بر قاچ دفعه برائت قزانان رسالۀِ نورڭ بر قاچ ولايتده حقسز مصادرهسنه دائر، نورڭ يوكسك بر طلبهسنڭ محاكمهسندهكى مدافعهسندن بر پارچهدر
٣ شباط ١٩٥٦
ايكنجى صلح جزا محكمهسى يوكسك مقامنه،
دياربكر
محكمۀِ عادلهڭزڭ حضورينه چيقمقدن فوق العاده ممنونم. عادل محكمهلر؛ كائنات خالقنڭ حق إسمنڭ، عادل إسمنڭ و داها چوق أسماءِ إلهيهسنڭ تجلّيگاهيدر. حق نامنه حكم ايدن، عادلِ مطلق حسابنه عدالت ايدن و حقيقى، إسلامى بر عدالت اولان كرسئِ معلاّ نه يوكسكدر، نه مبجّلدر... حق طانيماز مغرور ظالملرى حضوريڭزده سرفرو ايتديرن، حقسزلرى حقّى تسليمه إجبار ايدن عادل محكمهلر، أڭ يوكسك تبجيله و أڭ عالى إحترامه سزادرلر.
ظلم و غدر ايله حقوقى إخلال ايديلمش، حيثيت و شرفى پايمال ايديلمش مظلوملرڭ، حضورنده أخذِ موقع ايله تظلّمِ حال ايدن بيچارهلرڭ شو دنياىِ فانيده إحقاقِ حق ايچون مسندِ رأسى، محكمهلردر. شو حالده نه شرفبخش بر تختِ عاليدر كه؛ مظلوملره ملجأ و پناه، ظالملره ده خسران و تباه اولويور.
إنسانلرڭ أبرارينى ده، أشرارينى ده جمع ايدن حضورِ محاكم، اويله قورقولاجق بر ير دگلدر. بلكه محبّته، حرمته لايقدر.
سلطانلرله كولهلرى، أصيلزادهلرله آحادِ ناسى مساوى طوتان شو مقام، سلطنتدن ده مبجّلدر. خصوصيله بتون عالمِ إنسانيته دورلرڭ، عصرلرڭ آقيشى بوينجه عدالت درسنى ويرن إسلام محكمهلرى؛ أقوامِ سائرهنڭ أنگيزيسيونلرينه مقابل، عدالت نورينى بيچاره بشرڭ قره صحيفهسنه حشمتله عكس ايتديرمشدر. عدليه و عدالت تاريخمز، بونڭ بيڭلرله مثالنه شاهددر.
أزجمله بو مبارك، عدالتلى محكمهنڭ حضورنده إفتخارله عرض ايتمك ايسترم كه؛ مشهور إسلام سيّاحى و تاريخجيسى أوليا چلبى، سياحتنامهسنده دييور كه: «ايلك إستانبول قاضيسى (حاكمى) اولان خضر بك چلبينڭ حضورنده، حشمتلى پادشاه فاتح ايله بر روم معمارى آراسنده شويله بر محاكمه جريان ايدر:
بيوك بر آبدهنڭ إنشاسنده قوللانيلهجق ايكى مرمر ستونى، فاتح بر روم معمارينه تسليم ايدر. معمار ده، فاتحڭ آرزوسنڭ خلافنه اولارق بو ستونلرى اوچر آرشين كسوب قيصهلتير. فاتح جزاءً روم معمارينڭ ألنى كسديرر. روم معمارى ده، فاتح عليهنه دعوا آچار. بونڭ اوزرينه محكمهيه جلب ايديلن بيوك پادشاه، باش كوشهيه گچمك ايستر. بردن بره حاكمڭ شو إخطاريله قارشيلاشير:
— اوطورمه بگم! خصمڭله مرافعۀِ شرعى اولاجقسڭ، آياقده برابر دور!
خضر بك چلبى؛ بو قوجه شانلى پادشاهِ مظنونه، حقسز أل كسديرديگى ايچون، كنديسنڭ ده كنديسنڭ ده ألينڭ كسيلوب قصاصه تابع اولديغنى بيلديرر. فقط معمار قصاصى ايستهمديگى ايچون، بيوك فاتح گونده اون آلتون تضميناته محكوم اولويور و حتّى قصاصدن قورتولديغى ايچون بو تضميناتى كنديلگندن يگرمى آلتونه چيقارير.»
