طوقوزنجى إشارت:
رسولِ أكرم عليه الصلاة والسلامڭ أنواعِ معجزاتندن بريسى ده، آغاجلرڭ إنسانلر گبى أمرينى ديڭلهمهلرى و يرندن قالقوب ياننه گلدكلريدر كه؛ شو معجزۀِ شجريه، مبارك پارمقلرندن صويڭ آقماسى گبى، معنًا متواتردر. متعدّد صورتلرى وار و چوق طريقلرله گلمشدر. أوت رسولِ أكرم عليه الصلاة والسلامڭ أمرى ايچون؛ آغاج، يرندن چيقوب ياننه گلمهسى، صريحًا متواتر دينيلهبيلير. چونكه مشاهيرِ صدّيقينِ صحابهدن حضرتِ على، حضرتِ ابن عبّاس، حضرتِ ابن مسعود، حضرتِ ابن عُمَر، حضرتِ يعلى ابن مُرَّه، حضرتِ جابر، حضرتِ أنس ابن مالك، حضرتِ بريده، حضرتِ اُسامه بن زيد و حضرتِ غيلان ابن سلمه گبى صحابهلر؛ هر برى قطعيت ايله، عين معجزۀِ شجريهيى خبر ويرمش. تابعينڭ يوزر إماملرى، مذكور صحابهلردن هر بر صحابهدن آيرى بر طريق ايله، او معجزۀِ شجريهيى نقل ايتمشلر. عادتا مضاعف تواتر صورتنده بزه نقل ايتمشلر. ايشته شو معجزۀ شجريه، هيچ بر شبهه قبول ايتمز بر تواترِ معنوئِ قطعى حكمندهدر.
شيمدى او معجزۀ كبرانڭ، تكرّر ايتديگى حالده، بر قاچ صحيح صورتلرينى، بر قاچ مثال ايله بيان ايدهجگز:
برنجى مثال: باشده إمامِ ماجه و دارمى و إمامِ بيهقى نقلِ صحيحله حضرتِ أنس ابن مالكدن و حضرتِ علىدن و بزّار و إمامِ بيهقى حضرتِ عُمَردن خبر ويرييورلر كه: اوچ صحابه ديمشلر: رسولِ أكرم عليه الصلاة والسلام، كفّارڭ تكذيبندن متأثّر اولارق محزون ايدى. ديدى:
﴿يَا رَبِّ اَرِنٖى اٰيَةً لَا اُبَالٖى مَنْ كَذَّبَنٖى بَعْدَهَا﴾
أنسڭ روايتنده، حضرتِ جبرائيل حاضر ايدى. وادى كنارنده بر آغاج واردى. حضرتِ جبرائيلڭ إعلاميله، رسولِ أكرم عليه الصلاة والسلام او آغاجى چاغيردى؛ تا ياننه گلدى. صوڭره گيت ديدى. تكرار گيتدى، يرينه يرلشدى.
ايكنجى مثال: علاّمۀِ مغرب قاضى عياض شفاءِ شريفده علوى بر سندله، طوغرى و صاغلام بر عنعنه ايله، حضرتِ عبد اللّٰه ابن عُمَردن خبر ويرييور كه: بر سفرده رسولِ أكرم عليه الصلاة والسلامڭ ياننه بر بدوى گلدى. فرمان ايتدى:
﴿اَيْنَ تُرٖيدُ؟﴾
«نرهيه گيدييورسڭ؟» بدوى ديدى: «أهلمه.» فرمان ايتدى:
﴿هَلْ لَكَ اِلٰى خَيْرٍ مِنْ ذٰلِكَ؟﴾
«اوندن داها ايى بر خير ايستهمييور ميسڭ؟» بدوى ديدى: «نهدر؟» فرمان ايتدى:
﴿اَنْ تَشْهَدَ اَنْ لَا اِلٰهَ اِلَّا اللّٰهُ وَحْدَهُ لَا شَرٖيكَ لَهُ وَاَنَّ مُحَمَّدًا عَبْدُهُ وَرَسُولُهُ﴾
بدوى ديدى: «بو شهادته شاهد نهدر؟» فرمان ايتدى:
﴿هٰذِهِ الشَّجَرَةُ السَّمُرَةُ﴾
«وادى كنارندهكى آغاج شاهد اولاجق.» ابن عُمَر دير كه: او آغاج يرندن صاللانهرق چيقدى، يرى شقّ ايتدى، گلدى؛ تا رسولِ أكرم عليه الصلاة والسلامڭ ياننه. اوچ دفعه، رسولِ أكرم عليه الصلاة والسلام، او آغاجى إستشهاد ايتدى. آغاج ده، صدقنه شهادت ايتدى. أمر ايتدى ينه يرينه گيدوب يرلشدى.
