حرف، غيرڭ معناسنى ايضاح ايچون بر آلَت، بر خادم اولديغى گبى؛ شو موجودات ده، أسماءِ حسنىنڭ تجلّياتنى إظهار، إفهام، ايضاح ايچون بر طاقم إلٰهى مكتوبلردر كه، ايچلرنده يازيلى دلائل، براهين، خوارق معجزۀِ قدرتدر. موجودات بو وجهله نظره آلينمهسى؛ علم، ايمان، حكمتدر. شايد إسم گبى مستقل و مقصودِ بِالذّات جهتيله باقيليرسه، كفران و جهلِ مركّب اولور.
و كذا مسائلِ منطقيهدن «كلّى» ايله «كلّ» آراسندهكى فرق ايله، ربوبيته دائر چوق مسئلهلرى اوگرنمش بولونويورم. جمال ايله أحديت (كُلِّىٌّ ذُو جُزْئِيَّاتٍ) شمولنه داخلدر. جلال ايله واحديت (كُلٌّ ذُو اَجْزَاءٍ) عنواننه داخلدر.
إعلم أيّها العزيز! دنيا، عالمِ آخرته بر فهرسته حكمندهدر. بو فهرستهده عالمِ آخرتڭ مهمّ مسئلهلرينه اولان إشارتلردن برى، جسمانى اولان رزقلردهكى لذّتلردر. بو فانى، رذيل، ذليل دنياده بو قدر نعمتلرى إحساس و إفاضه ايتمك ايچون إنسانڭ وجودنده ياراديلان حواس، حسّيات، جهازات، أعضا گبى آلات و أدواتندن آڭلاشيلير كه، عالمِ آخرتده ده (تَجْرٖى مِنْ تَحْتِهَا الْاَنْهَارُ) قصرلرڭ آلتنده، أبديته لايق جسمانى ضيافتلر اولاجقدر.
إعلم أيّها العزيز! إنسانڭ خوف و محبّتى خلقه توجّه ايتديگى تقديرده، خوف بر بلا، بر ألم اولور. محبّت بر مصيبت گبى اولور. زيرا او قورقديغڭ آدم، يا سڭا مرحمت ايتمز ويا سنڭ إسترحاملريڭى ايشيتمز. محبّت ايتديگڭ شخص ده، يا سنى طانيماز ويا محبّتڭه تنزّل ايتمز. بناءً عليه خوفڭ ايله محبّتڭى دنيا و دنيا إنسانلرندن چوير. فاطرِ حكيمه توجيه ايت كه، خوفڭ اونڭ مرحمت