الحجّة الزهرانڭ برنجى مقامنڭ اوچنجى قسميدر
مقدّمه
﴿بِسْمِ اللّٰهِ الرَّحْمٰنِ الرَّحٖيمِ﴾
﴿وَبِهٖ نَسْتَعٖينُ﴾
نمازدهكى فاتحهنڭ معنوى أمريله (اَشْهَدُ اَنْ لَا اِلٰهَ اِلَّا اللّٰهُ) فيضيله ايكنجى قسم يازيلديغى گبى؛ نمازدهكى تشهّدده دخى (وَاَشْهَدُ اَنَّ مُحَمَّدًا رَسُولُ اللّٰهِ) جملهسنڭ ديليله، معنوى إخطاريله و سورۀِ فتحڭ آخرنده
﴿هُوَ الَّذٖٓى اَرْسَلَ رَسُولَهُ بِالْهُدٰى وَدٖينِ الْحَقِّ لِيُظْهِرَهُ عَلَى الدّٖينِ كُلِّهٖ وَكَفٰى بِاللّٰهِ شَهٖيدًا ۞ مُحَمَّدٌ رَسُولُ اللّٰهِ وَالَّذٖينَ مَعَهُٓ اَشِدَّٓاءُ عَلَى الْكُفَّارِ رُحَمَٓاءُ بَيْنَهُمْ﴾
... الخ. بش معجزۀِ غيبيهيى گوسترن بيوك آيتڭ نوريله اوچنجى قسمنى يازمغه (شيمدى بياننه إذنم اولميان) اوچ سبب ايچون مجبور اولدم. تفصيلاتنى، ايضاحاتنى، سندلى حجّتلرينى رسالتِ محمّديهيه دائر ذو الفقار معجزاتِ أحمديه و عربى حزبِ نورىيه حواله ايدوب يالڭز غايت مختصر، قيصهجق اوچ إشارت ايله عربى حزبِ نورىنڭ خلاصهسنڭ بر خلاصهسى و تسبيحاتده تكرار ايتديگم كلمۀِ توحيد ايله دائمى وردم بر تفكّرِ عربى اولارق بوراده يازيلان رسالهجگنڭ «مُحمّد رسول اللّٰه» شهادتنه دائر پارچهنڭ بر نوع ترجمهسى، ايكنجى و اوچنجى إشارتده يازيلهجق.
برنجى إشارت:
بو كائنات صاحبنڭ تظاهرِ ربوبيتنه و سرمدى الوهيتنه و نهايتسز إحساناتنه كلّى بر عبوديت و طانيتديرمقله مقابله ايدن محمّد عليه الصلاة والسلام، بو كائناتده گونش لزومى گبى ألزمدر كه؛ نوعِ بشرڭ استادِ أكبرى و بيوك پيغمبرى و فخرِ عالم و (لَوْلَاكَ لَوْلَاكَ لَمَا خَلَقْتُ الْاَفْلَاكَ) خطابنه مظهر و حقيقتِ محمّديه (عصم) هم سببِ خلقتِ عالم، هم نتيجهسى و أڭ مكمّل ميوهسى اولديغى گبى، بو كائناتڭ حقيقى كمالاتى و سرمدى جميلِ ذو الجلالڭ باقى آيينهلرى و صفتلرينڭ جلوهلرى و حكمتلى أفعالنڭ وظيفهدار أثرلرى و چوق معنيدار مكتوبلرى اولماسى و باقى بر عالمى طاشيماسى و بتون ذىشعورلرڭ مشتاق اولدقلرى بر دارِ سعادت و آخرتى نتيجه ويرمهسى گبى حقيقتلرى، حقيقتِ محمّديه (عصم) و رسالتِ أحمديه (عصم) ايله تحقّق ايتديگندن، ناصل بو كائنات اونڭ رسالتنه غايت قوّتلى و قطعى شهادت ايدر؛ اويله ده: باشده عالمِ إسلام، بتون بشر و بتون ذىشعور؛ جهنّمدن داها آجى و قورقونج اولان عدمدن، هيچلكدن، إعدامِ أبديدن، فناءِ مطلقدن قورتولمق ايچون دائمى عشق و شوقله هر زمانده و جامع ماهيتنڭ بتون قوّتلريله، بتون إستعدادات لسانلرى ايله، بتون دعالر و عبادتلر و رجالرينڭ ديللريله ايستدكلرى حياتِ باقيهيى قوّتلى و قطعى بشارت ويرن رسالتِ أحمديه (عصم) و حقيقتِ محمّديهيه (عصم) شهادت ايدوب نوعِ بشرڭ مدارِ إفتخارى و أشرفِ مخلوقات اولديغنه إمضا باصديغى گبى.. هر زمانده اوچ يوز أللى ميليون أهلِ ايمانڭ (اَلسَّبَبُ كَالْفَاعِلِ) سرّنجه، هر گون ايشلدكلرى بتون حسناتلر و خيرلرڭ بر مِثلى محمّد عليه الصلاة والسلامڭ دفترِ حسناتنه گيرمهسى و او تك شخصيتِ محمّديه (عصم)، يوزر ميليون، بلكه ميليارلر عابدِ محسن قدر كلّى بر عبوديته و فيوضاته مظهر بر مقام قزانماسى، او ذاتڭ رسالتنه پك قوّتلى شهادت ايدوب إمضا باصار.