حضرتِ بريده ابن حصيب الأسلمى طريقنده، نقلِ صحيح ايله بريده ديدى كه: بز، رسولِ أكرم عليه الصلاة والسلامڭ ياننده ايكن، بر سفرده بر أعرابى گلدى. بر آيت، يعنى بر معجزه ايستدى. رسولِ أكرم عليه الصلاة والسلام فرمان ايتدى:
﴿قُلْ لِتِلْكَ الشَّجَرَةِ رَسُولُ اللّٰهِ يَدْعُوكِ﴾
بر آغاجه إشارت ايتدى؛ آغاج صاغه و صوله مَيل ايدهرك كوكلرينى يردن چيقاروب، حضورِ نبوىيه گلدى.
﴿اَلسَّلَامُ عَلَيْكَ يَا رَسُولَ اللّٰهِ﴾
ديدى. صوڭره أعرابى ديدى: «ينه يرينه گيتسين.» أمر ايتدى، يرينه گيتدى. أعرابى ديدى: «إذن وير، سڭا سجده ايدهيم.» ديدى: «إذن يوق كيمسهيه.» ديدى: «اويله ايسه، سنڭ ألڭى آياغڭى اوپهجگم.» إذن ويردى.
اوچنجى مثال: باشده صحيحِ مسلم، كتبِ صحيحه خبر ويرييورلر كه، جابر دييور: بز بر سفرده، رسولِ أكرم عليه الصلاة والسلام ايله برابردك. قضاىِ حاجت ايچون بر ير آرادى. ستّارهلى بر ير يوقدى. صوڭره گيتدى، ايكى آغاج ياننه. بر آغاجڭ دالنى طوتدى، چكدى. آغاج إطاعت ايدهرك برابر گيتدى، اوتهكى آغاجڭ ياننه گتيردى. مطيع دوهنڭ يولارينى طوتوب چكيلدكده گلديگى گبى، او ايكى آغاجى او صورتله يان يانه گتيردى. صوڭره ديدى:
﴿اِلْتَئِمَا عَلَىَّ بِاِذْنِ اللّٰهِ﴾
يعنى: «اوستمه برلشڭز.» ديدى. ايكيسى برلشهرك ستّاره اولديلر. آرقهلرنده قضاىِ حاجت ايتدكدن صوڭره اونلره أمر ايتدى، يرلرينه گيتديلر.
ايكنجى بر روايتده، ينه حضرتِ جابر دير كه: بڭا أمر ايتدى كه:
﴿يَا جَابِرُ قُلْ لِهٰذِهِ الشَّجَرَةِ يَقُولُ لَكِ رَسُولُ اللّٰهِ: اِلْحَقٖى بِصَاحِبَتِكِ حَتّٰى اَجْلِسَ خَلْفَكُمَا﴾
يعنى: «او آغاجلره دى: رسول اللّٰهڭ حاجتى ايچون برلشڭز.» بن اويله ديدم، اونلر ده برلشديلر. صوڭره بن بكلركن، رسولِ أكرم عليه الصلاة والسلام چيقهگلدى. باشيله صاغه صوله إشارت ايتدى، او ايكى آغاج يرلرينه گيتديلر.
دردنجى مثال: نقلِ صحيح ايله، رسولِ أكرم عليه الصلاة والسلامڭ جسور قوماندانلرندن و خدمتكارلرندن اولان اُسامه بن زيد دير كه: بر سفرده، رسولِ أكرم عليه الصلاة والسلام ايله برابردك. قضاىِ حاجت ايچون خالى، ستّارهلى بر ير بولونمييوردى. فرمان ايتدى كه:
﴿هَلْ تَرٰى مِنْ نَخْلٍ اَوْ حِجَارَةٍ﴾
ديدم: أوت، وار. أمر ايتدى و ديدى:
﴿اِنْطَلِقْ وَقُلْ لَهُنَّ اِنَّ رَسُولَ اللّٰهِ يَاْمُرُكُنَّ اَنْ تَاْتٖينَ لِمَخْرَجِ رَسُولِ اللّٰهِ وَقُلْ لِلْحِجَارَةِ مِثْلَ ذٰلِكَ﴾
يعنى آغاجلره دى كه: «رسول اللّٰهڭ حاجتى ايچون برلشڭز» و طاشلره ده دى: «ديوار گبى طوپلانڭز.» بن گيتدم، سويلهدم. قَسَم ايدييورم كه، آغاجلر برلشديلر و طاشلر ديوار اولديلر. رسولِ أكرم عليه الصلاة والسلام، حاجتندن صوڭره ينه أمر ايتدى:
﴿قُلْ لَهُنَّ يَفْتَرِقْنَ﴾
بنم نفسم قبضۀ قدرتنده اولان ذاتِ ذو الجلاله قَسَم ايدرم، آغاجلر و طاشلر آيريلوب يرلرينه گيتديلر.
شو حضرتِ جابر و أسامهنڭ بيان ايتديگى ايكى حادثهيى، عينًا يعلى ابن مُرَّه و غيلان ابن سلمة الثَقَفِى و حضرتِ ابن مسعود، غزوۀ حنينده عينًا خبر ويرييورلر.