إسلام محكمهسنڭ عدالتنڭ شانلى مثاللرندن برى اولان شو مثال، بزه أڭ حشمتلى حكمدارلرله أڭ عاجز فردلرڭ، حضورِ محاكمده مساوى اولديغنى گوسترييور.
ايشته بن ده بوگون، فاتح قدر شانلى، قهرمان إسلام حاكمى خضر بك چلبينڭ مقامنڭ ممثّلى و حقيقى عدالتِ قرآنيهيى أساس طوتان بر مقامڭ يرنده بولونان بر محكمهنڭ حضورنده بولونويورم. بتون قلبمى حضور و سروره قلب ايدن ممنونيتم بودر.
قهرمان أجداديمزڭ بو قدر علويتنڭ سرّى؛ قلبلرنده اللّٰه قورقوسنڭ موجوديتيله، قرآن نورينڭ و نهايتسز فيضنڭ روحلرنده يرلشمش اولماسى و قدسى حقائقه قارشى صوڭسز و نهايتسز درجهده مربوطيتلريدر. او مبارك أجداددن بزه توارث ايدن، اللّٰه و قرآن ايچون آقيتدقلرى قدسى قانلرينڭ حالا أثرلرى بولونان بو يوردده و عزيز جانلرينى فدا ايتدكلرى شو مملكتده: «قرآنڭ قدسى حقيقتلرينه خدمت ايدييور، قرآنڭ تفسيرينى اوقويور، أونده بولونديرييور.» قيديله محكمهنڭ حضورينه سَوق ايديلدم.
أوت محاكمهمز شخصمله علاقهدار اولمقدن زياده، رسالۀِ نورڭ محاكمهسيدر. رسالۀِ نور ايسه، قرآنِ معجز البيانڭ سماوى و قدسى حقائقنڭ ترشّحاتى اولمق حسبيله، او يوكسك أثرلردهكى قيمت، طوغريدن طوغرىيه قرآنه عائددر. شو حالده محاكمه ده قرآنڭ محاكمهسيدر. أهلِ توحيدڭ كتابى اولان كلام اللّٰه بتون آيات و بيّناتيله خالقِ كائناتڭ وحدانيتنى و أحديتنى إعلان ايدييور.
قرآنڭ أهلِ عقولى حيرتده بيراقان إعجازى، بلاغت و فصاحتى، نهايت درجهدهكى يوكسك اسلوبى، سلاستِ بيانى، الحاصل صوڭسز بدايع و جامعيتى ايله إنس و جنّڭ قيامته قدر گلهجك إحتياجاتنه أكمليتله كافى گلمسى، دنيا و آخرت سعادتنڭ رهبرى بولونماسى و بتون عصرلردهكى طبقاتِ بشره خطاب ايتمهسى و كائنات خالقنڭ مرضياتنى قوللرينه بيلديرهجك آيات و بيّناتى تفسير و ايضاح ايدهجك متخصّص أهلِ علمڭ بولونماسى ضرورتنه بناءً هر عصرده بيڭلر مدقّق أهلِ علم، يوز بيڭلره واران قرآنڭ تفسيرلرينى ميدانه گتيرهرك عصرلرى قرآنڭ نوريله ايشيقلانديرمشلردر.
ايشته رسالۀِ نور ده؛ بو عصرده قرآنڭ فيضيله وجود بولان، بشرڭ تكاملاتنه اويغون اولارق قرآنڭ گوسترديگى معجزهلى حقيقتلرڭ، بو تكامل ايله ساحۀِ فعله قونولديغنى بيلديرن و عصرڭ إدراكنه خطاب ايدن غايت قدسى بر تفسيردر. قرآن باشدن باشه توحيدِ إلٰهىيى إعلان ايدييور. رسالۀِ نور ده، ايمانِ بِاللّٰهى گوسترن و حقائقِ ايمانيهيى درس ويرن آيتلرى تفسير ايدييور.