ايكنجى إشارت:
بنم وردمده هر وقت تفكّرله باقديغم يگرميدن زياده شهادتلره إشارت ايدن
﴿مُحَمَّدٌ رَسُولُ اللّٰهِ صَادِقُ الْوَعْدِ الْاَمٖينِ بِشَهَادَةِ ظُهُورِهٖ دَفْعَةً مَعَ اُمِّيَّتِهٖ
بِاَكْمَلِ دٖينٍ وَاِسْلَامِيَّةٍ وَشَرٖيعَةٍ وَبِاَقْوٰى اٖيمَانٍ وَاِعْتِقَادٍ وَعِبَادَةٍ
وَبِاَعْلٰى دَعْوَةٍ وَمُنَاجَاةٍ وَدَعَوَاتٍ وَبِاَعَمِّ تَبْلٖيغٍ وَاَتَمِّ مَتَانَةٍ
خَارِقَاتٍ مُثْمِرَاتٍ لَا مِثْلَ لَهَا﴾
قيصه بر نوع ترجمهسى و مئالى: يعنى محمّدڭ (عصم) رسالتنه شهادت ايدن:
برنجيسى: اون بر حالاتندن چيقان بر حجّتِ رسالتدر.
أوت، اوقومق و يازمق اوگرنمديگى و اُمّى اولديغى حالده؛ اون درت عصرڭ عقلاسنى، فيلسوفلرينى حيرتده بيراقان و أديانِ سماويهده برنجيلگى قزانان بر دين ايله بردن، تجربهسز و دفعةً ميدانه چيقماسى أمثال قبول ايتمز بر حالت اولديغى گبى...
سوزلرندن، فعللرندن، حاللرندن چيقان إسلاميت هر زمانده اوچ يوز أللى ميليون إنسانڭ روحلرينه، نفسلرينه، عقللرينه تربيهكارانه درس ويرمهسى و معنوى ترقّياته سَوق ايتمهسى، أمثالسز بر حالتدر.
هم اويله بر شريعتله ميدانه گلمش كه؛ عادلانه قانونلريله نوعِ بشرڭ بشدن بريسنى اون درت عصرده مادّى و معنوى ترقّى ايچنده إداره ايتمهسى مِثلسز بر حالت اولديغى گبى...
او ذات (عصم) اويله بر ايمان و إعتقادله ميدانه چيقدى كه؛ بتون أهلِ حقيقت هر زمان اونڭ مرتبۀِ ايمانندن فيض آلمالريله برابر أڭ يوكسك و أڭ قوّتلى بر درجهدهدر دييه متّفقًا تصديقلرى و او زمانده حدسز معارضلرينڭ اوڭا مخالفتى ذرّه قدر بر تلاش، بر وسوسه، بر شبهه ويرمهمسى گوسترييور كه، قوّتِ ايمانيهده دخى اونڭ أمثالى يوق و او كلّى يوكسك ايمانى مِثلسزدر.
هم اويله بر عبوديت و عبادت گوستردى كه؛ إبتدا و إنتهايى برلشديروب هيچ كيمسهيى تقليد ايتميهرك، عبادتڭ أڭ اينجه أسرارينى گوروب مراعات ايدهرك أڭ دغدغهلى زمانلرده دخى تام تامنه عبوديتى ياپماسى أمثالسز بر حالت اولماسى گبى...
خالقنه قارشى اويله دعوات و مناجات و رجالر ياپمش كه، بو زمانه قدر تلاحقِ أفكارله برابر او مرتبهيه يتيشيلمهمش. مثلا: جوشن الكبير مناجاتنده بيڭ بر أسماءِ إلٰهيهيى شفاعتجى ايدهرك خالقنى اويله بر طرزده توصيف و تعريف ايدر كه، أمثالى يوق.
و معرفت اللّٰهده كيمسه اوڭا يتيشهمهمسى، مِثلسز بر حالتدر.
هم اويله بر متانتله إنسانلرى دينه دعوت و اويله بر جرئتله رسالتنى تبليغ ايتمش كه؛ قَومى و عموجهسى و دنيانڭ بيوك دولتلرى و أسكى دينلرڭ أتباعلرى اوڭا معارض و دشمن اولدقلرى حالده، ذرّه قدر قورقميهرق، چكينميهرك عمومنه ميدان اوقوماسى و باشه ده چيقارمسى، أمثالسز بر حالتدر.
ايشته اونڭ صدقنه و نبوّتنه بو خارقه، أمثالسز سكز حالتڭ مجموعى غايت قوّتلى بر شهادتدر.
و بو حالتلر، او ذاتڭ (عصم) نهايت درجهده جدّيتنه و إطمئناننه و كمالِ صدقنه و حقّانيتنه قطعى قناعتى وار اولديغنى گوسترييور.
عالمِ إسلام هر گونده، هر تشهّدده ميليونلر لسانله (اَلسَّلَامُ عَلَيْكَ اَيُّهَا النَّبِىُّ وَرَحْمَةُ اللّٰهِ وَبَرَكَاتُهُ) دير. و اونڭ مأموريتنه تسليميتنى و گتيرديگى سعادتِ أبديه بشارتنى تصديق ايتديگنى و بشريتڭ درين بر عشقله و فطرى و إستعدادى پك قوّتلى بر إشتياقله آراديغى حياتِ باقيهيه صاغلام بر يول آچديغنه قارشى عالمِ إسلام منّتدارانه، متشكّرانه (اَلسَّلَامُ عَلَيْكَ اَيُّهَا النَّبِىُّ) ايله بر معنوى زيارت و گوروشمك و اوچ يوز أللى ميليون، بلكه ميليارلر نامنه اونى تبريك ايدر.
يگرمى كلّى شهادتلردن و چوق شهادتلرى إحتوا ايدن ايكنجى شهادت:
﴿وَبِشَهَادَةِ جَمٖيعِ حَقَائِقِ الْاٖيمَانِ عَلٰى تَصْدٖيقِهٖ﴾
يعنى: ايمانڭ آلتى ركنلرينڭ حقيقتلرى و تحقّقلرى و حقّانيتلرى، محمّدڭ (عصم) رسالتنه و حقّانيتنه قطعى شهادت ايدر.