بشنجى مثال: إمام ابن فورك كه، كمالِ إجتهاد و فضلندن كنايه اولارق شافعىِّ ثانى عنواننى آلان علاّمۀِ عصر، قطعى خبر ويرييور كه: غزوۀِ طائفده، رسولِ أكرم عليه الصلاة والسلام گيجه آت اوستنده گيدركن اويقوسى گلييوردى. او حالده ايكن، بر سِدْره آغاجنه راست گلدى. آغاج اوڭا يول ويروب، آتنى اينجيتمهمك ايچون، ايكى شقّ اولدى. رسولِ أكرم عليه الصلاة والسلام، حيوان ايله ايچندن گچدى. تا زمانمزه قدر او آغاج، ايكى آياق اوستنده، محترم بر وضعيتده قالدى.
آلتنجى مثال: حضرتِ يعلى طريقنده (نقلِ صحيح ايله) خبر ويرييور كه: بر سفرده، طلحه ويا سَمُره دينيلن بر آغاج گلدى، رسولِ أكرم عليه الصلاة والسلامڭ أطرافنده طواف ايدر گبى دوندى. صوڭره ينه يرينه گيتدى. رسولِ أكرم عليه الصلاة والسلام فرمان ايتدى كه:
﴿اِنَّهَا اِسْتَاْذَنَتْ اَنْ تُسَلِّمَ عَلَىَّ﴾
يعنى: او آغاج، جنابِ حقدن ايستدى كه، بڭا سلام ايتسين.
يدنجى مثال: محدّثلر نقلِ صحيح ايله ابن مسعوددن بيان ايدييورلر كه: ابن مسعود ديدى: بطنِ نخل دينيلن نام موقعده، نصيبين أجنّيلرى إهتدا ايچون رسولِ أكرم عليه الصلاة والسلامه گلدكلرى وقت، بر آغاج او أجنّيلرڭ گلدكلرينى خبر ويردى. هم إمامِ مجاهد، او حديثده ابن مسعوددن نقل ايدر كه: او جنّيلر بر دليل ايستديلر. رسولِ أكرم عليه الصلاة والسلام بر آغاجه أمر ايتدى؛ يرندن چيقوب گلدى، صوڭره ينه يرينه گيتدى. ايشته جنّ طائفهسنه بر تك معجزه كافى گلدى. عجبا بو معجزه گبى بيڭ معجزات ايشيدن بر إنسان ايمانه گلمزسه، جنّيلرڭ
﴿يَقُولُ سَفٖيهُنَا عَلَى اللّٰهِ شَطَطًا﴾
تعبير ايتدكلرى شيطانلردن داها شيطان اولماز مى؟
سكزنجى مثال: صحيحِ ترميذى نقلِ صحيح ايله حضرتِ ابن عبّاسدن خبر ويرييورلر كه: ابن عبّاس ديدى كه: رسولِ أكرم عليه الصلاة والسلام بر أعرابىيه فرمان ايتدى:
﴿اَرَاَيْتَ اِنْ دَعَوْتُ هٰذَا الْعِذْقَ مِنْ هٰذِهِ النَّخْلَةِ اَتَشْهَدُ اَنّٖى رَسُولُ اللّٰهِ؟﴾
«بن، بو آغاجڭ شو دالنى چاغيرسهم، يانمه گلسه، ايمان ايدهجك ميسڭ؟» «أوت» ديدى. رسولِ أكرم عليه الصلاة والسلام چاغيردى. او عرجون، آغاجنڭ باشندن قوپوب، رسولِ أكرم عليه الصلاة والسلامڭ ياننه آتلادى، گلدى. صوڭره أمر ايتدى، ينه يرينه گيتدى.
ايشته بو سكز مثال گبى چوق مثاللر وار؛ چوق طريقلرله نقل ايديلمشلر. معلومدر كه؛ يدى سكز اورغان طوپلانسه، قوّتلى بر خلاط اولور. بناءً عليه شو أڭ مشهور صدّيقينِ صحابهدن، بويله متعدّد طريقلرله إخبار ايديلن شو معجزۀِ شجريه، ألبته تواترِ معنوى قوّتندهدر؛ بلكه تواترِ حقيقيدر. ذاتًا صحابهدن صوڭره تابعينڭ ألنه گچديگى وقت، تواتر صورتنى آلير. خصوصًا بخارى، مسلم، ابن حبّان، ترميذى گبى كتبِ صحيحه؛ تا زمانِ صحابهيه قدر، او يولى او قدر صاغلام ياپمشلر و طوتمشلر كه، مثلا بخاريده گورمك، عين صحابهدن ايشيتمك گبيدر.