ايشته محاكمهنڭ أصل موضوعى بودر.
اوتوز سنهدن بَرى گيزلى دين دشمنلرينڭ، قومونيستلرڭ و ماصونلرڭ تحريكاتيله، رسالۀِ نور شاكردلرى بر چوق محكمهلره سَوق ايديلمشدر. عادل محكمهلر ده او خائن، گيزلى دين و قرآن دشمنلرينڭ ايتدكلرى إفترالرى اينجهدن اينجهيه تدقيق ايتمشلر، «بونلرده بر صوچ يوق، كتابلر ايسه فائدهلى كتابلردر» دييهرك، چوق محكمهلر برائتله نتيجهلنمش و كسينلشهرك قضيۀِ محكمه حالنه گلديگى حالده، مملكتى عمومى بر دينسزلگه سوروكلهمك ايچون پرده آرقهسندهكى دين دشمنلرى؛ فعاليتلرينى متماديًا تازهلهمشلر، سكون و آسايشه پك چوق محتاج اولان مملكتمزى بو جهتدن ضعفه اوغراتمق ايچون عدليهلرى، محكمهلرى دائما خائنانه ترتيبلرله مشغول ايتمشلردر.
أوّلجه شفاهًا دخى عرض ايتديگم وجهله؛ سلفِ صالحينڭ بيراقديغى قدسى تفسيرلر ايكى قسمدر: بر قسمى، أحكامه دائر تفسيرلردر. بر قسمى ده، آياتِ قرآنيهنڭ حكمتلرينى و ايمان حقيقتلرينى تفسير و ايضاح ايدرلر. سلفِ صالحينڭ بو درلو تفسيرلرى چوقدر. خصوصًا غوثِ أعظم شاهِ گيلانى، إمامِ غزالى، محيى الدينِ عربى، إمامِ ربّانى گبى ذواتِ كرامڭ أثرلرى، بو قسم تفسيرلردر. بِالخاصّه مولانا جلال الدينِ رومى حضرتلرينڭ مثنوئِ شريفى ده بو طرز بر نوع معنوى تفسيردر. ايشته رسالۀِ نور، بو طرز تفسيرلرڭ أڭ يوكسگى، أڭ ممتازى و أڭ مستثناسيدر. ايشته مادام بو طرز تفسيرلر متداولدر، كيمسه ايليشمهيور، رسالۀِ نوره ده ايليشيلمهمك لازمدر. ايليشنلر، قرآنه و أجداده دشمنلقلرندن ايليشيرلر.
رسالۀِ نور، أركانِ ايمانيهيى و آياتِ قرآنيهيى تفسير ايدهرك اويله بر طرزده بيان ايدر كه؛ هيچ بر منكِر، هيچ بر دينسز، او حقيقتلرى إنكار ايدهمز. هم رياضى بر قطعيتله إثبات ايدر، گوزه گوسترر، عقلى طويورور، لطائفى قانديرر؛ آرتيق هيچ بر ايمانى و قرآنى حقيقتى إنكاره مجال قالماز. بوندن طولاييدر كه؛ دينسزلر، قومونيستلر، بو مملكتده رسالۀِ نور واركن ملعونانه فكرلرينى ساحۀِ تطبيقه قويامدقلرندن و بر معنوى بكجى گبى رسالۀِ نور دائما قارشيلرينه چيقديغندن، رسالۀِ نورڭ هر وجهله نشرينه سد چكمهيى غايه ايدينمشلردر.
رسالۀِ نور، تحقيقى ايمان درسلرى ويرر. شاكردلرينى هر درلو فنالقدن آليقويار. قلبلره طوغريلق آشيلار. اونى حقّيله آڭلايان، آرتيق فنالق ياپاماز. اونڭ ايچوندر كه، بوگون مملكتڭ هر طرفندهكى رسالۀِ نور طلبهلرى، آسايشڭ معنوى محافظى حكمندهدرلر. شيمدىيه قدر هيچ بر حقيقى نور طلبهسنده آسايشه منافى بر حركت گورولمهمش، عادتا ضابطهنڭ معنوى يارديمجيسى اولمشلردر. رسالۀِ نور طلبهلرينڭ رضاءِ إلٰهيدن باشقه، أعمالِ اُخرويهيه متوجّه اولمقدن غيرى دوشونجهلرى يوقدر. شو حالده رسالۀِ نوره غرضكار ترتيبلر حاضرلايانلر، پرده آرقهسندهكى معلوم دين دشمنلرندن باشقه كيمسه دگلدر.