چونكه اونڭ رسالت حياتنڭ شخصيتِ معنويهسى و بتون دعوالرينڭ أساسى و ماهيتِ نبوّتى، او آلتى ركندر. اويله ايسه؛ او ركنلرڭ تحقّقلرينه دلالت ايدن بتون دليللر، محمّدڭ (عصم) رسالتنڭ حق اولديغنه و اونڭ صادقيتنه دخى دلالت ايدرلر.
هم آخرتڭ تحقّقنه سائر ركنلرينڭ دلالتنى ميوه رسالهسى و اوننجى سوزڭ ذيللرى بيان ايتدكلرى گبى؛ اويله ده هر بر ركن حجّتلريله برابر اونڭ رسالتنه بر حجّتدر.
بيڭلر شهادتلرى إحتوا ايدن اوچنجى كلّى شهادت:
﴿وَبِشَهَادَةِ ذَاتِهٖ عَلَيْهِ الصَّلَاةُ وَالسَّلَامُ بِاٰلَافِ مُعْجِزَاتِهٖ
وَكَمَالَاتِهٖ وَعُلُوِّ اَخْلَاقِهٖ﴾
يعنى: او ذات (عصم) گونش گبى كندى كندينه دليلدر. بيڭلر معجزات و كمالات و يوكسك، گوزل أخلاقيله رسالتنه و صادقيتنه پك قوّتلى شهادت ايدر. أوت معجزاتِ أحمديه (عصم) رسالۀِ خارقهده اوچ يوزدن زياده نقلِ صحيح ايله إثبات ايتديگى گبى؛ او ذاتڭ (عصم) (وَانْشَقَّ الْقَمَرُ) و (وَمَا رَمَيْتَ اِذْ رَمَيْتَ وَلٰكِنَّ اللهَ رَمٰى) آيتلرينڭ صراحتيله، آووجنڭ بر پارمغيله قمر ايكى پارچه اولماسى و نقلِ صحيح و تواترله، عين ألڭ بش پارمغندن بش چشمه صو آقماسى و صوسز قالان بتون اوردوسى او صودن ايچمهسى و شاهد اولماسى و بو عجيب خارقه ايكى دفعه باشقه يرده ده وقوع بولماسى و عين آووج ايله بر پارچه طوپراغى، هجوم ايدن دشمن اوردوسنه آتارق، هر بريسنڭ گوزينه بر آووج طوپراق گيرمهسيله هجومده ايكن قاچمهلرى و عين آووجده كوچك طاشلر إنسانلر گبى تسبيح ايدوب سبحان اللّٰه ديمهلرى گبى نقلِ صحيح ايله و بر قسمى تواترله تاريخلرده قطعيًا وقوعه گلن يوزر و أهلِ تحقيقڭ ياننده بيڭه قدر معجزات، ألنده ظهورى و دوست و دشمنلرڭ إتّفاقيله اونده گوزل خصلتلرڭ و أخلاقِ حسنهنڭ أڭ يوكسك درجهسنده (حاشيه)2 بولونماسى و آرقهسنده تبعيتله سلوك ايدوب كمالاته أريشن و حقيقته عين اليقين يتيشن بتون أهلِ تحقيق، إتّفاقله كمالاتِ محمّديه (عصم) أڭ يوكسك درجهده بولونديغنه حقّ اليقين تصديقلرى و اونڭ دينندن گلن عالمِ إسلامڭ فيوضاتى و قوجه إسلاميتڭ حقيقتلرى اونڭ خارقه كمالاتنه دلالت ايدر. ألبته او ذات (عصم)، بِالذّات كندى رسالتنه غايت پارلاق و كلّى، گنيش شهادت ايدر ديمكدر.
پك چوق قوّتلى شهادتلرى إحتوا ايدن دردنجى شهادت:
﴿وَبِشَهَادَةِ الْقُرْاٰنِ بِمَا لَا يُحَدُّ مِنْ حَقَائِقِهٖ وَبَرَاهٖينِهٖ﴾
يعنى: قرآنِ معجز البيان، حدسز حقيقتلر و حجّتلريله رسالتنه، صادقيتنه شهادت ايدر.
أوت قرق وجهله معجزه اولديغى ذو الفقار مجموعهسنده إثبات ايديلن و اون درت عصرى نورلانديران و نوعِ بشرڭ بشدن بريسنى تبدّل ايتمهين قانونلريله إداره ايدن و او زماندن شيمدىيه قدر بتون معارضلره ميدان اوقويوب هيچ كيمسه حتّى بر سورهسنڭ مِثلنى گتيرمگه جسارت ايتمهين و آيت الكبراده إثبات ايديلديگى گبى آلتى جهتى نورانى، شبههلر گيرهمهين و آلتى مقامِ كبرا حقّانيتنه إمضا باصان و صارصيلماز آلتى حقيقتلره طايانان و هر زمانده يوزر ميليون لسانلرله شوق و حرمتله اوقونان و هر دقيقهده ميليونلر حافظلرڭ قلبلرنده قدسيتله يازيلان و عالمِ إسلامڭ بتون شهادتلرى و ايمانلرى اونڭ شهادتندن ترشّح ايدن و بتون علومِ ايمانيه و إسلاميه اونڭ منبعندن آقان و او أسكى سماوى كتابلرى تصديق ايتديگى گبى، بتون كتب و صحفِ سماويهنڭ معنوى تصديقلرينه مظهر بولونان قرآنِ عظيم الشان، بتون حقيقتلريله و حقّانيتنى إثبات ايدن بتون حجّتلريله، محمّد عليه الصلاة والسلامڭ صدقنه و رسالتنه شهادت ايدر ديمكدر.
