(اوتوز ايكنجى سوزدن)
اوچنجى موقف
﴿بِسْمِ اللّٰهِ الرَّحْمٰنِ الرَّحٖيمِ﴾
﴿وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
شو اوچنجى موقف «ايكنجى نقطه»در. او ده ايكى مبحثدر.
برنجى مبحث:
(وَاِنْ مِنْ شَىْءٍ اِلَّا يُسَبِّحُ بِحَمْدِهٖ) سرّنجه: هر شيدن جنابِ حقّه قارشى پنجرهلر حكمنده چوق وجهلر وار. بتون موجوداتڭ حقائقى، بتون كائناتڭ حقيقتى؛ أسماءِ إلٰهيهيه إستناد ايدر. هر بر شيئڭ حقيقتى، بر إسمه وياخود چوق أسمايه إستناد ايدر. أشيادهكى صفتلر، صنعتلر دخى، هر برى برر إسمه طايانييور.
حتّى حقيقى فنِّ حكمت، «حكيم» إسمنه و حقيقتلى فنِّ طب «شافى» إسمنه و فنِّ هندسه «مقدّر» إسمنه و هكذا هر بر فن، بر إسمه طايانديغى و اونده نهايت بولديغى گبى، بتون فنون و كمالاتِ بشريه و طبقاتِ كُمّلينِ إنسانيهنڭ حقيقتلرى، أسماءِ إلٰهيهيه إستناد ايدر.
حتّى محقّقينِ أوليانڭ بر قسمى ديمشلر: «حقيقى حقائقِ أشيا، أسماءِ إلٰهيهدر. ماهيتِ أشيا ايسه، او حقائقڭ گولگهلريدر.»
حتّى بر تك ذىحيات شيده، يالڭز ظاهر اولارق يگرمى قدر أسماءِ إلٰهيهنڭ جلوۀِ نقشى گورونهبيلير.
شو اينجه و دقيق و پك بيوك و گنيش حقيقتى، بر تمثيل ايله فهمه تقريبه چاليشهجغز. ايكى اوچ آيرى آيرى ألك ايله ألهمك صورتنده تحليل ايدهجگز. نه قدر اوزون بيان ايتسهك ينه قيصهدر. اوصانمهمق گرك. شويله:
ناصلكه غايت ماهر بر تصويرجى و هيكلتراش بر ذات، غايت گوزل بر چيچكله و إنسان جنسِ لطيفندن غايت گوزل بر حَسْنانڭ صورت و هيكلنى ياپمق ايستهسه؛ أوّلا، او ايكى شيئڭ عمومى شكللرينى بعض خطلرله تعيين ايدر. شو تعيينى، بر تنظيم ايلهدر، بر تقدير ايله ياپييور. هندسهيه إستنادًا حدود تعيين ايدييور. شو تنظيم و تقدير، بر حكمت و علم ايله ياپيلديغنى گوسترييور كه، تنظيم و تحديد فعللرى، علم و حكمت پرگاريله دونويور. اويله ايسه، تنظيم و تحديد آرقهسنده، علم و حكمت معنالرى حكم ايدييور. اويله ايسه، علم و حكمت پرگارى، كندينى گوسترهجك. ايشته كندينى گوستردى كه، او حدودلر ايچنده، گوز، قولاق، بورون، ياپراق و اينجهجك پوسكولجكلر گبى شيلرڭ تصويرينه باشلادى. شيمدى گورويورز كه: ايچندهكى پرگارڭ حركاتيله تعيين ايديلن أعضالر، صنعتكارانه و عنايتكارانه دوشويور. اويله ايسه او علم و حكمت پرگارينى چويرن، آرقهده صنع و عنايت معنالرى وار، حكم ايدييورلر و كنديلرينى گوسترهجكلر. ايشته اوندندر كه؛ بر حُسن و زينته قابليت گوسترييور. اويله ايسه؛ صنع و عنايتى چاليشديران، إرادۀِ تحسين و قصدِ تزييندر. اويله ايسه اونلر حكم ايدييورلر كه؛ تزيينه، تنويره باشلادى. بر تبسّم وضعيتنى گوستردى و حياتدارلق هيئتنى ويردى. ألبته شو تحسين و تنوير معناسنى چاليشديران، لطف و كرم معناسيدر. أوت او ايكى معنا، اونده او درجه حكم ايدر كه؛ عادتا او چيچك بر لطفِ مجسّم، او هيكل بر كرمِ متجسّددر. شيمدى بو معناىِ كرم و لطفى چاليشديران و تحريك ايدن، «تودّد و تعرّف» معنالريدر. يعنى: كندينى، هنرى ايله طانيتديرمق و خلقه كندينى سَوْديرمك معنالرى آرقهده حكم ايدييور. بو طانيتديرمق و سَوْديرمك، ألبته مَيلِ مرحمت و إرادۀِ نعمتدن گلييور. مادام رحمت و إرادۀِ نعمت، آرقهده حكم ايدييور. اويله ايسه او هيكلى، نعمتڭ أنواعيله طولديرهجق، تزيين ايدهجك، او چيچگڭ صورتنى ده بر هديهيه طاقهجق. ايشته او هيكلڭ أللرينى، قوجاغنى و جيبلرينى قيمتدار نعمتلر