يوقاريدهكى معروضاتمزده بر چوق محكمهلرڭ برائت قرارلرينڭ موجوديتنى عرض ايتمشدم. ألده ايدهبيلديگم تاريخ و نومرولرينى بيان ايدهرك، او عادل و يوكسك محكمهلره ميليونلر نور شاكردلرى نامنه منّتدارلغمزى بيلديرمك ايسترم. عموم رسالهلرڭ برائت و إعادهسى حقّنده دڭزلى آغير جزا محكمهسنڭ ١٥/حزيران/١٩٤٤ تاريخلى برائت قراريله، إستانبول أمين اوڭى آغير جزا محكمهسنڭ ١٩٥٣ تاريخ و ١٣٧/١٩٥١ أساس و ٢٧/١٩٥٢ قراريله كه؛ گچن جلسهده سبيل الرّشاد غزتهسنڭ تقديم ايتديگم نسخهسندهكى بيلديريلن برائت قراريدر. آيريجه محكمۀِ عاليڭزه صورتِ مخصوصهده عرض و تقديم ايتديگم عصاىِ موسى داخل عموم رسالۀِ نور كلّياتنڭ مرسين آغير جزا محكمهسنڭ ١٧/١٩٥٤ أساس ٤٢١/١٩٥٤ قرار و ١٩٥٤/٤/٩ تاريخلى برائت قرارينڭ موجوديتلرى، محكمهلرڭ تأميننده اولارق هيچ بر ألڭ رسالۀِ نوره ايليشمهمسنى تضمّن ايتديگى حالده، مستور دشمنلرڭ خائنانه فعاليتلريله بو سفر ده تخصيصًا عصاىِ موسى قصد ايديلهرك عادل و يوكسك محكمهيه گلمش بولونيورز.
رسالۀِ نور، ايمانِ بِاللّٰه ايله توحيدى أڭ يوكسك درجهده، عين اليقين و حقّ اليقين بر صورتده گوزه گوستروب بتون لطائفى أعظمى درجهده طويورماسيله ايمانى تقليددن قورتاروب، درجۀِ تحقيقه يوكسلتير. عصاىِ موسىده ايسه بو علوى و قدسى ايمان درسى، أڭ پارلاق بر صورتده، هم گورولمهمش إحتشام ايله إثبات ايديلديگندن، يوز اوتوز جلده ياقلاشان رسالۀِ نور تفسيرينڭ عادتا خلاصهسى حكمندهدر.
بتون سماوى كتابلرڭ و بتون پيغمبرلرڭ أڭ بيوك دعواسى خالقِ كائناتڭ الوهيت و وحدانيتنى إعلاندر. قرآن باشدن باشه توحيدى گوسترر. ايشته عصاىِ موسى ده؛ مسلمانلره و عموم بشريته جنابِ حقّڭ برلگنى و دلائلِ وحدانيتنى گونش گبى گوسترمسندن، أڭ بيوك بر متفكّر ايله بر دينسزى و بر فيلسوفى حقائقِ ايمانيهيى تصديقه مجبور ايتديگى گبى؛ أڭ عامى بر آدمڭ ده أڭ يوكسك حقيقتلرى، أڭ بيوك بر سهولتله آڭلاماسنى تأمين ايدن، توحيدى گوسترن، آياتِ قرآنيهنڭ أڭ قدسى بر تفسيريدر. عينًا إسمى گبيدر. ناصلكه موسى عليه السلام ألندهكى عصاسيله قره طاشلردن، چوراق واديلردن، آتش فيشقيران چوللردن آبِ حياتى فشقيرتديغى گبى، عصاىِ موسى ده، وحدانيتِ إلٰهيهيى إثبات ايتمهسيله دنيا و آخرت عالملرينى ضيادار ايدهجك توحيد نورلرينى فيشقيرتييور؛ طاش گبى قلبلرى، موم گبى أريتييور، شوقى ايله گوڭللرى تسخير ايدييور.
