حربمزه تشويق ايدييوردى.» رسولِ أكرم عليه الصلاة والسلام فرمان ايتمش كه:
﴿وَعَسٰى اَنْ يَقُومَ مَقَامًا يَسُرُّكَ يَا عُمَرُ﴾
دييه، رسولِ أكرم عليه الصلاة والسلامڭ وفاتى هنگامنده اولان دهشتأنگيز و صبرسوز حادثهده، حضرتِ أبو بكر الصدّيق ناصلكه مدينۀِ منوّرهده كمالِ متانتله هركسه تسلّى ويروب مهمّ بر خطبه ايله صحابهلرى تسكين ايتمش.. عينًا اونڭ گبى: شو سهيل او هنگامده، مكّۀِ مكرّمهده عين أبو بكر الصدّيق گبى صحابهيه تسكين و تسلّى ويروب، معلوم فصاحتيله أبو بكر الصدّيقڭ عين خطبهسنڭ مئالنده بر نطق سويلهمش. حتّى ايكى خطبهنڭ كلمهلرى بربرينه بڭزر.
هم سراقهيه فرمان ايتمش كه:
﴿كَيْفَ بِكَ اِذَا اُلْبِسْتَ سُوَارَىْ كِسْرٰى﴾
دييه، «كسرىنڭ ايكى بيلهزيگنى گيهجكسڭ!» حضرتِ عُمَر زماننده كسرى محو ايديلدى، زينتلرى و شاهانه بيلهزيكلرى گلدى؛ حضرتِ عُمَر سراقهيه گيديردى. ديدى:
﴿اَلْحَمْدُ لِلّٰهِ الَّذٖى سَلَبَهُمَا كِسْرٰى وَاَلْبَسَهُمَا سُرَاقَةَ﴾
إخبارِ نبوىيى تصديق ايتديردى.
هم فرمان ايتمش كه:
﴿اِذَا ذَهَبَ كِسْرٰى فَلَا كِسْرٰى بَعْدَهُ﴾
دييه، «كِسراىِ فارس گيتدكدن صوڭره، داها كسرى چيقميهجق!» خبر ويرمش، هم اويله اولمش.
هم كسرى ألچيسنه ديمش: «شيمدى كسرىنڭ اوغلى شيرويه پرويز، كسرىيى ئولديردى.» او ألچى تحقيق ايتمش، عين وقتده اويله اولمش؛ او ده إسلام اولمش. بعض أحاديثده، او ألچينڭ آدى فيروزدر.
هم (نقلِ صحيحِ قطعى ايله) حاطب ابن بَلتعهنڭ، گيزلى قُريشه گوندرديگى مكتوبى خبر ويرمش. حضرتِ على ايله مقدادى گوندرمش. «فلان موقعده بر شخصده شويله بر مكتوب وار. آليڭز، گتيريڭز!» گيتديلر، عين يردن عين مكتوبى گتيرديلر. حاطبى جلب ايتدى. «نهدن ياپدڭ؟» ديمش؛ او ده عذر بيان ايتمش، عذرينى قبول ايتمش.
هم (نقلِ صحيح ايله) عُتبه ابن أبى لهب حقّنده فرمان ايتمش كه:
﴿يَاْكُلُهُ كَلْبُ اللّٰهِ﴾
دييه، عُتبهنڭ عاقبتِ فجيعهسنى خبر ويرمش. صوڭره يمن طرفنه گيدركن بر آرسلان گلوب اونى يميش. پيغمبر عليه الصلاة والسلامڭ هم بددعاسنى، هم خبرينى تصديق ايتمش.
هم (نقلِ صحيح ايله) فتحِ مكّه وقتنده، حضرتِ بلالِ حبشى، كعبه طامنه چيقوب أذان اوقومش. رؤساىِ قُريشدن أبى سفيان، عتاب ابن أسيد و حارث ابن هشام اوطوروب قونوشديلر. عتاب ديدى: «پدرم أسيد بختيار ايدى كه، بوگونى گورمدى.» حارث ديدى كه: «محمّد، بو سياه قارغهدن باشقه آدم بولمادى مى كه مؤذّن ياپسين؟» حضرتِ بلالِ حبشىيى تزييف ايتدى. أبى سفيان ديدى: «بن قورقارم، بر شى ديميهجگم؛ كيمسه اولماسه ده شو بطحانڭ طاشلرى، اوڭا خبر ويرهجك، او بيلهجك.» حقيقةً بر پارچه صوڭره رسولِ أكرم عليه الصلاة والسلام اونلره راست گلدى، حرفيًا قونوشدقلرينى سويلهدى. او وقت عتاب ايله حارث شهادت گتيرديلر، مسلمان اولديلر.
ايشته أى بيچاره ملحد! پيغمبر عليه الصلاة والسلامى طانيميان قلبسز آدم! باق، قُريشڭ ايكى معنّد بيوكلرى، بر تك إخبارِ غيبى ايله ايمانه گلديلر. نه قدر قلبڭ بوزولمش كه؛ معنوى تواترله، بو إخبارِ غيبى گبى بيڭلر معجزاتى ايشيدييورسڭ، ينه قناعتِ تامّهڭ گلمييور!.. هر نه ايسه، صدده دونويورز.