ايله طولديردى و او چيچك صورتنى ده بر مجوهراته طاقدى. ديمك بو رحمت و إرادۀِ نعمتى چاليشديران، ترحّم و تحنّندر. يعنى «آجيمق و شفقت ايتمك» معناسى، رحمت و نعمتى تحريك ايدييور. و او مستغنى و هيچ كيمسهيه إحتياجى اولميان ذاتده اولان ترحّم و تحنّن معناسنى تحريك ايدن و إظهاره سَوق ايدن، ألبته او ذاتدهكى معنوى جمال و كمالدر كه، تظاهر ايتمك ايسترلر. و او جمالڭ أڭ شيرين جزئى اولان محبّت و أڭ طاتلى قسمى اولان رحمت ايسه، صنعت آيينهسيله گورونمك و مشتاقلرڭ گوزلريله كنديلرينى گورمك ايسترلر. يعنى جمال و كمال، (چونكه بِالذّات سَويليرلر) هر شيدن زياده كندى كندينى سَوهرلر. هم حُسندر، هم عشقدرلر. حُسن و عشقڭ إتّحادى بو نقطهدندر. جمال مادام كندينى سَور، كندينى آيينهلرده گورمك ايستر. ايشته هيكله قونيلان و صورته طاقيلان سَويملى نعمتلر، گوزل ميوهلر، او جمالِ معنوينڭ (كندى قابليتلرينه گوره) برر لمعهسنى طاشييورلر. او لمعهلرى هم جمال صاحبنه، هم باشقهسنه گوسترييورلر.
عينًا اويله ده: صانعِ حكيم، جنّتى و دنيايى، سماواتى و زمينى، نباتات و حيواناتى، جنّ و إنسى، مَلك و روحانياتى، كلّى و جزئى بتون أشيايى؛ جلوۀِ أسماسيله أشكالنى تحديد ايدييور، تنظيم ايدييور، برر مقدارِ معيّنه ويرييور. اونڭ ايله بونلره «مقدّر، منظّم، مصوّر» إسملرينى اوقوتديرييور. اويله بر طرزده شكلِ عموميسنڭ حدودينى تعيين ايدر كه، «عليم، حكيم» إسمنى گوسترر. صوڭره علم و حكمت جدوليله، او حدود ايچنده، او شيئڭ تصويرينه باشلار. اويله بر طرزده كه، صنع و عنايت معنالرينى و «صانع و كريم» إسملرينى گوسترييور. صوڭره صنعتڭ يدِ بيضاسيله، عنايتڭ فرچهسيله او صورتڭ، (أگر بر تك إنسان و بر تك چيچك ايسه) گوز، قولاق، ياپراق، پوسكول گبى أعضالرينه بر حُسن، بر زينت رنكلرى ويرييور. أگر زمين ايسه؛ معادن، نباتات و حيواناتنه بر حُسن و زينت رنكلرى ويرييور. أگر جنّت ايسه؛ باغلرينه، قصرلرينه، حوريلرينه بر حُسن و زينت رنكلرى ويرييور و هكذا... باشقهلرينى قياس ايت. هم اويله بر طرزده تزيين و تنوير ايدر كه: لطف و كرم معنالرى، اونده او درجه حكم ايدييور كه؛ عادتا او موجودِ مزيَّن، او مصنوعِ منوّر؛ بر لطفِ مجسّم، بر كرمِ متجسّد حكمنه گچر. «لطيف و كريم» إسمنى ذكر ايدر. صوڭره او لطف و كرمى شو جلوهيه سَوق ايدن، ألبته تودّد و تعرّفدر، يعنى كندينى ذىحياته سَوْديرمك و ذىشعوره بيلديرمك شأنلريدر كه، «لطيف، كريم» إسملرينڭ آرقهلرنده «ودود و معروف» إسملرينى اوقوتويور و مصنوعڭ لسانِ حالندن ايشيديلييور. صوڭره او مزيَّن موجودى، او گوزل مخلوقى، لذيذ ميوهلر، سَويملى نتيجهلرله سوسلنديروب، زينتدن نعمته، لطفدن رحمته چويرر. «منعم و رحيم» إسمنى اوقوتديرر و ظاهرى پردهلر آرقهسنده، او ايكى إسمڭ جلوهسنى گوسترر. صوڭره بو رحيم و كريمى، (مستغنئِ على الإطلاق اولان ذاتده) بو جلوهيه سَوق ايدن، ألبته بر ترحّم، تحنّن شأنلريدر كه؛ إسمِ «حنّان و رحمٰن»ى اوقوتديرييور و گوسترييور. شو ترحّم، تحنّن معنالرينى جلوهيه سَوق ايدن، ألبته بر جمال و كمالِ ذاتيدر كه، تظاهر ايتمك ايستر. «جميل» إسمنى و جميل إسمنده مندرج اولان «ودود و رحيم» إسملرينى اوقوتديرييور. چونكه جمال، بِالذّات سَويلير. ذىجمال و جمال، كندى كندينى سَور. هم حُسندر، هم محبّتدر. كمال دخى، بِالذّات محبوبدر، سببسز اولارق سَويلير. هم مُحِبدر، هم محبوبدر.