هم مادام محكمهلرڭ برائتى موجود و وجدان حرّيتى وار و هيچ بر مملكتده علم ايله إشتغال ايدنلره ايليشيلمييور؛ شو حالده علومِ أوّلين و آخرينى جامع اولان رسالۀِ نوره ده ايليشمهمك لازمدر.
رسالۀِ نورڭ يوردڭ آسايشنه، سكون و سلامتنه خدمت ايتديگنه دليل: ميليونلر طلبهلرينڭ هيچ بريسنده بر وقعهنڭ گورولمهمش اولماسيله برابر، هپسنڭ ده ناموسكارانه فعاليتلريله مستقيم گورولمهلريدر. رسالۀِ نور كلّياتى، عصاىِ موسى ايله برلكده كتبخانۀِ مساعيمڭ حريمندن آلينمهسى ايله، هر درلو صوچ عنصرينڭ موجوديتنى بِالذّات رفع ايدر. زيرا هر منوّر آدم، كتبخانهسنده هر نوع كتابى بولونديرر، اوقور، تدقيق ايدر. ملعونانه فكرلرى نشر ايدن و آنارشيستلگى تلقين ايدن كتابلر بيله كتبخانهلرده آچيقجه تدقيقه تابعدر.
خلاصه: رسالۀِ نور، قرآنڭ بو عصرده أڭ يوكسك و أڭ قدسى بر تفسيريدر. حقيقتلرى سماويدر، قرآنيدر. او حالده قرآن اقوندقجه، او ده اوقوناجقدر. رسالۀِ نور، مجوهراتِ قرآنيه حقيقتلرينڭ سرگيسيدر، پازاريدر. بو علوى پازارده هركس ايستديگى گبى تجارت ياپار. اُخروى، معنوى زنگينلكلره مظهريتى تأمين ايدر.
بو قدر معروضاتمزله إفاده ايتمك ايستدم كه: مقصديمز؛ ايمانمزى قورتارمقدر، ايمانه خدمتدر، قرآنه خدمتدر. آخرته متوجّه بر حال ايسه، هيچ بر گونا صوچ موضوعى اولاماز. متماديًا شكايتده بولونديغمز او گيزلى دين دشمنلرى، درلو درلو أنتريقهلرله، ترتيبلرله، إزعاجلرله بزلرى بو قدسى وظيفهدن منع ايتمگه اوغراشمقدهدرلر. بزلر ايسه بو قدسى يولده قرآن و ايمان ايچون هر شيئمزى فدايه سَوه سَوه حاضرز. دگل دنيوى إضطرابلر، جهنّمى عذابلر ده ويريلسه، بيچاقلرله ده دوغرانسهق، أڭ مدهش ئولوملره ده معروض بيراقيلسهق، عصرلر بوينجه ميليونلر مبارك أجداديمزڭ فداىِ جان ايتدكلرى بو قدسى حقيقته، بزم جانمز ده فدا اولسون. بر دگل، بيڭ روحم ده اولسه، قرآن ايچون، ايمان ايچون هپسنى فدا ايتمگه هر زمان حاضرم.
شو عزيز وطنڭ طاشلرى، طوپراقلرى، آبدهلرى، قبّهلرى، جامعلرى، منارهلرى، مزار طاشلرى، تربهلرى؛ قرآنڭ تبليغ ايتديگى زمزمۀِ توحيدى هايقيرييورلر. ايمان و قرآنڭ أزلى نورينى، آتوم ذرّاتنه قدر نفوذ ايدوب إعلان ايتديگى توحيد حقيقتنى، هيچ بر قوّت بو وطنڭ و بو ملّتڭ سينۀِ پاكندن سيلهمز.
محترم محكمهڭزدن، يوكسك عدالتڭزدن؛ حقائقِ قرآنيهيى، وحدانيتِ إلٰهيهيى حشمتله إعلان ايدن و توحيدى أعظمى درجهده گوسترن رسالۀِ نور كلّياتنڭ إعادهسنه و برائتنه قرار ويرمهڭزى رجا ايدرم.
