مرحوم حسن فيضى، نورلردن آلديغى حقيقت درسنى، نورلره إشارت ايدهرك گوزل تنظيم ايتمش. لاحقهيه گيرسين.
سعيد النورسى
گوزل اوقو! هر ذرّهده جوشقون برر معنا وار
درد أهلنه بو معناده جانلر صونان أدا وار
ويرمك ايچون پارلاقلغى، غملى گوڭل أوينه
بر باق هله، هر جلادن اوستون اولان جلا وار
درين، گوزل دوشونجه ايله اينجهلرسهڭ بونى سن
ضعيفلهمش روحلر ايچون طاغلر گبى غدا وار
هم ديلرسهڭ، توكنمهين سرمايۀ ثروتى
آچ گوزيڭى نورلره باق، ايشته سڭا طوفان گبى غنا وار
بنى طانى، يورو قولم يورو دييه بزلره
هر نَفَسده شفقت ايله ربّمزدن ندا وار
طويمش ايسهڭ بو ندايى هر ذرّهنڭ ديلندن
مژده اولسون، آرتيق سڭا جنّت دينن صفا وار
اوزاقلره باقمه! «نورلره باق، يورو!» عالم اونڭ آيينهسى
گورمز ميسڭ، هر يوزنده عين رنكده ضيا وار
بر گونشدر هر ذرّهده جلوه ياپوب پارلايان
بيلمز ميسڭ، سنده دخى او أدادن أدا وار
أللر آچوب يورو بوگون قانه قانه رسالۀ نوردن ايشيق آل
عشقه اويان، نوره قانان هر ذرّهده رها وار
هنر دگل؛ دوستى دشمن، يارى أغيار أيلهمك
يادى بيليش ياپاسڭ كه، آنجق دوستده وفا وار
هنردر كه؛ ياپراق آطلاس، طوپراق ألماس اولمالى
چونكه بر باق، نه ياپراقده نه طوپراقده بقا وار
قيصه گوروب دڭزلرى طاملهلره چويرمه
حقيقتده، هر طاملهده گيزلى برر دريا وار
طامله ايكن أصلڭ سنڭ، طاغى طاشى آشارسڭ
هم گوكلرى كشف ايدرسڭ، سنده أى نور، بويله دها وار
بر نقطهيى بر جهان ياپ، او جهانه حاكم اول
زيرا سنڭ بر نقطهڭده، گونش قدر ذكا وار
هر ذرّهنڭ كعبهسيدر قلبى، ينه كندينه
دقّت أيله، هر برنده ينه آنجق هدا وار
صاقين فيضى!. سن گوزيڭى حق يوزندن آييرمه
حقّى گورن گرچكلره، حقّى قدر عطا وار.
(دڭزلى قهرمانى مرحوم)
حسن فيضى
* * *
آوروپاده بولونان مهمّ بر عالمڭ منظومهلريدر.