مادام نهايتسز درجۀِ كمالده بر جمال و نهايتسز درجۀِ جمالده بر كمال؛ نهايت درجهده سَويلير، محبّته و عشقه لايقدر. ألبته آيينهلرده و آيينهلرڭ قابليتلرينه گوره لمعاتنى و جلوهلرينى گورمك و گوسترمكله تظاهر ايتمك ايستر. ديمك صانعِ ذو الجلالڭ و حكيمِ ذو الجمالڭ و قديرِ ذو الكمالڭ ذاتندهكى جمالِ ذاتى و كمالاتِ ذاتيهسى، ترحّم و تحنّن ايستر و «رحمٰن و حنّان» إسملرينى تجلّىيه سَوق ايدر. ترحّم و تحنّن ايسه، رحمت و نعمتى گوسترمكله «رحيم و منعم» إسملرينى جلوهيه سَوق ايدر. رحمت و نعمت ايسه؛ تودّد، تعرّف شأنلرينى إقتضا ايدوب «ودود و معروف» إسملرينى تجلّىيه سَوق ايدر. مصنوعڭ بر پردهسنده اونلرى گوسترر، تودّد و تعرّف ايسه؛ لطف و كرم معنالرينى تحريك ايدر. «لطيف و كريم» إسملرينى مصنوعڭ بعض پردهلرنده اوقوتديرييور. لطف و كرم شأنلرى ايسه، تزيين و تنوير فعللرينى تحريك ايدر. «مزيِّن و منوّر» إسملرينى مصنوعڭ حُسن و نورانيتى لسانيله اوقوتديرر. و او تزيين و تحسين شأنلرى ايسه، صنع و عنايت معنالرينى إقتضا ايدر. و «صانع و محسن» إسملرينى، او مصنوعڭ گوزل سيماسيله اوقوتديرر. و او صنع و عنايت ايسه، بر علم و حكمتى إقتضا ايدر. و إسمِ «عليم و حكيم»ى، او مصنوعڭ إنتظاملى، حكمتلى أعضاسيله اوقوتديرر. او علم و حكمت ايسه تنظيم، تصوير، تشكيل فعللرينى إقتضا ايدييور. «مصوّر و مقدّر» إسملرينى مصنوعڭ هيئتيله، شكليله اوقوتديرر، گوسترر.
ايشته صانعِ ذو الجلال، بتون مصنوعاتنى اويله بر طرزده ياپمش كه؛ أكثريسى، خصوصًا ذىحيات قسمى، چوق أسماءِ إلٰهيهيى اوقوتديرر. گويا هر بر مصنوعنه آيرى آيرى، بربرى اوستنده يگرمى گوملك گيديرمش، يگرمى پردهيه صارمش. هر گوملكده، هر پردهده آيرى آيرى أسماسنى يازمش. مثلا: تمثيلده گوستريلديگى گبى، تك گوزل بر چيچكله، إنسانڭ قسمِ ثانيسندن بر فردِ حَسْنانڭ يالڭز ظاهرى خلقتلرنده، چوق صحيفهلر واردر. باشقه بيوك و كلّى مصنوعاتى، او ايكى جزئى مثاله قياس ايت.
برنجى صحيفه: عمومى شكل و مقدارينى گوسترن هيئتدر كه: «يا مصوّر، يا مقدّر، يا منظّم» إسملرينى ياد ايدر.
ايكنجى صحيفه: صورتلرنده آيرى آيرى أعضالرڭ إنكشافيله حاصل اولان چيچك و إنسانڭ بسيط هيئتيدر كه؛ او صحيفهده «عليم، حكيم» إسملرى گبى چوق إسملر يازيلييور.
اوچنجى صحيفه: او ايكى مخلوقڭ آيرى آيرى أعضالرينه، آيرى آيرى حُسن و زينت ويرمكله، او صحيفهده «صانع و بارئ» إسملرى گبى چوق إسملر يازيلييور.