رسالۀِ نور، قرآنڭ ماليدر. عرشى فرشه باغلايان كلام اللّٰه ايله ماضى جانبندهكى ميليارلر أهلِ ايمان، أوليا و أنبيا علاقهدار اولدقلرى گبى، رسالۀِ نور محكمهسيله ده معنًا علاقهداردرلر. چوق إختيارلامش أرضڭ، درت يوز ميليون مسلمان سكنهسى، رسالۀِ نورڭ برائتنه و سربستيتنه و إنتشارينه منتظردرلر.
ماضى طرفندن پردۀِ غيب آرقهسنه چكيلن مبارك أجداديمزڭ نورانى قافلهلرى، علوى مقاملرندن رسالۀِ نور محكمهسنه معنًا ناظردرلر.
مستقبل جبههسنڭ فيضكار نسللرى، برائت (حاشيه) قرارينى بكلهيورلر.
محمد قيالر
___
(حاشيه) : بو مدافعهنڭ سرد ايديلديگى محاكمه، برائتله نتيجهلنمشدر.
___
(چوق يرلرده نشر ايديلن و باش وكيله ويريلن بر حقيقتدر.)
﴿بِاسْمِهٖ سُبْحَانَهُ﴾
استاديمزڭ اوتوز بش سنهدن بَرى سياستدن چكيلديگى و يگرمى سكز سنهدر محكمهلر، سياسته قاريشديغنه دائر هيچ بر أماره بولامدقلرى حالده؛ شيمدى ياتاغنده خسته ياتاركن إستانبولڭ بعض جريدهلرينڭ إفترالرينه قارشى، أسكيدن هيئتِ وكيلهيه ويرديگى بو إستدعايى، بو دفعه مجلسِ مبعوثانه و وكيللر هيئتنه ويريلن إستدعايه ذيل ياپمغه تكرار مجبور اولدق.
خدمتنده بولونان نور طلبهلرى
(قارداشلرم! مناسبسه باش وكيله و ديندار مبعوثلره ويريلمك اوزره، إخطاره بناءً يازديريلمش غايت أهمّيتلى، محرمجه بر حقيقتدر.)
مقدّمه: قرق سنهيه ياقين سياستى ترك ايتديگمدن و أكثر حياتم بر نوع إنزواده گچديگندن، حياتِ إجتماعيه و سياسيه ايله مشغول اولماديغمدن بيوك بر تهلكهيى گورهمييوردم. بوگونلرده او دهشتلى تهلكه بو ملّتِ إسلاميه و بو مملكت و حكومتِ إسلاميهيه بيوك بر ضرر ويرمگه زمين حاضرلانييور، حسّ ايتدم. مجبوريتله، إسلاميت ملّيتى و حاكميتى و مملكتڭ سلامتى ايچون چاليشان أهلِ سياست و إجتماعياتِ بشريهيه حميت ايله چاليشانلره، بڭا غايت شدّتلى معنوى بر إخطار ايديلديگى ايچون اونلره ايكى نقطهيى بيان ايدهجگم:
برنجى نقطه: غزتهلرى ديڭلهمديگم حالده، بر ايكى سنهدر «إرتجاع ايله إتهام» كلمهسنڭ متماديًا تكرارينى ايشيدييوردم. أسكى سعيد قفاسيله دقّت ايتدم، قطعيًا گوردم كه:
سياستى دينسزلگه آلَت ياپان و بشردهكى أڭ دهشتلى وحشت و بدويلك قانونِ أساسيسنه إرتجاعيه چاليشان و حميت ماسكهسنى باشنه گچيرن گيزلى إسلاميت دشمنلرى، أنگيزيسيونه رحمت اوقوتديرهجق غدّارانه بر إتهام ايله؛ أهلِ إسلاميت، حميتِ دينيه و قوّتِ ايمانيه جهتيله سياستى او گيزلى دينسزلرڭ عكسنه اولارق دينه بر نوع آلَت گبى مساعد ياپمقله؛ يعنى إسلاميت قوّتِ معنويسندن بو حكومتِ إسلاميهيى قوّتلنديرمك و درت يوز ميليون حقيقى قارداشى آرقهسنده إحتياط قوّتى بولونديرمق و آوروپا ديلنجيلگندن قورتولمق ايچون چاليشانلره إرتجاع طامغهسنى ووروب هم اونلرى مملكته ضررلى توهّم ايتمهلرى، يردن گوگه قدر حدسز بر حقسزلقدر. بيڭلر نمونهلرندن بر نمونهسنى، بو عصرڭ ظلمنه قارشى بر سد اولارق ايكنجى نقطهده بيان ايدهجگز.