هم (نقلِ صحيح ايله) غزوۀِ بدرده، حضرتِ عبّاس صحابهلرڭ ألنه أسير دوشديگى وقتده، فديۀِ نجات ايستهنيلمش. او ده ديمش: «پارهم يوق.» حضرتِ رسولِ أكرم عليه الصلاة والسلام فرمان ايتمش كه: «زوجهڭ اُمُّ فَضل ياننده بو قدر پارهيى فلان يره بيراقمشسڭ.» حضرتِ عبّاس تصديق ايدوب، «ايكيمزدن باشقه كيمسهنڭ بيلمديگى بر سرّ ايدى.» او وقت كمالِ ايمانى قزانوب إسلام اولمش.
هم (نقلِ صحيحِ قطعى ايله) مضر بر ساحر اولان لبيدِ يهودى؛ رسولِ أكرم عليه الصلاة والسلامى رنجيده ايتمك ايچون عجيب و مؤثّر بر سحر ياپمش. بر طراغه صاچلرى صارمش، اوستنده سحر ياپمش، بر قويويه آتمش. رسولِ أكرم عليه الصلاة والسلام، حضرتِ علىيه و صحابهلره فرمان ايتمش: «گيديڭز، فلان قويوده بو چشيد سحر آلَتلرينى بولوب گتيريڭز!» گيتمشلر، عينًا اويله بولوب گتيرمشلر. هر بر ايپى آچيلدقجه، رسولِ أكرم عليه الصلاة والسلام دخى راحتسزلغندن خفّت بولويوردى.
هم (نقلِ صحيح ايله) أبو هريره و حذيفه گبى مهمّ ذاتلر بولونديغى بر هيئتده، رسولِ أكرم عليه الصلاة والسلام فرمان ايتمش كه:
﴿ضِرْسُ اَحَدِكُمْ فِى النَّارِ اَعْظَمُ مِنْ اُحُدٍ﴾
دييه، برينڭ إرتداديله مدهش عاقبتنى خبر ويرمش. أبو هريره ديدى: «او هيئتدن، بن بر آدمله ايكيمز قالدق؛ بن قورقدم. صوڭره اوتهكى آدم، يمامه حربنده مسيلمه طرفنده بولونوب، مرتد اولارق قتل ايديلدى.» إخبارِ نبوينڭ حقيقتى چيقدى.
هم (نقلِ صحيح ايله) عمير و صفوان مسلمان اولمادن أوّل، مهمّ بر ماله مقابل، پيغمبرڭ (عصم) قتلنه قرار ويروب؛ عمير ايسه پيغمبرڭ (عصم) قتلنى نيّت ايدهرك مدينهيه گلمش. رسولِ أكرم عليه الصلاة والسلام عميرى گوردى، ياننه چاغيردى. ديدى: «صفوان ايله ماجراڭز بودر!» ألنى عميرڭ گوگسنه قويدى؛ عمير «أوت» ديدى، مسلمان اولدى.
داها بونلر گبى پك چوق صحيح إخباراتِ غيبيه وقوع بولمش. مشهور كتبِ ستّۀِ صحيحۀِ حديثيهده ذكر ايديلمشدر و سندلريله بيان ايديلمشدر. بو رسالهده بيان ايديلن واقعاتڭ أكثرى، تواترِ معنوى حكمنده قطعيدر، يقينيدرلر. باشده بخارى و مسلم كه، قرآندن صوڭره أڭ صحيح كتاب اولدقلرينى، أهلِ تحقيق قبول ايتمش. و سائر صحيحِ ترميذى، نسائى و أبو داود و مسندِ حاكم و مسندِ أحمد ابن حنبل و دلائلِ بيهقى گبى كتابلرده عنعنهسيله بيان ايديلمشدر.
شيمدى أى ملحدِ بىهوش! «محمّدِ عربى (عصم) عقللى بر آدم ايدى» دييوب گچمه. چونكه شو امورِ غيبيهيه دائر إخباراتِ صادقۀِ أحمديه (عصم) ايكى شقدن خالى دگل.
يا دييهجكسڭ كه: او ذاتِ قدسيده اويله كسكين بر نظر و گنيش بر دها وار كه، ماضى و مستقبلى و عموم دنيايى گورور، بيلير و أطرافِ عالمى و شرق و غربى تماشا ايدر بر گوزى و گچمش و گلهجك بتون زمانلرى كشف ايدر بر دهاسى واردر. بو حال ايسه، بشرده اولاماز؛ أگر اولسه، خالقِ عالم طرفندن ويريلمش بر خارقه، بر موهبه اولور. بو ايسه، تك باشيله بر معجزۀِ أعظمدر.
وياخود اينانهجقسڭ كه: او ذاتِ مبارك، اويله بر ذاتڭ مأمورى و شاكرديدر كه، هر شى اونڭ نظرنده و تصرّفندهدر و بتون أنواعِ كائنات و بتون زمانلر، اونڭ تحتِ أمرندهدر.. دفترِ كبيرنده هر شى يازيليدر؛ ايستديگى زمان طلبهسنه بيلديرر و گوسترر.
