معرفتِ ذو الجلاله سَوق ايدر. شو فطرتدهكى إنجذاب و جذبه، بر حقيقتِ جاذبهدارڭ جذبيلهدر.
بو نكتهلرى بيلدكدن صوڭره شو برهانِ أنفسى اولان وجدانه مراجعت ايت. گورهجكسڭ كه، قلب بدنڭ أقطارينه، نشرِ حيات ايتديگى گبى، قلبدهكى عقدۀِ حياتيه اولان معرفتِ صانعدر كه، إستعداداتِ غيرِ محدودۀِ إنسانيه ايله متناسب اولان آمال و ميولِ مُتَشَعِّبَهيه نشرِ حيات ايدر. لذّتى ايچنه آتار و قيمت ويرر و بسط و تمديد ايدر. ايشته نقطۀ إستمداد.
و غاوغه و مزاحمتڭ ميدانى اولان دغدغۀ حياته هجوم گوسترن عالمڭ، بيڭلرجه مصيبت و مزاحمهلره قارشى يگانه نقطۀ إستناد ينه معرفتِ صانعدر.
أوت هر شيئى حكمت و إنتظام ايله ايشلهين بر صانعِ حكيمه إعتقاد ايتمزسه و على العميا كور تصادفلره حواله ايدرسه و او بليّاته قارشى ألندهكى قدرتڭ عدمِ كفايتنى دوشونسه، ايستر ايستهمز توحّش، دهشت، تلاش، خوفدن مركّب بر حالتِ جهنّمنمون و جگرشكافه دوشهجكدر. او ايسه أشرف و أحسنِ مخلوقات اولان روحِ إنسانيتڭ هر شيدن زياده پريشان اولديغنى إستلزام ايدر. او ايسه، إنتظامِ كاملِ كائناتدهكى نظامِ أكمله ضد اولويور. شو نقطۀِ إستمداد و نقطۀِ إستناد ايله بو درجه نظامِ عالمده حكمفرمالق، حقيقتِ نفس الأمريهنڭ خاصّۀِ منحصرهسى اولديغى ايچون، هر وجدانده ايكى پنجره اولان شو ايكى نقطهدن صانعِ ذو الجلال معرفتنى قلبِ بشره دائما تجلّى ايتديرييور. عقل گوزينى قپاسه ده، وجدانڭ گوزى دائما آچيقدر. صانعِ ذو الجلال بو درت برهانِ عظيمڭ قطعى شهادتلريله واجب الوجود، أزلى، واحد، أحد، فرد، صمد، عليم، قدير، مريد، سميع، بصير، متكلّم، حىّ، قيّوم اولديغى گبى بتون أوصافِ جلاليه و جماليه ايله متّصفدر. زيرا مقرّردر كه: مصنوعدهكى فيضِ كمال صانعڭ ظلِّ تجلّيسندن