عجبا او رسولِ أكرم عليه الصلاة والسلامه آغاجلر، (مثاللرده گورونديگى گبى) اونى طانييوب، رسالتنى تصديق ايدوب، اوڭا سلام ايدهرك زيارت ايدوب، أمرلرينى ديڭلهيهرك إطاعت ايتديگى حالده، كنديلرينه إنسان ديين بر قسم جامد، عقلسز مخلوقلر؛ اونى طانيمازسه، ايمان ايتمزسه، قورو آغاجدن چوق أدنا، اودون پارچهسى گبى أهمّيتسز، قيمتسز اولارق آتشه لايق اولماز مى؟
اوننجى إشارت:
شو معجزۀِ شجريهيى داها زياده تقويه ايدن متواتر بر صورتده نقل ايديلن، حَنِينُ الْجذع معجزهسيدر. أوت مسجدِ شريفِ نبويده قورو ديرگڭ بيوك بر جماعت ايچنده، موقّةً فراقِ أحمديدن (عصم) آغلامهسى؛ بيان ايتديگمز معجزۀِ شجريهنڭ مثاللرينى هم تأييد ايدر، هم قوّت ويرر. چونكه او ده آغاجدر، جنسى بردر. فقط شونڭ شخصى متواتردر، اوتهكى قسملر هر برينڭ نوعى متواتردر. جزئياتلرى، مثاللرى چوغى صريح تواتر درجهسنه چيقمييور. أوت مسجدِ شريفده خرما آغاجندن اولان قورو ديرك، رسولِ أكرم عليه الصلاة والسلام خطبه اوقوركن اوڭا طايانييوردى. صوڭره منبرِ شريف ياپيلديغى وقت، رسولِ أكرم عليه الصلاة والسلام منبره چيقوب خطبهيه باشلادى. اوقوركن، ديرك دوه گبى أنين ايدوب آغلادى؛ بتون جماعت ايشيتدى. تا رسولِ أكرم عليه الصلاة والسلام ياننه گلدى، ألنى اوستنه قويدى. اونڭله قونوشدى، تسلّى ويردى؛ صوڭره طوردى. شو معجزۀ أحمديه عليه الصلاة والسلام پك چوق طريقلرله، تواتر درجهسنده نقل ايديلمشدر.
أوت حَنِينُ الْجذع معجزهسى چوق منتشر و مشهور و حقيقى متواتردر. صحابهلرڭ بر جماعتِ عاليسندن، اون بش طريق ايله گلوب، تابعينڭ يوزر إماملرى او معجزهيى، او طريقلرله آرقهدهكى عصرلره خبر ويرمشلر. صحابهنڭ او جماعتندن علماءِ صحابه نامدارلرى و روايتِ حديثڭ رئيسلرندن حضرتِ أنس ابن مالك (خادمِ نبوى)، حضرتِ جابر بن عبد اللّٰه الأنصارى (خادمِ نبوى)، حضرتِ عبد اللّٰه ابن عُمَر، حضرتِ عبد اللّٰه بن عبّاس، حضرتِ سهل بن سعد، حضرتِ أبو سعيد الخدرى، حضرتِ اُبَى ابن الكعب، حضرتِ بريده، حضرتِ اُمُّ المؤمنين اُمُّ سلمه گبى مشاهيرِ علماءِ صحابه و روايتِ حديثڭ رؤسالرى گبى، هر برى بر طريقڭ باشنده، عين معجزهيى أمّته خبر ويرمشلر. باشده بخارى، مسلم، كتبِ صحيحه؛ آرقهلرندهكى عصرلره، او متواتر معجزۀِ كبرايى طريقلريله خبر ويرمشلر.