ايكنجى نقطه: بشرڭ أڭ وحشى و بدويلك زماننده بر قانونِ أساسيسى، شيمديكى أڭ يوكسك مدنيتده كندينى ظن ايدنلرڭ بر قسمى، إرتجاع ايله او وحشته و بدويلگه گرى دونييورلر. بشرڭ سلامت، عدالت و صلحِ عموميسنى محو ايدن او دهشتلى وحشيانه قانونِ أساسيسى، شيمدى بزم بو بيچاره مملكتمزه گيرمش ويا گيرمك ايستهيور. پارتيجيلك گبى بعض جريانلرى آشيلامغه باشلامش. او قانونِ أساسى ده بودر:
بر طائفهنڭ بر فردينڭ خطاسيله او طائفهيى، او جريانى، او پارتىيى، بتون فردلرينى محكوم ايدييور. بر خطايى، بيڭلر خطا حكمنه گچيرييور. إتّفاق و إتّحادڭ تمل طاشى اولان قارداشلق، وطنداشلق، محبّت و اخوّتى زير و زبر ايدييور. بويله بربرينه معارض قوّتلر، قوّتسزلكله ضعيفلاديغى ايچون فرانسز إختلالِ كبيرينڭ بر نمونهسنى گوسترمگه وسيله اولدقلرى حالده او غدّار، أنگيزيسيونانه و بدويانه و وحشيانه او قانونه قارشى؛ عينِ عدالت و حقيقت (وَلَا تَزِرُ وَازِرَةٌ وِزْرَ اُخْرٰى) اولان نصِّ قطعيسيله قرآنِ حكيمڭ بر قانونِ أساسيسى و محبّت و اخوّتِ حقيقيهيى تأمين ايدن و بو ملّتِ إسلاميهيى و مملكتى بيوك تهلكهدن قورتاران بو قانونِ أساسى كه: بريسنڭ خطاسيله باشقهسى مسئول اولاماز. قارداشى ده اولسه طائفهسى ده اولسه پارتيسى ده اولسه او جنايته شريك صاييلماز. اولسه اولسه او جنايته بر نوع طرفگيرلكله يالڭز معنوى گناهكار اولور. آخرتده جزاسنى گورور، رسمًا و قانونًا مسئول اولاماز.
أگر بو قانونِ أساسى چابوق دستورِ أساسى ياپيلمازسه حياتِ إجتماعيۀِ بشريه، ايكى حربِ عمومينڭ گوسترديگى تخريباتڭ أمثاليله أسفلِ سافلين اولان وحشى إرتجاعيه دوشهجك.
ايشته قرآنڭ بو قانونِ أساسيسنه إرتجاع نامنى ويرن بدبختلر، وحشت و بدويلك دهشتلى بر قانونِ أساسيسى اولارق قبول ايتدكلرى شيمديكى اويلهلرينڭ سياستنڭ بر نقطۀِ إستنادى شودر كه: «جماعتڭ سلامتى ايچون فرد فدا ايديلير. وطنڭ سلامتى ايچون أشخاصڭ حقوقى نظره آلينماز. دولتڭ سياستنڭ سلامتى ايچون جزئى ظلملر نظره آلينماز.» دييه بر تك جانى يوزندن بر كويى محو ايتمكله بيڭ معصومڭ حقّنى نظره آلماز. بر آدمى يارهلامقله بيڭلر معصومى صيقنتىيه ويرمك و ايكى يوز آدمڭ قورشونه ديزيلمسنى يگرمى سنه نظره آلمامق و برنجى حربِ عموميده اوچ بيڭ آدمڭ جانيانه سياست خطالريله اوتوز ميليون بيچاره نوعِ بشر عين حربده محو ايديلديگى گبى بيڭلر مثاللر وار.