ديمك محمّدِ عربى عليه الصلاة والسلام، استادِ أزليسندن درس آلير، اويله درس ويرر...
هم (نقلِ صحيح ايله) حضرتِ خالدى، حرب ايچون دَوْمَةُ الجندل رئيسى اولان اُكَيدره گوندرديگى وقت فرمان ايتمش كه:
﴿اِنَّكَ تَجِدُهُ يَصٖيدُ الْبَقَرَ﴾
دييه، بقرِ وحشى آوونده بولاجغنى، غاوغاسز أسير ايديلهجگنى إخبار ايتمش. حضرتِ خالد گيتمش، عينًا اويله بولمش، أسير ايتمش گتيرمش.
هم (نقلِ صحيح ايله) قُريش، بنى هاشمى عليهنده يازدقلرى و كعبهنڭ سقفنه آصدقلرى صحيفه حقّنده فرمان ايتمش كه: «قوردلر يازيلريڭزى يميش، يالڭز صحيفهدهكى أسماءِ إلٰهيهيه ايليشمهمشلر!» خبر ويرمش. صوڭره صحيفهيه باقمشلر، عينًا اويله اولمش.
هم (نقلِ صحيح ايله) «بيت المقدسڭ فتحنده بيوك بر طاعون چيقهجق.» فرمان ايتمشدى. حضرتِ عُمَر زماننده بيت المقدس فتح اولندى. و اويله بر طاعون چيقدى كه، اوچ گونده يتمش بيڭ وفيات اولدى.
هم (نقلِ صحيح ايله) او زمانده وجودى اولميان بصره و بغدادڭ وجوده گلهجكلرينى و بغداده دنيا خزينهلرينڭ گيرهجگنى و توركلر و بحرِ حزر أطرافندهكى ملّتلر ايله عربلر محاربه ايدهجكلرينى و صوڭره اونلر چوقلقله إسلاميته گيرهجك، عربلره عربلر ايچنده حاكم اولاجقلرينى خبر ويرمش. ديمش كه:
﴿يُوشِكُ اَنْ يَكْثُرَ فٖيكُمُ الْعَجَمُ يَاْكُلُونَ فَيْئَكُمْ وَيَضْرِبُونَ رِقَابَكُمْ﴾
هم فرمان ايتمش كه:
﴿هَلَاكُ اُمَّتٖى عَلٰى يَدِ اُغَيْلِمَةٍ مِنْ قُرَيْشٍ﴾
دييه، أمويهنڭ يزيد و وليد گبى شرير رئيسلرينڭ فسادينى خبر ويرمش.
هم يمامه گبى بر قسم يرلرده، إرتداد وقوع بولاجغنى خبر ويرمش.
هم غزوۀ مشهورۀ خندقده فرمان ايتمش كه:
﴿اِنَّ قُرَيْشًا وَ الْاَحْزَابَ لاَ يَغْزُونِى اَبَدًا وَ اَنَا اَغْزُوهُمْ﴾
دييه، «بوندن صوڭره اونلر بڭا دگل، بلكه بن اونلره هجوم ايدهجگم!» خبر ويرمش، خبر ويرديگى گبى چيقمش.
هم (نقلِ صحيح ايله) وفاتندن بر ايكى آى أوّل فرمان ايتمش كه:
﴿اِنَّ عَبْدًا خُيِّرَ فَاخْتَارَ مَا عِنْدَ اللّٰهِ﴾
دييه، وفاتنى خبر ويرمش.
هم زيد ابن صُوَحَان حقّنده فرمان ايتمش كه:
﴿يَسْبِقُ عُضْوٌ مِنْهُ اِلَى الْجَنَّةِ﴾
زيددن أوّل، بر عضوى شهيد ايديلهجگنى خبر ويرمش. بر زمان صوڭره، نِهَاوندْ حربنده بر ألى كسيلمش. ديمك أڭ أوّل او أل شهيد اولوب، معنًا جنّته گيتمش.
ايشته بتون بحث ايتديگمز امورِ غيبيه، اون قسم أنواعِ معجزاتندن بر تك نوعيدر. او نوعڭ اون قسمندن بر قسمنى سويلهمدك. شيمدى بو قسمله برابر إعجازِ قرآنه دائر يگرمى بشنجى سوزده، غايت گنيش إخبارِ غيب نوعنڭ درت نوعنى إجمالاً بيان ايتمشز. ايشته بورادهكى نوعى ايله برابر، قرآنڭ لسانيله غيبدن خبر ويريلن او درت بيوك نوعى برابر دوشون. گور كه: نه قدر قطعى، شبههسز، پارلاق، قوّتلى، قوى بر برهانِ رسالتدر كه؛ بتون بتون قلبى، عقلى بوزولميان ألبته ايمان ايدهجك كه: ذاتِ أحمديه عليه الصلاة والسلام، خالقِ كلِّ شى و علاّم الغيوب اولان بر ذاتِ ذو الجلالڭ رسوليدر و اوندن خبر آلييور.