أى بنم خاص نورِ ديدهم، روحِ زبدهم قارداشم
نوردن اولمش، نورى بولمش، نورله طولمش نورداشم
إستقامت اوزره اولسون مسلگى سَوقڭ بتون
إستقامت نسبتنده تام گرك شوقڭ بتون
ذكر و فكرڭ اويغون اولسون رفق ايله وفقڭ بتون
خدمتنجه اولمايور مى اجرتڭ حقّڭ بتون
غيرتڭ معياريدر هپ سندهكى ذوقڭ بتون
مؤمنِ كامل ايسهڭ ديندن جوشار عشقڭ بتون
أسكيدن وصفڭدر أى خاص مسلمان صدقڭ بتون
إسم و رسمڭ آيرى دوشسون غيريدن فرقڭ بتون
أى بنم خاص نورِ ديدهم، روحِ زبدهم قارداشم
نوردن اولمش، نورى بولمش، نورله طولمش نورداشم
عهدِ مؤمنْ؛ جهديدر، حق ديننى إحيا ايچون
جهدِ مؤمنْ؛ سعيدر، ايماننى إحيا ايچون
عزمِ مؤمنْ؛ وقفِ موجود، نورينى إبقا ايچون
رزمِ مؤمنْ؛ بذلِ جاندر، أمرينى إجرا ايچون
دَينِ مؤمنْ؛ نارِ كفرى طورمامق إطفا ايچون
دينِ مؤمنْ؛ كينلهدر هر دينسزى إمحا ايچون
وصفِ مؤمنْ؛ نشرِ ديندر بيتنى إنشا ايچون
شانِ مؤمنْ؛ هپ چاليشسين شرطنى ايفا ايچون
أى بنم خاص نورِ ديدهم، روحِ زبدهم قارداشم
نوردن اولمش، نورى بولمش، نورله طولمش نورداشم
مسلمانم ديرسڭ، ايماننده صاغلام صادق اول
صدقنه برهان گتير، حق أمرينى هپ ناطق اول
عقدڭى تأييد ايچون ميثاقله باغلان، واثق اول
علّتى تشخيص ايدوب ده ياپ تداوى، حاذق اول
فاسق اولمه، مارق اولمه، لاحق اولمه، سابق اول
هر جهتدن اولمه دون، أمثالنه سن فائق اول
أهلِ حقّه، نورِ حقّه، دينِ حقّه عاشق اول
سابقينڭ زمرهسنده قيدڭ اولسون، لايق اول
أى بنم خاص نورِ ديدهم، روحِ زبدهم قارداشم
نوردن اولمش، نورى بولمش، نورله طولمش نورداشم
غافل اولمه، منتبه اول، دائما أى مسلمان
آج بصرله، ايچ بصيرت گوزلرينى هر زمان
قلبنه صيغمش سنڭ شو خاكدانله آسمان
كندينى پك گورمه عالملرده دون و مستهان
گرچه ناسوت و زمين اولمش سڭا بر آشيان
لٰكن أليق، نظمِ حقّه ينه سنسڭ ترجمان
فيضنه مشتاق فلك، معناڭه مفتون قدسيان
مطمئن اول كه معينڭ هپ خداعِ مستعان
أى بنم خاص نورِ ديدهم، روحِ زبدهم قارداشم
نوردن اولمش، نورى بولمش، نورله طولمش نورداشم
أى مكرّم حق قولى، طوتمقده كندى نورينى
أى مفضّل عبدِ عاجز، آڭلايان مشعورينى
أى مبجّل جِرمِ أصغر، بورج بيلن مأمورينى
أى منوّر جسمِ أكرم، فرق ايدن مقدورينى
أى مميّز عقلِ واحد، سويلهين ميسورينى
أى منعّم نفسِ ممتاز، ايستهين موفورينى
أى مكمّل روحِ إنسان، سويلهين دستورينى
أى بنم خاص نورِ ديدهم، روحِ عمدهم قارداشم
نوردن اولمش، نورى بولمش، نورله طولمش نورداشم
حافظ على
* * *
سعيد نوره
غنا بولدق، بيوك ثروت
غناسندن سعيد نورڭ
شفا بولدق، يتر دولت
دواسندن سعيد نورڭ
طريقنده ظفريابز
شعاريله شرفيابز
شكر حقّه فيضيابز
دعاسندن سعيد نورڭ