بشنجى، آلتنجى، يدنجى، سكزنجى كلّى شهادتلر:
﴿وَبِشَهَادَةِ الْجَوْشَنِ بِقُدْسِيَّةِ اِشَارَاتِهٖ وَرَسَائِلِ النُّورِ بِقُوَّةِ دَلَائِلِهٖ وَالْمَاضٖى بِتَوَاتُرِ اِرْهَاصَاتِهٖ وَالْاِسْتِقْبَالِ بِتَصْدٖيقِ اٰلَافِ حَادِثَاتِهٖ﴾
يعنى: بيڭ بر أسماءِ إلٰهيهيه صريحًا و إشارةً باقان و بر جهتده قرآندن چيقان بر خارقه مناجات اولان و معرفت اللّٰهده ترقّى ايدن بتون عارفلرڭ مناجاتلرينڭ فوقنده بولونان و بر غزوهده «زرهى چيقار، اونڭ يرينه بو جوشنى اوقو» دييه جبرائيل وحى گتيرن «جوشن الكبير» مناجاتى ايچندهكى حقيقتلر و تام تامنه ربّنه قارشى توصيفلر، محمّدڭ (عصم) رسالتنه و حقّانيتنه شهادت ايتديگى گبى؛ قرآندن ترشّح ايدن و بر جهتده جوشندن فيض آلان و تولّد ايدن رسائل النوريه، يوز اوتوز پارچهسيله رسالتِ محمّديهيه (عصم) بر تك حجّت اولارق رسالتنڭ بتون حقيقتلرينى عقلًا و منطقًا إثباتيله، حتّى فلسفهنڭ نظرنده عقلدن پك اوزاق مسئلهلرينى گوز اوڭنده گبى غايت قولاى و معقول بر طرزده درس ويرمسيله محمّدڭ (عصم) صادقيتنه و رسالتنه كلّى بر صورتده شهادت ايدر.
هم زمانِ ماضى دخى رسالتنه بر كلّى شاهددر كه؛ إرهاصات دينيلن نبوّتدن أوّل ظهور ايدن و گلهجك پيغمبرڭ معجزاتى صاييلان خارقهلر، تاريخلرده و سِيَر كتابلرنده قطعى تواتر طرزنده نقل ايديلن پك چوق واقعهلر، غايت صاغلام بر صورتده رسالتنه شهادت ايدر و چوق نوعلرى وار. بر قسمى، گلهجك شهادتلرده بيان ايديلهجك؛ بر قسمى ده ذو الفقارده و تاريخ كتابلرنده صحيح بر صورتده نقل ايديلمش.
مثلا، ولادتِ پيغمبريهيه (عصم) ياقين بر وقتده كعبهيى تخريب ايتمگه گلن أبرهه عسكرينڭ باشلرينه أبابيل قوشلرينڭ أللريله طاشلرڭ ياغماسى و ولادت گيجهسنده كعبهدهكى صنملرڭ باش آشاغى دوشمهسى و كِسراىِ فارس سراينڭ خراب اولماسى و آتشپرست مجوسيلرڭ بيڭ سنهدن بَرى يانماسى دوام ايدن آتشى او گيجه سونمهسى و بحيراءِ راهب و حليمۀِ سعديهنڭ قطعى إخبارلريله، بلوطلر باشنه گولگه ايتمهسى گبى چوق حادثهلر، نبوّتندن أوّل نبوّتنى خبر ويرمشلر.
هم إستقبال، يعنى وفاتندن صوڭره اونڭ خبر ويرديگى حادثهلر پك چوقدر و چوق نوعلرى وار. بريسى، آلِ بيتنه و أصحابنه و فتوحاتِ إسلاميهيه عائد إخباراتِ غيبيهسيدر كه، ذو الفقارده معجزاتِ أحمديه قسمنده نقلِ صحيح ايله سكسان واقعهنڭ عينًا خبر ويرديگى گبى چيقماسى، مثلا حضرتِ عثمان (رض) مصحف اوقوركن، حضرتِ حسين (رض) كربلاده شهيد ايديلمهلرى و شام و ايران و إستانبولڭ فتحلرى و عبّاسى دولتنڭ ظهورى و جنگيز و هلاكو اونى مغلوب و محو ايتمهسى گبى سكسان إخبارِ غيبى معجزاتى نقلِ صحيح ايله و تاريخ و سِيَر كتابلرينه إستنادًا تفصيلًا يازماسى گبى، إخبارِ غيبينڭ سائر نوعلريله و محمّدڭ (عصم) حقّانيتنه دلالت ايدن پك چوق واقعاتِ إستقباليه ايله زمانِ إستقبال دخى قوّتلى و كلّى بر صورتده رسالتِ محمّديهيه (عصم) و صادقيتنه شهادت ايدر ديمكدر.
طوقوزنجى، اوننجى، اون برنجى، اون ايكنجى شهادتلره إشارت ايدن:
﴿وَبِشَهَادَةِ الْاٰلِ بِقُوَّةِ يَقٖينِيَّاتِهِمْ فٖى تَصْدٖيقِهٖ بِدَرَجَةِ حَقِّ الْيَقٖينِ وَالْاَصْحَابِ بِكَمَالِ اٖيمَانِهِمْ فٖى تَصْدٖيقِهٖ بِدَرَجَةِ عَيْنِ الْيَقٖينِ وَالْاَصْفِيَاءِ بِقُوَّةِ تَحْقٖيقَاتِهِمْ فٖى تَصْدٖيقِهٖ بِدَرَجَةِ عِلْمِ الْيَقٖينِ وَالْاَقْطَابِ بِتَطَابُقِهِمْ عَلٰى رِسَالَتِهٖ بِالْكَشْفِ وَالْمُشَاهَدَاتِ بِالْيَقٖينِ﴾
يعنى: محمّدڭ (عصم) صادقيتنه و حقّانيتنه كلّى شهادتلردن،
طوقوزنجيسى:
﴿عُلَمَاءُ اُمَّتٖى كَاَنْبِيَاءِ بَنٖى اِسْرَائٖيلَ﴾
سرّينه مظهر و صلواتلرده آلِ إبراهيم عليه السلامه مقابل اولان آلِ محمّد عليه الصلاة والسلامڭ ايچندهكى بيوك أوليا (رض) و على (رض) و حسن (رض) و حسين (رض) و أهلِ بيتڭ اون ايكى إمامى و غوثِ أعظم (قس) و أحمدِ رفاعى (قس)، أحمدِ بدوى (قس)، إبراهيمِ دسوقى (قس)، أبو الحسنِ شاذلى (قس) گبى أقطابلر و إماملر إتّفاقله، حقّ اليقين بر إعتقادله و كشفيات و مشاهداتله و امّتده گوستردكلرى خارقه إرشادات و كرامتلرله، رسالت و حقّانيت و صادقيتِ محمّديهيه (عصم) ايمانلرى و شهادتلريله إمضا باصييورلر.
