ايتمك درجهسنده دردِ معيشته طالوب، فرائضى ترك و معيشت يولنده راست گله گناهلرى ايشلهين فاسقِ خاسردر. و او تعليم و تعليمات ايسه، (باشده نماز) عبادتدر. و او حرب ايسه؛ نفس و هوا، جنّ و إنس شيطانلرينه قارشى مجاهده ايدوب گناهلردن و أخلاقِ رذيلهدن قلب و روحنى هلاكتِ أبديهدن قورتارمقدر. و او ايكى وظيفه ايسه؛ بريسى، حياتى ويروب بسلهمكدر. ديگرى؛ حياتى ويرنه و بسلهينه پرستش ايدوب يالوارمقدر، اوڭا توكّل ايدوب أمنيت ايتمكدر.
أوت أڭ پارلاق بر معجزۀِ صنعتِ صمدانيه و بر خارقۀِ حكمتِ ربّانيه اولان حياتى كيم ويرمش، ياپمش ايسه؛ رزقله او حياتى بسلهين و إدامه ايدن ده اودر. اوندن باشقه اولماز... دليل مى ايسترسڭ؟ أڭ ضعيف، أڭ آبدال حيوان؛ أڭ ايى بسلهنير (ميوه قوردلرى و باليقلر گبى). أڭ عاجز، أڭ نازك مخلوق؛ أڭ ايى رزقى او ير (چوجقلر و ياورولر گبى).