مدارنده نمودارز
حضورندن خبردارز
هبوبيله هوادارز
صباسندن سعيد نورڭ
چيقان يوقدر ظلالندن
قاچان يوقدر جمالندن
مثال آلدق خصالندن
أداسندن سعيد نورڭ
دروسيله معلّايز
صلاحيله مزكّايز
مصفّايز، مربّايز؟
غداسندن سعيد نورڭ
ظهوريله بلاغ گوردك
شعوريله چراغ گوردك
فيوضيله شعاع گوردك
ضياسندن سعيد نورڭ
شريف اولدى شرافتده
دليل اولدى دلالتده
بز آلدق نور هدايتده
هداسندن سعيد نورڭ
بد اولدق بز و نيك اولدق
سعادتده شريك اولدق
أمر اولدق، مَلِك اولدق
هماسندن سعيد نورڭ
رسولدن تام خِصال آلمش
وليلردن مجال آلمش
أعالى هپ مقال آلمش
نداسندن سعيد نورڭ
سليماندن، سليم آڭلار
غنمدن ده حالم آڭلار
فهيم آڭلار، عليم آڭلار
نوىسندن سعيد نورڭ
نه ميزان وار، نه ده ئولچك
حقيقتدر بو سوز گرچك
ذكا أندر اولان يوكسك
دهاسندن سعيد نورڭ
كلام آلمق، نظام آلمق
تماميله مرام آلمق
نه ممكندر مقام آلمق
سواسندن سعيد نورڭ
نه قوّتلى او تمييزى
نه خوش طبعى دلآويزى
اوزاقلاشماز تلاميذى
فضاسندن سعيد نورڭ
گورن لازم، او چاغريلمق
سلاملانمق و قايريلمق
كيمڭ حدّى هيچ آيريلمق
غزاسندن سعيد نورڭ
اونڭ خصمى دگل مارج
اونڭ دوستى اولور عارج
ديرم اولماز قالان خارج
لواسندن سعيد نورڭ
نه نعمتدر نور اولمقده
نه رحمتدر حرّ اولمقده
أليمدر پك دور اولمقده
لقاسندن سعيد نورڭ
وضوح بولمق، خفاء بولمق
گلير اوندن وفا بولمق
ميسّردر صفا بولمق
بقاسندن سعيد نورڭ
أعلاسندن عالى اولدق
ولاسندن ولى اولدق
خفى اولدق، خالى اولدق
رهاسندن سعيد نورڭ
سحرلرده قناد آچدم
اُفقلرده بر ايز سچدم
سهى اولدم برآز گچدم
سماسندن سعيد نورڭ
خطاب ايتدم عموم خلقه
كتاب يازدم قرين حقّه
أثر قويدم دوشوب عشقه
قواسندن سعيد نورڭ
بلاد ممنون، عباد ممنون
عماد ممنون، إعداد ممنون
رشاد ممنون، جهاد ممنون
ثناسندن سعيد نورڭ
بو جانلر هپ فدامزدر
اونڭچون هپ رجامزدر
مزيد عمرى دعامزدر
خداسندن سعيد نورڭ
حافظ على
* * *
سعادت او سعيده
فيّاضِ أزل ويردى سعادت او سعيده
ديّانِ أبد قويدى هدايت او سعيده
موجود أثرندن اوقونور نورِ حقائق
حق، طوغمادن ايتمشدى عنايت او سعيده
مبذول، مدنى بيڭ حركاتنده ظفر وار
عرفان ايسه نفخ ايتدى جلادت او سعيده
دينى نيجه بيڭ ايشته او اولمش متعالى
ايمان دخى دوكمش نه صلابت او سعيده
مسبوق، متعالى خدماتنده موفّق
واقع هر ايشى آچدى سلامت او سعيده
هپ خارقهلرله طولودر شانلى حياتى
هپ معجزهلر يازدى براعت او سعيده
آثارينى تدقيق ايديوير گور نه فيض وار
أر سن ده… ربّ ايرديردى فضيلت او سعيده
أحكامنى إعلايه مجاهد نه غزادر
شافع اولاجق ذاتِ شريعت او سعيده
إجراسنه هر أمرينى، هر نهينى عظيم
داريْنى سعادت قيلدى ديانت او سعيده