اوننجيسى:
أنبيادن صوڭره أڭ محترم و يوكسك طائفه، بدوى اولدقلرى حالده آز بر زمانده نورِ محمّدى (عصم) ايله شرقدن غربه قدر عادلانه إداره ايدوب، جهانگير دولتلرى مغلوب ايدهرك مترقّى، فنلى، مدنى، سياسى ملّتلره استاد، معلّم، ديپلومات، حاكمِ عادل اولارق او عصرى بر عصرِ سعادت حكمنه گتيرن صحابهلر؛ محمّدڭ (عصم) هر حالنى تدقيق و تحرّيدن صوڭره گوزلريله گوردكلرى چوق معجزاتڭ قوّتيله أسكى دشمنلقلرينى و أجدادلرينڭ مسلكلرينى و چوقلرى (خالد ابن وليد و عِكْرِمَه ابن أبو جهل گبى) پدرلرينڭ طرفدارلقلرينى، قوم و قبيلهلرينى تماميله بيراقوب بتون روح و جانلريله، غايت فداكارانه بر صورتده إسلاميته گيرهرك عين اليقين درجهسنده محمّدڭ (عصم) صادقيتنه و رسالتنه ايمانلرى؛ صارصيلماز، كلّى بر شهادتدر.
اون برنجيسى:
أصفيا و صدّيقين دينيلن مجتهدلر، إماملر، علاّمهلر؛ ابن سينا، ابن رشد گبى داهى فيلسوفلر مِثللو بيڭلر أهلِ تحقيق، عقلى و منطقى بر طرزده، هر برى آيرى بر مسلكده، شبههسز بيڭلر حجّتلره و قطعى برهانلره إستنادًا، علم اليقين درجهسنده محمّدڭ (عصم) رسالتنه و حقّانيتنه ايمانلرى، اويله كلّى بر شهادتدر كه؛ اونلرڭ عمومى قدر بر ذكاسى بولونميان قارشيلرينه چيقاماز.
ايشته او حدسز شاهدلردن بريسى، بو زمانده رسالۀِ نوردر كه؛ منكِرلر اوڭا قارشى هيچ بر چاره بولامدقلرندن، ضابطه و عدليهيى آلداتوب محكمه أليله صوصديرماسنه چاليشييورلر.
اون ايكنجيسى:
عالمِ إسلامده هر برى اُمّتڭ أهمّيتلى بر قسمنى دائرۀِ درسنه آلوب خارقه إرشاد و كرامتلرله معنوى ترقّى ايتديرن و حجّتلر يرنده مشاهداته، كشفياته طايانان و أقطاب دينيلن أڭ درين أهلِ تحقيق و حقيقت، روحانى ترقّيلرنده محمّدڭ (عصم) رسالتنى و صادقيتنى و أڭ يوكسك مرتبۀِ حقّانيتده بولونديغنى كشفًا و شهودًا گوروب متّفقًا و متطابقًا نبوّتنه شهادتلرى اويله بر إمضادر كه؛ اونلرڭ عمومى قدر بر يوكسك مرتبۀِ كمالاتى قزانميان او إمضايى بوزاماز.
اون اوچنجى شهادت:
درت كلّى و چوق گنيش و قطعى حجّتلردن عبارتدر:
﴿وَبِشَهَادَةِ الْاَزْمِنَةِ الْمَاضِيَّةِ بِتَوَاتُرِ بَشَارَاتِ الْكَوَاهِنِ وَالْهَوَاتِفِ وَالْعُرَفَاءِ فِى الْاَدْوَارِ السَّالِفٖينَ وَبِمُشَاهَدَةِ بَشَارَاتِ الرُّسُلِ وَالْاَنْبِيَاءِ وَبِشَهَادَتِهِمْ وَبَشَارَتِهِمْ عَلَيْهِمُ السَّلَامُ بِرِسَالَةِ مُحَمَّدٍ عَلَيْهِ الصَّلَاةُ وَالسَّلَامُ فِى الْكُتُبِ الْمُقَدَّسَةِ﴾
بو فقرهنڭ قيصهجه بر مئالى بوراده بيان ايديلهجك و ايضاحاتى و سندلرى ذو الفقارڭ معجزاتِ أحمديه قسمنڭ آخرنده مكمّل وار.
يعنى: گچمش زمانلرده نوعِ بشرڭ مشاهير و نامدارلرندن باشده أنبيا اولارق عارفلر، كاهنلر، هاتفلر متّفقًا محمّدڭ (عصم) رسالتنه و گلهجگنه إرهاصات نوعندن غايت صريح و مكرّر خبر ويردكلرينى نقلِ صحيح و بر قسمنى تواترله تاريخ و سِيَر و حديث كتابلرنده قيد و قبول ايديلمسنه و معجزاتِ أحمديه رسالهسنده او بيڭلر إخباراتڭ أڭ قوّتلى و قطعى قسمنى تفصيلًا بياننه بناءً اوڭا حواله ايدوب غايت قيصه بر إشارتله ديرز كه:
أنبيالر، مقدّس سماوى كتابلرده محمّدڭ (عصم) نبوّتنه دائر تورات، إنجيل، زبورڭ يوزر آيتلرنده صراحته ياقين قسمندن يگرمى آيتلرى اون طوقوزنجى مكتوبده يازيلمش. خرستيان و يهوديلر طرفندن چوق تحريفاتيله برابر، ينه نبوّتِ أحمديهيى خبر ويرن يوز آيتى حسينِ جسرى كتابنده يازمش.