ايشته حضرتِ جابر طريقنده دير كه: رسولِ أكرم عليه الصلاة والسلام خطبه اوقوركن، مسجدِ شريفده (جِذْعُ النَّخْلِ) دينيلن قورو ديرگه طايانوب، اوقوردى. منبرِ شريف ياپيلدقدن صوڭره، منبره گچديگى وقت؛ ديرك تحمّل ايدهميهرك، حامله دوه گبى سس ويروب ايڭلهيهرك آغلادى. حضرتِ أنس طريقنده دير كه: جاموس گبى آغلادى، مسجدى لرزهيه گتيردى. سهل ابن سعد طريقنده دير: هم اونڭ آغلامهسى اوزرينه، خلقلرده آغلامق چوغالدى. حضرتِ اُبَى ابن الكعب طريقنده دييور: هم اويله آغلادى كه، إنشقاق ايتدى. ديگر بر طريقده، رسولِ أكرم عليه الصلاة والسلام فرمان ايتدى:
﴿اِنَّ هٰذَا بَكٰى لِمَا فَقَدَ مِنَ الذِّكْرِ﴾
يعنى: «اونڭ موقعنده اوقونان ذكر و خطبهدهكى ذكرِ إلٰهينڭ إفتراقندندر آغلامهسى.» ديگر بر طريقده فرمان ايتمش:
﴿لَوْ لَمْ اَلْتَزِمْهُ لَمْ يَزَلْ هٰكَذَا اِلٰى يَوْمِ الْقِيَامَةِ تَحَزُّنًا عَلٰى رَسُولِ اللّٰهِ﴾
يعنى: «بن اونى قوجاقلايوب تسلّى ويرمسه ايدم، رسول اللّٰهڭ إفتراقندن قيامته قدر بويله آغلامهسى دوام ايدهجكدى.» حضرتِ بريده طريقنده دير كه: جذع آغلادقدن صوڭره، رسولِ أكرم عليه الصلاة والسلام، ألنى اوستنه قويوب فرمان ايتدى:
﴿اِنْ شِئْتَ اَرُدُّكَ اِلَى الْحَائِطِ الَّذٖى كُنْتَ فٖيهِ تَنْبُتُ لَكَ عُرُوقُكَ وَيَكْمُلُ خَلْقُكَ وَيُجَدَّدُ خُوصُكَ وَثَمَرُكَ وَاِنْ شِئْتَ اَغْرِسُكَ فِى الْجَنَّةِ يَاْكُلُ اَوْلِيَاءُ اللّٰهِ مِنْ ثَمَرِكَ﴾
صوڭره، او جذعى ديڭلهدى نه سويلهيور؛ جذع سويلهدى، آرقهدهكى آدملر ده ايشيتدى:
﴿اِغْرِسْنٖى فِى الْجَنَّةِ يَاْكُلُ مِنّٖى اَوْلِيَاءُ اللّٰهِ فٖى مَكَانٍ لَا يَبْلٰى﴾
يعنى: «جنّتده بنى ديك كه؛ بنم ميوهلرمدن جنابِ حقّڭ سَوْگيلى قوللرى يسين. هم بر مكان كه، اوراده بقا بولوب، چورومك يوقدر.» رسولِ أكرم عليه الصلاة والسلام فرمان ايتدى:
﴿قَدْ فَعَلْتُ﴾
صوڭره فرمان ايتدى:
﴿اِخْتَارَ دَارَ الْبَقَاءِ عَلٰى دَارِ الْفَنَاءِ﴾
علمِ كلامڭ بيوك إماملرندن مشهور أبو إسحٰقِ إسفرانى نقل ايدييور كه: رسولِ أكرم عليه الصلاة والسلام ديرگڭ ياننه گيتمهدى؛ بلكه ديرك اونڭ أمريله، اونڭ ياننه گلدى. صوڭره أمر ايتدى، يرينه دوندى. حضرتِ اُبَى ابن كعب دير كه: شو حادثۀِ خارقهدن صوڭره رسولِ أكرم عليه الصلاة والسلام أمر ايتدى كه: «ديرك، منبرڭ آلتنه قونولسون.» منبرڭ آلتنه قونولدى، تا مسجدِ شريفڭ تعميرى ايچون هدم ايديلنجيه قدر. او وقت حضرتِ اُبَى ابن كعب ياننه آلدى، چوروينجهيه قدر محافظه ايديلدى.
مشهور حسنِ بصرى، شو حادثۀ معجزهيى شاكردلرينه درس ويرديگى وقت، آغلاردى و ديردى كه: «آغاج، رسولِ أكرم عليه الصلاة والسلامه مَيل و إشتياق گوسترييور.. سزلر داها زياده إشتياقه، مَيله مستحقسڭز.» بز ده ديرز كه: أوت هم اوڭا إشتياق و مَيل و محبّت، اونڭ سنّتِ سنيهسنه و شريعتِ غرّاسنه إتّباع ايلهدر.
بر نكتۀ مهمّه: أگر دينيلسه: نهدن غزوۀِ خندقده درت آووج طعامله بيڭ آدمى طويورمق اولان معجزۀِ طعاميه و مبارك پارمقلرندن آقان صو ايله، بيڭ بش يوز كيشىيه صويى طويورنجهيه قدر ايچيرن معجزۀِ مائيه، نهدن شو حنينِ جذع معجزهسى گبى شعشعه ايله چوق كثرتلى طريقلرله نقل ايديلمهمش؟ حالبوكه او ايكيسى، بوندن داها زياده بر جماعتده وقوع بولمش.
