أوت واسطۀِ رزقِ حلال، إقتدار و إختيار ايله اولماديغنى؛ بلكه، عجز و ضعف ايله اولديغنى آڭلامق ايچون باليقلر ايله تيلكيلرى، ياورولر ايله جاناوارلرى، آغاجلر ايله حيوانلرى موازنه ايتمك كافيدر.
ديمك دردِ معيشت ايچون نمازينى ترك ايدن، او نفره بڭزر كه: تعليمى و سپرينى بيراقوب، چارشوده ديلنجيلك ايدر. فقط نمازينى قيلدقدن صوڭره جنابِ رزّاقِ كريمڭ مطبخۀِ رحمتندن تعييناتنى آرامق، باشقهلره بار اولمامق ايچون كنديسى بِالذّات گيتمك؛ گوزلدر، مردلكدر، او دخى بر عبادتدر.
هم إنسان عبادت ايچون خلق اولونديغنى، فطرتى و جهازاتِ معنويهسى گوسترييور. زيرا حياتِ دنيويهسنه لازم اولان عمل و إقتدار جهتنده أڭ أدنا بر سرچه قوشنه يتيشمز. فقط حياتِ معنويه و اُخرويهسنه لازم اولان علم و إفتقار ايله تضرّع و عبادت جهتنده حيواناتڭ سلطانى و قوماندانى حكمندهدر.