كاهنلر ايسه، باشده مشهور شِقّ و سطيح اولارق، روحانى و جنّ واسطهسيله غيبدن خبر ويرن و شيمدى مديوم دينيلن تواتر بر نقلِ صحيح ايله پيغمبرڭ گلهجگنه و فارس دولتنى قالديرهجغنه صريح بر صورتده خبر ويردكلرى و شبهه قالديرماز بر طرزده ياقينده بر پيغمبر حجازده ظهورينى مكرّر سويلهدكلرى گبى...
عارفِ بِاللّٰه قسمندن پيغمبرڭ جدلرندن كعب ابن لُؤى و يمن و حبش پادشاهلرندن سيف ابن ذىيزن و تُبَّعْ گبى چوق عارفلر، او زمان أوليالرى پك صريح بر صورتده محمّدڭ (عصم) رسالتندن خبر ويروب شعرلرله إعلان ايتمشلر. اون طوقوزنجى مكتوبده، أهمّيتلى و قطعى بر قسمى يازيلمش. حتّى او پادشاهلردن بريسى ديمش: «بن، محمّده (عصم) خدمتكار اولماسنى بو سلطنته ترجيح ايدرم.» بريسى ده ديمش: « آه بن اوڭا يتيشسه ايدم، اونڭ عمِّ زادهسى اولوردم.» يعنى: حضرتِ على گبى فدائى بر خدمتكارى و وزيرى اولوردم. هر نه ايسه، (تاريخ و سِيَر كتابلرى بو خبرلرى تمامًا نشر ايله) بو عارفلر، رسالتِ محمّديهيه (عصم) قوّتلى و كلّى بر شهادتله صادقيتنه إمضا باصييورلر.
هم او عارفلر و كاهنلر گبى رسالتِ محمّديهيى (عصم) غيبى خبر ويرن و سوزلرى ايشيديلن و شخصلرى گورونمهين هاتف دينيلن روحانيلر، پك صريح بر صورتده محمّدڭ (عصم) نبوّتندن خبر ويردكلرى گبى؛ چوق مخبرلر، حتّى صنمه كسيلن قربانلر و صنملر و مزار طاشلرى نبوّتندن خبر ويرمهلريله اونڭ رسالتنه و حقّانيتنه إمضا باصوب تاريخ لسانيله شهادت ايتمشلر.
اون دردنجى شهادت:
كائناتڭ قوّتلى شهادتنه إشارت ايدن بو عربى فقره:
﴿وَبِشَهَادَةِ الْكَائِنَاتِ بِغَايَاتِهَا وَبِالْمَقَاصِدِ الْاِلٰهِيَّةِ فٖيهَا عَلَى الرِّسَالَةِ الْمُحَمَّدِيَّةِ الْجَامِعَةِ بِسَبَبِ تَوَقُّفِ حُصُولِ غَايَاتِ الْكَائِنَاتِ وَالْمَقَاصِدِ الْاِلٰهِيَّةِ مِنْهَا وَتَقَرُّرِ قِيْمَتِهَا وَوَظَائِفِهَا وَتَبَارُزِ حُسْنِهَا وَكَمَالِهَا وَتَحَقُّقِ حِكَمِ حَقَائِقِهَا عَلَى الرِّسَالَةِ الْاِنْسَانِيَّةِ لَاسِيَّمَا عَلَى الرِّسَالَةِ الْمُحَمَّدِيَّةِ اِذْ هِىَ الْمُظْهِرَةُ وَالْمَدَارُ الْاَتَمُّ لَهَا وَلَوْلَاهَا لَصَارَتْ هٰذِهِ الْكَائِنَاتُ الْمُكَمَّلَةُ وَالْكِتَابُ الْكَبٖيرُ ذُو الْمَعَانِى السَّرْمَدِيَّةِ هَبَاءً مَنْثُورًا مُتَطَايِرَةَ الْمَعَانٖى مُتَسَاقِطَةَ الْكَمَالَاتِ وَهُوَ مُحَالٌ مِنْ وُجُوهٍ وَجِهَاتٍ﴾
آيت الكبرا، بو عربى فقرهنڭ مئالنه دائر ديمش: بو كائنات، ناصلكه كندينى ايجاد و إداره و ترتيب ايدن و تصوير و تقدير و تدبير ايله بر سراى، بر كتاب گبى، بر سرگى، بر تماشاگاه گبى تصرّف ايدن صانعنه و كاتبنه و نقّاشنه دلالت ايدر؛ اويله ده: كائناتڭ خلقتندهكى مقاصدِ إلٰهيهيى بيلهجك، بيلديرهجك و تحوّلاتندهكى ربّانى حكمتلرينى تعليم ايدهجك و وظيفهدارانه حركاتندهكى نتيجهلرى درس ويرهجك و ماهيتندهكى قيمتنى و ايچندهكى موجوداتڭ كمالاتنى إعلان ايدهجك و «نرهدن گلييورلر؟ و نرهيه گيدهجكلر؟ و نه ايچون بورايه گلييورلر؟ و چوق طورمييورلر، گيدييورلر؟» دييه دهشتلى سؤاللره جواب ويرهجك و او كتابِ كبيرڭ معنالرينى و آياتِ تكوينيهسنڭ حكمتلرينى تفسير ايدهجك بر يوكسك دلاّل، بر طوغرى كشّاف، بر محقّق استاد، بر صادق معلّم ايستديگى و إقتضا ايتديگى و هر حالده بولونماسنه دلالت ايتديگى جهتله؛ ألبته بو وظيفهلرى هركسدن زياده ياپان محمّد عليه الصلاة والسلامڭ حقّانيتنه و بو كائنات خالقنڭ أڭ يوكسك و صادق بر مأمورى اولديغنه قوّتلى و كلّى شهادت ايدوب (اَشْهَدُ اَنَّ مُحَمَّدًا رَسُولُ اللهِ) دير.