الجواب: ظهور ايدن معجزهلر، ايكى قسمدر. بر قسمى، نبوّتى تصديق ايتديرمك ايچون، حضرتِ پيغمبر عليه الصلاة والسلام ألنده إظهار ايديلييور. حنينِ جذع شو نوعدندر كه، صِرف نبوّتڭ تصديقى ايچون بر حجّت اولارق ظهوره گلمش كه؛ مؤمنلرڭ ايماننى زيادهلشديرمك و منافقلرى إخلاصه و ايمانه سَوق ايتمك و كفّارى ايمانه گتيرمك ايچون ظاهر اولمش. اونڭ ايچون عوام و خواص هركس اونى گوردى، اونڭ نشرينه فضله إهتمام ايديلدى. فقط شو معجزۀِ طعاميه و معجزۀِ مائيه ايسه، معجزهدن زياده بر كرامتدر، بلكه كرامتدن زياده بر إكرامدر، بلكه إكرامدن زياده إحتياجه بناءً بر ضيافتِ رحمانيهدر. اونڭ ايچون چندان دعواىِ نبوّته دليلدر و معجزهدر؛ فقط أصل مقصد: اوردو آج قالمش؛ بر چكردكدن بيڭ بطمان خرمايى خلق ايتديگى گبى، جنابِ حق خزينۀِ غيبدن بر صاع طعامدن، بيڭ آدمه ضيافت ويرييور. هم صوسز قالمش مجاهد بر اوردويه، قوماندانِ أعظمڭ پارمقلرندن، آبِ كوثر گبى صو آقيتديروب ايچيرييور. ايشته شو سرّ ايچوندر كه، معجزۀِ طعاميه و معجزۀِ مائيهنڭ هر بر مثالى، حنينِ جذع درجهسنه چيقمييور. فقط او ايكى معجزهنڭ جنسلرى و نوعلرى كلّيت إعتباريله، حنينِ جذع گبى متواتر و كثرتليدر. هم طعامڭ بركتنى و پارمقلرندن صويڭ آقماسنى هركس گورهمييور، يالڭز أثرلرينى گورويور. ديرگڭ آغلاماسنى ايسه هركس ايشيدييور. اونڭ ايچون فضله إنتشار ايتدى.
أگر دينيلسه: رسولِ أكرم عليه الصلاة والسلامڭ هر حال و حركتنى كمالِ إهتمام ايله صحابهلر محافظه ايدهرك نقل ايتمشلر. بويله معجزاتِ عظيمه، نهدن اون يگرمى طريق ايله گلييور؟ يوز طريق ايله گلمهلى ايدى. هم نهدن حضرتِ أنس، جابر، أبو هريرهدن چوق گلييور؛ حضرتِ أبو بكر و عُمَر آز روايت ايدييور؟
الجواب: برنجى شقّڭ جوابى: دردنجى إشارتڭ اوچنجى أساسنده گچمش. ايكنجى شقّڭ جوابى ايسه: ناصلكه إنسان، بر علاجه محتاج اولسه، بر طبيبه گيدر؛ هندسه ايچون مهندسه گيدر، مهندسدن نقل ايدر؛ مسئلۀِ شرعيه، مفتيدن خبر آلينير و هكذا... اويله ده، صحابه ايچنده أحاديثِ نبويهيى گلهجك عصرلره درس ويرمك ايچون، علماءِ صحابهدن بر قسم، اوڭا معنًا موظّف ايديلر. بتون قوّتلريله اوڭا چاليشييورلردى. أوت حضرتِ أبو هريره بتون حياتنى، حديثڭ حفظنه ويرمش؛ حضرتِ عُمَر، سياست عالميله و خلافتِ كبرا ايله مشغول ايمش. اونڭ ايچون، أحاديثى أمّته درس ويرمك ايچون، أبو هريره و أنس و جابر گبى ذاتلره إعتماد ايدوب؛ اوندن، روايتى آز ايدردى. هم مادام صدّيق، صدوق، صادق و مصدّق بر صحابهنڭ مشهور بر نامدارى، بر طريق ايله بر حادثهيى خبر ويرسه؛ يتر دينيلير، باشقهسنڭ نقلنه إحتياج ده قالماز. اونڭ ايچون بعض مهمّ حادثهلر، ايكى اوچ طريق ايله گلييور.
اون برنجى إشارت:
اوننجى إشارت، ناصلكه شجر طائفهسندهكى معجزۀِ نبويهيى گوستردى. اون برنجى إشارت دخى، جماداتده طاش و طاغ طائفهسنڭ معجزۀِ نبويهيى گوستردكلرينه إشارت ايدهجك. ايشته بز ده، او چوق كثرتلى مثاللرندن يدى سكز مثالى ذكر ايدهجگز:
برنجى مثال: علاّمۀِ مغرب حضرتِ قاضى عياض، شفاءِ شريفنده علوى بر سندله و بخارى صاحبى گبى مهمّ إماملردن نقلِ صحيح ايله خبر ويرييورلر كه: خادمِ نبوى حضرتِ ابن مسعود دير كه: «بز، رسولِ أكرم عليه الصلاة والسلامڭ ياننده طعام ييركن، طعامڭ تسبيحلرينى ايشيدييوردق.»