ايشته بو وحشيانه إرتجاعنڭ بو دهشتلى ظلملرينه قارشى گلن قرآن شاكردلرينڭ قرآنڭ يوزر قانونِ أساسيسندن (وَلَا تَزِرُ وَازِرَةٌ وِزْرَ اُخْرٰى) آيتنڭ درس ويرديگى قانونِ أساسى كه عدالتِ حقيقيه و إتّحاد و اخوّتى تأمين ايتمگه چاليشان أهلِ ايمان فداكارلرينه «إرتجاع» نامنى ويروب اونلرى متّهم ايتمك؛ ملعون يزيدڭ ظلمنى، عدالتِ عمريهيه ترجيح ايتمك مِثللو أڭ وحشى و ظالمانه بر أنگيزيسيون قانوننى، بشرڭ أڭ يوكسك ترقّياتنه و عدالتنه مدار اولان قرآنڭ مذكور قانونِ أساسيسنه ترجيح ايتمك حكمندهدر.
حكومتِ إسلاميه ايله بو مملكتڭ سلامتنه چاليشان أهلِ سياست تام دقّت ايتسينلر. يوقسه ايكى اوچ قوّتلى جريانڭ بيوك معارضه ايتمهسيله، او قوّتلرڭ معارضه سببيله، مملكتڭ منفعتنه صرف ايديلهجك قوّتلرى بيڭدن بره اينر. او ضعيف قوّتله نه حاكميتنى -حتّى إستبداد ايله ده اولسه- آسايش و أمنيتِ عموميهيى محافظهيه كافى گلمديگندن، فرانسز إختلالِ كبيرينڭ تخملرينى بو مبارك مملكتِ إسلاميهيه أكيلمگه يول ويرمكدر.
مادام بو إتّفاقسزلقدن گلن ضعفيت و قوّتسزلك سببيله أجنبينڭ آلداتيجى پوليتيقهسنه و بر جهتده أهمّيتسز يارديملرينه قارشى بو عجيب معنوى رشوتلر ويريلييور. درت يوز ميليون قارداشڭ اخوّتنه و ميليارلر أجدادڭ مسلگنه أهمّيت ويريلمييور گبى بر معنا حكم ايدييور. و آسايش و سياسته ضرر گلمهمك ايچون إسرافات و إختلافات ضعفيتيله بول معاشلر ويرمگه كنديلرينى مجبور ظن ايدييورلر. ملّتڭ فقرِ حالى نظره آلينمييور.
ألبته و ألبته و قطعى اولارق شيمدى بو مملكتده أهلِ سياست غربه و أجنبيه ويرديگى معنوى رشوتڭ اون مِثلنى، مسالمتِ عموميهيى و تام بر قوّت بو حكومتِ إسلاميهيه تأمين ايتمك و أهالى مابيْننده إختلاف يرينه إتّحاد و تساندى قزانمق ايچون عالمِ إسلامڭ إستقبالدهكى جماهيرِ متّفقهسى اولان درت يوز ميليون مسلمان قارداشلره، مملكت و ملّتڭ سلامتى ايچون اويله عظيم بر بخشيش و ضررسز رشوت ويرمك لازم و ألزمدر.
ايشته او مقبول و لازم و چوق منفعتلى بخشيش ايسه: تعاونِ إسلامى و هديۀِ قرآنيه و قدسى قانونِ أساسى اولان
﴿اِنَّمَا الْمُؤْمِنُونَ اِخْوَةٌ ۞ وَاعْتَصِمُوا بِحَبْلِ اللّٰهِ جَمٖيعًا ۞
وَلَا تَزِرُ وَازِرَةٌ وِزْرَ اُخْرٰى ۞ وَلَا تَنَازَعُوا فَتَفْشَلُوا وَتَذْهَبَ رٖيحُكُمْ﴾
گبى قدسى آيتلرى، قرآنڭ أساسى قانونلرينى دستورِ حركت ايتمكدر.
سعيد النورسى
* * *