أوت محمّدڭ (عصم) گتيرديگى نور ايله كائناتڭ ماهيتى، قيمتى، كمالاتى و ايچندهكى موجوداتڭ وظيفهلرى و نتيجهلرى و مأموريتلرى و قيمتلرى بيلينير، تحقّق ايدر. و كائنات باشدن باشه غايت معنيدار مكتوباتِ إلٰهيه و مجسّم بر قرآنِ ربّانى و محتشم بر مشهرِ آثارِ سبحانيه اولور. يوقسه عدم و هيچلك و زوال و فنا قراڭلقلرنده يووارلانان قارمهقاريشيق وحشتلى بر ويرانه و دهشتلى بر ماتمخانه ماهيتنه دوشر. بو حقيقته بناءً، كائناتڭ كمالاتى و حكمتلى تحوّلاتى و سرمدى معنالرى، قوّتلى بر طرزده (نَشْهَدُ اَنَّ مُحَمَّدًا رَسُولُ الله) دير.
اون بشنجى شهادت:
پك چوق قدسى شهادتلرى إحتوا ايدن، بو كائناتده تصرّف ايدهرك ذرّاتدن سيّاراته قدر بتون تحوّلات و حركات و سكنات و حيات و ممات گبى بتون تصرّفات أمريله، إرادهسيله، قوّتيله بولونان ذاتِ واجب الوجودڭ إجراآتِ ربوبيتى و أفعالِ رحمانيتى جهتنده رسالتِ محمّديهيه (عصم) مقدّس شهادتنه إشارت ايدن، بو گلن عربى فقرهدر:
﴿وَبِشَهَادَةِ صَاحِبِ الْكَائِنَاتِ وَخَلَّاقِهَا وَمُتَصَرِّفِهَا عَلَى الرِّسَالَةِ الْمُحَمَّدِيَّةِ بِاَفْعَالِ رَحْمَانِيَّتِهٖ وَبِاِجْرَااٰتِ رُبُوبِيَّتِهٖ كَفِعْلِ الرَّحْمَانِيَّةِ بِاِنْزَالِ الْقُرْاٰنِ الْمُعْجِزِ الْبَيَانِ عَلَيْهِ وَبِاِظْهَارِ اَنْوَاعِ الْمُعْجِزَاتِ عَلٰى يَدَيْهِ وَبِتَوْفٖيقِهٖ وَحِمَايَتِهٖ فٖى كُلِّ حَالَاتِهٖ وَبِاِدَامَةِ دٖينِهٖ بِكُلِّ حَقَائِقِهٖ وَبِاِعْلَاءِ مَقَامِ حُرْمَتِهٖ وَشَرَفِهٖ وَاِكْرَامِهٖ عَلٰى جَمٖيعِ الْمَخْلُوقَاتِ بِالْمُشَاهَدَةِ وَالْعَيَانِ وَكَفِعْلِ رُبُوبِيَّتِهٖ بِجَعْلِ رِسَالَتِهٖ شَمْسًا مَعْنَوِيَّةً لِكَائِنَاتِهٖ وَبِجَعْلِ دٖينِهٖ فِهْرِسْتَةَ كَمَالَاتِ عِبَادِهٖ وَبِجَعْلِ حَقٖيقَتِهٖ مِرْاٰةً جَامِعَةً لِتَجَلِّيَاتِ اُلُوهِيَّتِهٖ وَبِتَوْظٖيفِهٖ بِوَظَائِفَ ضَرُورِيَّةٍ لَازِمَةٍ لِوُجُودِ الْمَخْلُوقَاتِ فٖى هٰذِهِ الْكَائِنَاتِ كَلُزُومِ الرَّحْمَةِ وَالْحِكْمَةِ وَالْعَدَالَةِ وَكَضَرُورَةِ لُزُومِ الْغِذَاءِ وَالْمَاءِ وَالْهَوَاءِ وَالضِّيَاءِ﴾
بو پك قطعى و چوق گنيش و قدسى شهادتڭ تفصيلاتنى رسالۀِ نوره حواله ايدوب غايت قيصهجق بر إشارتله مئالِ إجماليسنه باقهجغز:
أوت بو كائناتده، گوزيمز اوڭنده بو منتظم تصرّفاتى ايچنده عدالت و حكمت ايله و رحمت و عنايت و حمايت ايله هر زمان اييلرى حمايه و فنالرى و يالانجيلرى طوقاتلامق، ربوبيتڭ بر عادتى اولماسندن، أفعالِ رحمانيت مقتضاسيله بر قرآنِ معجز البيانى محمّدڭ (عصم) ألنه ويرمهسى و بيڭه ياقين معجزهلرڭ پك چوق أنواعنى اوڭا ويرمهسى و بتون حالاتنده و أڭ تهلكهلى وضعيتلرنده شفقتكارانه حمايه و حتّى گوگرجين و ئورومجكله محافظه ايتمهسى و بيوك وظيفهلرنده اونى تام موفّق ايتمهسى و ديننى بتون حقيقتلريله إدامهسى و إسلاميتنى زمينڭ و نوعِ بشرڭ باشنه گچيرمسى و بتون مخلوقات اوستنده بر مقامِ شرف و مشاهيرِ إنسانيهنڭ فوقنده دائمى بر رتبۀِ مقبوليت و دوست و دشمنڭ إتّفاقيله أڭ يوكسك خصلتلرى طاشييان بر شخصيتى ويرمكله، بشرڭ بشدن بريسنى اوڭا اُمّت ايتمهسى غايت قطعى بر طرزده صادقيتنه و رسالتنه شهادت ايتديگى گبى، أفعالِ ربوبيت جهتنده دخى گورويورز كه؛ بو عالمڭ متصرّفى و