(بو قسم، مؤلّفڭ كندى توركجهسيدر)
١٣٣٩ تاريخنده، مجلسِ مبعوثانه خطابًا يازديغم بر خطبهنڭ صورتيدر
﴿بِسْمِ اللّٰهِ الرَّحْمٰنِ الرَّحٖيمِ﴾
﴿اِنَّ الصَّلٰوةَ كَانَتْ عَلَى الْمُؤْمِنٖينَ كِتَابًا مَوْقُوتًا﴾
أى مجاهدينِ إسلام! أى أهلِ حلّ و عقد! بو فقيرڭ بر مسئلهده اون سوزينى، بر قاچ نصيحتنى ديڭلهمڭزى رجا ايدييورم.
أوّلا: شو مظفّريتدهكى خارق العاده نعمتِ إلٰهيه بر شكران ايستر كه دوام ايتسين، زياده اولسون. يوقسه، نعمت شكرى گورمزسه گيدر. مادام كه قرآنى، اللّٰهڭ توفيقيله دشمنڭ هجومندن قورتارديڭز؛ قرآنڭ أڭ صريح و أڭ قطعى أمرى اولان «صلات» گبى فرائضى إمتثال ايتمهڭز لازمدر. تا اونڭ فيضى بويله خارقه صورتنده اوستڭزده توالى و دوام ايتسين.
ثانيًا: عالمِ إسلامى مسرور ايتديڭز، محبّت و توجّهنى قزانديڭز. لٰكن او توجّه و محبّتڭ إدامهسى، شعائرِ إسلاميهيى إلتزام ايله اولور. زيرا، مسلمانلر إسلاميت حسابنه سزى سَورلر.