ايكنجى مثال: نقلِ صحيح ايله، أنس و أبو ذردن كتبِ صحيحه خبر ويرييورلر كه: حضرتِ أنس (خادمِ نبوى) ديمش كه: رسولِ أكرم عليه الصلاة والسلامڭ ياننده ايدك. آووجنه كوچك طاشلرى آلدى، مبارك ألنده تسبيح ايتمگه باشلاديلر. صوڭره أبو بكر الصدّيقڭ ألنه قويدى، ينه تسبيح ايتديلر. أبو ذرِّ غفّارى طريقنده دير كه: صوڭره حضرتِ عُمَرڭ ألنه قويدى، ينه تسبيح ايتديلر. صوڭره آلدى يره قويدى، صوصديلر. صوڭره ينه آلدى، حضرتِ عثمانڭ ألنه قويدى، ينه تسبيحه باشلاديلر. صوڭره حضرتِ أنس و أبو ذر دييورلر كه: «أللريمزه قويدى، صوصديلر.»
اوچنجى مثال: حضرتِ على و حضرتِ جابر و حضرتِ عائشۀِ صدّيقهدن نقلِ صحيح ايله ثابتدر كه: طاغ، طاش، رسولِ أكرم عليه الصلاة والسلامه «السّلام عليك يا رسول اللّٰه» دييورلردى. حضرتِ علىنڭ طريقنده دييور كه: بدايتِ نبوّتده، نواهئِ مكّهده، رسولِ أكرم عليه الصلاة والسلام ايله برابر گزديگمزده، آغاج و طاشه راست گلديگمز وقت، «السّلام عليك يا رسول اللّٰه» دييورلردى. حضرتِ جابر، طريقنده دير كه: رسولِ أكرم عليه الصلاة والسلام طاش و آغاجه راست گلديگى وقت، اوڭا سجده ايدييورديلر؛ يعنى إنقياد ايدوب، «السّلام عليك يا رسول اللّٰه» دييورديلر. جابرڭ بر روايتنده، رسولِ أكرم عليه الصلاة والسلام فرمان ايتمش:
﴿اِنّٖى لَاَعْرِفُ حَجَرًا كَانَ يُسَلِّمُ عَلَىّ﴾
بعضلرى ديمشلر كه: او، حجر الأسوده إشارتدر. حضرتِ عائشهنڭ طريقنده ديمش: رسولِ أكرم عليه الصلاة والسلام فرمان ايتمش:
﴿لَمَّا اسْتَقْبَلَنٖى جَبْرَائٖيلُ بِالرِّسَالَةِ جَعَلْتُ لَا اَمُرُّ بِحَجَرٍ وَلَا شَجَرٍ اِلَّا قَالَ اَلسَّلَامُ عَلَيْكَ يَا رَسُولَ اللّٰهِ﴾
دردنجى مثال: نقلِ صحيح ايله حضرتِ عبّاسدن خبر ويرييورلر كه: رسولِ أكرم عليه الصلاة والسلام، عبّاسى و درت اوغلنى (عبد اللّٰه، عُبَيد اللّٰه، فضل، قُثم) برابر، ملائت دينيلن بر پرده آلتنه آلارق، اوزرلرينه اورتدى. ديدى:
﴿يَا رَبِّ هٰذَا عَمّٖى وَصِنْوُ اَبٖى وَهٰؤُلَاءِ بَنُوهُ فَاسْتُرْهُمْ مِنَ النَّارِ كَسَتْرٖى اِيَّاهُمْ بِمُلَائَتٖى﴾
دييوب، دعا ايتدى. بردن أوڭ طامى و قپوسى و ديوارلرى، «آمين، آمين» دييهرك دعايه إشتراك ايتديلر.
بشنجى مثال: باشده بخارى، ابن حبّان، داود، ترميذى گبى كتبِ صحيحه متّفقًا حضرتِ أنسدن، أبو هريرهدن، عثمانِ ذى النّوريْندن، عشرۀِ مبشّرهدن سعيد ابن زيددن خبر ويرييورلر كه: رسولِ أكرم عليه الصلاة والسلام، أبو بكر الصدّيق، عُمَر الفاروق و عثمانِ ذى النّوريْن ايله اُحُد طاغنڭ باشنه چيقديلر. جبلِ اُحُد يا اونلرڭ مهابتلرندن ويا كندى سُرور و سَوينجندن لرزهيه گلدى، قيملداندى. رسولِ أكرم عليه الصلاة والسلام فرمان ايتدى كه:
﴿اُثْبُتْ يَا اُحُدُ فَاِنَّمَا عَلَيْكَ نَبِىٌّ وَصِدّٖيقٌ وَشَهٖيدَانِ﴾
شو حديث، حضرتِ عُمَر و عثمان شهيد اولاجقلرينه بر إخبارِ غيبيدر. شو مثالڭ تتمّهسى اولارق نقل ايديلمش كه: رسولِ أكرم عليه الصلاة والسلام مكّهدن هجرت ايتديگى و كفّارلر تعقيبه چيقدقلرى وقت، ثبير نامندهكى طاغه چيقديلر. ثبير ديدى: «يا رسول اللّٰه، بندن اينيڭز! قورقارم، بنم اوستمده سزى وورورلرسه، اللّٰه بنى تعذيب ايدر. اونڭ ايچون قورقارم.» جبلِ حراء چاغيردى:
﴿يَا رَسُولَ اللّٰهِ اِلَىَّ﴾
«بڭا گل.» بو سرّ ايچوندر كه، أهلِ قلب، ثبيرده خوف و حراده ده أمنيتى حسّ ايدرلر. بو مثالدن آڭلاشيلير كه: او قوجه طاغلر، برر مستقل عبددر، مسبّحدر و وظيفهداردرلر. پيغمبر عليه الصلاة والسلامى طانير و سَورلر؛ باشىبوش دگللردر.