دردنجى صحيفه: اويله بر زينت و حُسن، او ايكى مصنوعه ويريلييور كه؛ گويا لطف و كرم تجسّم ايتمش، اونلر اولمش. او صحيفه «يا لطيف، يا كريم» گبى چوق إسملرى ياد ايدر، اوقور.
بشنجى صحيفه: او چيچگه لذيذ ميوهلر، او حَسْنايه سَويملى أولادلر، گوزل أخلاقلر طاقمقله؛ او صحيفه «يا ودود، يا رحيم، يا منعم» گبى إسملرى اوقوتديرييور.
آلتنجى صحيفه: او إنعام و إحسان صحيفهسنده، «يا رحمٰن، يا حنّان» گبى إسملر اوقونويور.
يدنجى صحيفه: او نعمتلرده، او نتيجهلرده، اويله لمعاتِ حُسن و جمال گورونويور كه، حقيقى بر شوق و شفقتله يوغرولمش خالص بر شكر و صافى بر محبّته لايق اولور. او صحيفهده «يا جميلِ ذو الكمال، يا كاملِ ذو الجمال» إسملرى يازيلى اوقونويور.
ايشته يالڭز بر گوزل چيچك و حسنا بر إنسان و يالڭز مادّى و ظاهر صورتنده بو قدر أسمايى گوستررسه؛ عجبا عموم چيچكلر و بتون ذىحيات و بيوك و كلّى موجودات، نه درجه علوى و كلّى أسمايى اوقوتويور، قياس ايدهبيليرسڭ.
هم إنسان روح، قلب، عقل جهتيله و حيات و لطائف صحيفهلريله «حىّ، قيّوم و محيى» گبى نه قدر أسماءِ قدسيۀِ نورانيهيى اوقور و اوقوتديرر، قياس ايدهبيليرسڭ.
ايشته، جنّت بر چيچكدر. حورى طائفهسى دخى بر چيچكدر. روىِ زمين دخى بر چيچكدر. بهار ده بر چيچكدر. سما ده بر چيچكدر؛ ييلديزلر، او چيچگڭ يالديزلى نقشلريدر. گونش ده بر چيچكدر؛ ضياسندهكى يدى رنگى، او چيچگڭ نقشلى بويالريدر. عالم، گوزل و بيوك بر إنساندر؛ ناصلكه إنسان، كوچك بر عالمدر. حوريلر نوعى و روحانيلر جماعتى و مَلك جنسى و جنّ طائفهسى و إنسان نوعى، برر گوزل شخص حكمنده تصوير و تنظيم و ايجاد ايديلمشدر. هم هر برى كلّيتى ايله؛ هم هر بر فردى، تك باشيله صانعِ ذو الجمالنڭ أسماسنى گوستردكلرى گبى؛ اونڭ جمالنه، كمالنه، رحمتنه و محبّتنه برر آيرى آيرى آيينهلردر. و نهايتسز جمال و كمالنه و رحمت و محبّتنه برر شاهدِ صادقدر. و او جمال و كمالڭ و رحمت و محبّتڭ برر آياتيدر، برر أماراتيدر. ايشته شو نهايتسز أنواعِ كمالات، دائرۀِ واحديتده و أحديتده حاصلدر. ديمك او دائره خارجنده توهّم اولونان كمالات، كمالات دگلدر.
ايشته حقائقِ أشيانڭ أسماءِ إلٰهيهيه طايانديغنى و إستناد ايتديگنى، بلكه حقيقى حقائق، او أسمانڭ جلوهلرى اولديغنى و هر شيئڭ چوق جهتلرله، چوق ديللرله صانعنى ذكر و تسبيح ايتديگنى آڭلا. (وَاِنْ مِنْ شَىْءٍ اِلَّا يُسَبِّحُ بِحَمْدِهٖ) نڭ بر معناسنى بيل و (سُبْحَانَ مَنِ اخْتَفٰى بِشِدَّةِ ظُهُورِهٖ) دى. و آيتلرڭ آخرلرنده اولان (وَهُوَ الْعَزٖيزُ الْحَكٖيمُ ۞ وَهُوَ الْغَفُورُ الرَّحٖيمُ ۞ وَهُوَ الْعَلٖيمُ الْقَدٖيرُ) گبى ذكر و تكرارلرندهكى بر سرّى فهم ايت.
أگر بر چيچكده أسمايى اوقويامييورسهڭ و واضح گورهميورسهڭ؛ جنّته باق، بهاره دقّت ايت، زمينڭ يوزينى تماشا ايت. رحمتڭ شو بيوك چيچكلرى اولان جنّت و بهار و زمينده يازيلان أسمايى واضحًا اوقويهبيليرسڭ، جلوهلرينى و نقشلرينى آڭلار، گورورسڭ.