مدبّرى، محمّدڭ (عصم) رسالتنى بو كائناته بر معنوى گونش ياپوب، (نور رسالهلرنده إثبات ايديلديگى گبى) اونڭ ايله بتون قراڭلقلرى إزاله و نورانى حقيقتلرينى گوستروب و بتون ذىشعورى، بلكه كائناتى حياتِ باقيه مژدهسيله سَوينديرديگى گبى؛ ديننى دخى بتون مقبول أهلِ عبادتڭ فهرستۀِ كمالاتى و حركاتِ عبوديتده صاغلام بر پروغرام ياپماسى گبى محمّدڭ (عصم) شخصيتِ معنويهسى اولان حقيقتنى، قرآنڭ و جوشنڭ دلالتيله تجلّياتِ الوهيتنه بر آيينۀِ جامعه ياپماسى و سابقًا إشارت ايتديگمز حقيقتلرڭ و اون درت عصرده هر گون امّتنڭ بتون حسناتلرينڭ بر مِثلنى قزانماسنڭ و حياتِ إجتماعيه و معنويه و بشريهدهكى آثارينڭ دلالتيله، نوعِ بشره أڭ يوكسك رئيس و مقتدا و استاد ياپماسى؛ و اونى بيوك و قدسى وظيفهلرله بشرڭ إمدادينه گوندروب رحمت، حكمت، عدالت، غدا، هوا، ماء، ضيا درجهسنده إنسانلرى اونڭ ديننه، شريعتنه، إسلاميتدهكى حقيقتلرينه محتاج (حاشيه)3 ياپماسى ايله اون ايكى كلّى و قطعى حجّتلرله رسالتِ محمّديهيه (عصم) قدسى شهادت ايتديگى حالده، عجبا هيچ ممكن ميدر كه؛ سينك قنادينڭ و بر چيچگڭ تنظيمندن لاقيد قالميان بو كائنات صاحبنڭ بو درجه كلّى و گنيش شهادتلرينه مظهر اولان رسالتِ محمّديه (عصم)، كائناتڭ معنوى بر گونشى اولماسين.
ايشته بو اون بش كلّى شهادتلر، هر برى پك چوق شهادتلرى، حتّى «اوچنجى شهادت» معجزات لسانيله بيڭ شهادتى إحتوا ايدوب اويله بر قطعيتله و قوّتله (اَشْهَدُ اَنَّ مُحَمَّدًا رَسُولُ اللهِ) اولان دعوايى إثبات و تحقّقنى و قيمتنى و أهمّيتنى إعلان ايتمش كه؛ هر گون بش دفعه عالمِ إسلام، يوزر ميليون لسانلر ايله تشهّدده او دعوايى كائناته إعلان ايتديگى گبى؛ او دعوانڭ أساسى اولان حقيقتِ محمّديه (عصم)، كائناتڭ چكردكِ أصليسى، بر سببِ خلقتى و أڭ مكمّل ميوهسى اولديغنى ميليارلر أهلِ ايمان تردّدسز تصديق ايدهرك قبول ايتمشلر.
و بو كائناتڭ صاحبى (جلّ جلاله) او شخصيتِ معنويۀِ محمّديهيى (عصم) سلطنتِ ربوبيتنه بر يوكسك دلاّلى و كائنات طلسمنڭ و خلقت معمّاسنڭ بر طوغرى كشّافى و لطف و رحمتنڭ بر پارلاق مثالى و شفقت و محبّتنڭ بر بليغ لسانى و عالمِ باقيدهكى حياتِ دائمه و سعادتِ أبديهنڭ أڭ قوّتلى مژدهجيسى و ألچيلرينڭ أڭ صوڭ و بيوگى بر رسول أيلهمش.
عجبا بو ماهيتدهكى بر حقيقته قناعت ايتمهين ويا أهمّيت ويرمهين، نه درجه خسارت و خطا و بلاهت و جنايت ايتديگنى قياس أيلهسين!..
ايشته نمازدهكى فاتحه، ناصل ايكنجى قسمده إشاراتيله، تشهّدده (اَشْهَدُ اَنْ لَا اِلٰهَ اِلَّا اللّٰهُ) دهكى حقيقتِ توحيد دعواسنه قطعى حجّتلرى گوسترر، حدسز إمضالر باصار. بو اوچنجى قسمده دخى ينه تشهّدده (وَاَشْهَدُ اَنَّ مُحَمَّدًا رَسُولُ اللهِ) ده حقيقتِ رسالت دعواسنه قوّتلى شاهدلرى گتيروب نهايتسز تصديق إمضالرينى باصديرر.
يا أرحم الرّاحمين! بو رسولِ أكرمڭ (عصم) حرمتنه، بزى اونڭ شفاعتنه مظهر و سنّتنڭ إتّباعنه موفّق و دارِ سعادتده اونڭ آل و أصحابنه قومشو أيله! آمين.. آمين.. آمين..
(اَللّٰهُمَّ صَلِّ وَسَلِّمْ عَلَيْهِ وَعَلٰى اٰلِهٖ وَصَحْبِهٖ بِعَدَدِ حُرُوفِ الْقُرْاٰنِ الْمَقْرُوئَةِ وَالْمَكْتُوبَةِ اٰمٖينَ)
﴿سُبْحَانَكَ لَا عِلْمَ لَنَٓا اِلَّا مَا عَلَّمْتَنَٓا اِنَّكَ اَنْتَ الْعَلٖيمُ الْحَكٖيمُ﴾
* * *