آلتنجى مثال: نقلِ صحيح ايله حضرتِ عبد اللّٰه ابن عُمَردن خبر ويرييورلر كه، ديمش: رسولِ أكرم عليه الصلاة والسلام منبرده خطبه اوقوركن
﴿وَمَا قَدَرُوا اللّٰهَ حَقَّ قَدْرِهٖ وَالْاَرْضُ جَمٖيعًا قَبْضَتُهُ يَوْمَ الْقِيَامَةِ وَالسَّمٰوَاتُ مَطْوِيَّاتٌ بِيَمٖينِهٖ﴾
آيتنى اوقودى. و ديدى:
﴿اِنَّ الْجَبَّارَ يُعَظِّمُ نَفْسَهُ وَيَقُولُ اَنَا الْجَبَّارُ اَنَا الْجَبَّارُ اَنَا الْكَبٖيرُ الْمُتَعَالُ﴾
ديديگى وقت، منبر اويله صارصيلدى و اويله لرزهيه گلدى و تيترهدى، قورقدق كه؛ رسولِ أكرم عليه الصلاة والسلامى دوشورهجك بر درجهده صاللاندى.
يدنجى مثال: نقلِ صحيح ايله، حبرُ الاُمّه و ترجمانُ القرآن اولان حضرتِ ابن عبّاس و خادمِ نبوى و علماءِ عظيمۀِ صحابهدن اولان ابن مسعوددن خبر ويرييورلر كه، ديمشلر: فتحِ مكّه گوننده، كعبه و أطرافنده، طاشده رصاصله ميخلانمش اوچ يوز آلتمش صنم واردى. رسولِ أكرم عليه الصلاة والسلام ألنده قَوْسه بڭزر بر دگنكله، او صنملره برر برر إشارت ايدهرك
﴿جَٓاءَ الْحَقُّ وَزَهَقَ الْبَاطِلُ اِنَّ الْبَاطِلَ كَانَ زَهُوقًا﴾
دييوب، هانگيسنه إشارت ايتدى، يره دوشدى. صنمڭ يوزينه إشارت ايتديسه، آرقهسنه دوشر؛ آرقهسنه إشارت ايتديسه، يوز اوستنه دوشر و هكذا.. صنملر يره يووارلانديلر.
سكزنجى مثال: مشهور بحيراىِ راهبڭ مشهور قصّهسيدر كه: نبوّتدن أوّل، رسولِ أكرم عليه الصلاة والسلام، عموجهسى أبو طالب و بر قسم قُريشى ايله برابر، شام طرفنه تجارته گيدييورلر. بحيراىِ راهبڭ كليساسى جوارينه گلدكلرى وقت اوطورديلر. إنسانلر ايله إختلاط ايتمهين منزوى بحيراىِ راهب بردن چيقهگلدى. قافله ايچنده محمّد الأمينى (عصم) گوردى. قافلهيه ديدى: «شو سيّد العالميندر و پيغمبر اولاجقدر.» قُريشيلر ديديلر: «نهدن بيلييورسڭ؟» مبارك راهب ديدى كه: «سز گليركن باقدم كه، هواده اوستڭزده بر پارچه بلوط واردى. سز اوطوروركن، شو محمّد الأمين (عصم) طرفنه بلوط مَيل ايتدى، گولگه ياپدى. هم گورويوردم كه: طاش، آغاج اوڭا سجده ايدر گبى بر وضعيت گوردم. بو ايسه، نبىلره ياپيلير.»
ايشته بو سكز مثال گبى، بلكه سكسان مثال وار. بو سكز مثال برلشديرلسه؛ اويله قوپماز بر زنجير اولور كه، هيچ بر شبهه اونى قوپاراماز و صارصهماز. شو جنس معجزه عموميتى إعتباريله، يعنى جماداتڭ دعواىِ نبوّته دليل اولارق قونوشمالرى، معنوى تواتر حكمنده يقينى و قطعيتى إفاده ايدر. هر بر مثال، مجموعڭ قوّتندن، كندى قوّتندن فضله بر قوّت داها آلير. أوت ضعيف بر ديرك، قوّتلى ديركلرله اوموز اوموزه گلديگى وقت، مُحكملهشير. ضعيف، قوّتسز بر آدم، عسكر اولوب اوردويه گيرسه؛ اويله قوّتلشير كه، بيڭ آدمه ميدان اوقور.