مسلكده إلى يومِ قيام ثابت اولان نور
نور كنديسى صاچمقده بشارت او سعيده
مخصوص اوڭا تعظيم ايله تكريم صوڭه وارسڭ
لايق «هَمَه حرمت و رعايت» او سعيده
حافظ على
* * *
تصويرِ حقيقت
بو نورلره بسم اللّٰه ايله گيرهلم أى قارداشلر
بو سوزلره حمد ايدهرك باشلايهلم أى يولداشلر
بو باغلره شكر ايدهرك بز باقالم أى حالداشلر
بو گللرى فكر ايدهرك قوقليهلم أى دينداشلر
طلّابِ نورڭ أللريله قورتولاجق چوق دوشمشلر
ناشرلرينڭ ديللريله ديريلهجك چوق ئولمشلر
سلام اولسون هپڭزه أى قرآنڭ خادملرى
إكرام اولسون روحڭزه أى نورلرڭ ناشرلرى
ايمان طولسون قلبڭزه أى سوزلرڭ كاتبلرى
أنوار طولسون قبريڭزه أى نورلرڭ شاكردلرى
طلّابِ نورڭ أللريله قورتولاجق چوق دوشمشلر
ناشرلرينڭ ديللريله ديريلهجك چوق ئولمشلر
طلبهلرڭ استادينه «سعيد» ديرلر هم آدينه
بو اُمّتڭ إمدادينه «نورسى» مأمور إرشادينه
نصيحتى إخوانڭه: «قوشڭ خلقڭ إصلاحنه
نورله گيدڭ يانلرينه، دعوت ايدڭ أحكامنه.»
طلّابِ نورڭ أللريله قورتولاجق چوق دوشمشلر
ناشرلرينڭ ديللريله ديريلهجك چوق ئولمشلر
قورقمايڭز قيل و قالدن اللّٰه سزى قورتارهجق
ييلمايڭز هجوملردن، سوزلر سزى قورتارهجق
بيقمايڭز دردِ غمدن، نورلر سزى قورتارهجق
چيقمايڭز نورلى يولدن، يوقدر باشقه قورتارهجق
طلّابِ نورڭ أللريله قورتولاجق چوق دوشمشلر
ناشرلرينڭ ديللريله ديريلهجك چوق ئولمشلر
برلكلرى توحيدليدر، يوق بونلرده آيريلق
فكرلرى تسليمليدر، يوق بونلرده غيريلق
قوللقلرى ايمانليدر، يوق بو زمرهده آزغينلق
أعماللرى إخلاصليدر، يوق ايشلرنده بوزوقلق
طلّابِ نورڭ أللريله قورتولاجق چوق دوشمشلر
ناشرلرينڭ ديللريله ديريلهجك چوق ئولمشلر
استادلرى يالڭز ايكن سرًّا اولدى تَنَوَّرَتْ
شاكردلرى پك آز ايكن بيڭلر اولدى باق نه حكمت
هادملرى پك چوق ايكن اللّٰه ويردى نوره نصرت
بو خلوصى بر مور ايكن اللّٰه ويردى شكرِ نعمت
طلّابِ نورڭ أللريله قورتولاجق چوق دوشمشلر
ناشرلرينڭ ديللريله ديريلهجك چوق ئولمشلر
طلبهڭز خلوصى
* * *
(اوننجى مسئله مناسبتيله خسروڭ استادينه يازديغى مكتوب)
چوق سَوْگيلى استادم أفندم،
جنابِ حقّه حدسز شكرلر اولسون، ايكى آيلق إفتراق اوزونتيلرينى و مخابرهسزلك إضطرابلرينى خفيفلشديرن و قلبلريمزه تازه حيات بخش ايدن و روحلريمزه يڭى، صافى بر نسيم إهدا ايدن قرآنڭ جلاللى و عزّتلى، رحمتلى و شفقتلى آيتلرندهكى تكراراتنڭ محاسننى تعداد ايدن و حكمتِ تكرارينڭ لزوم و أهمّيتنى ايضاح ايدن و رسالۀِ النورڭ بر خارقه مدافعهسى اولان دڭزلى ميوهسنڭ اوننجى مسئلهسى نامنى آلان «أميرطاغى چيچگى»نى آلدق. الحقّ تقدير و تحسينه چوق لايق اولان بو چيچگى قوقلادقجه روحمزدهكى إشتياق يوكسلدى. طوقوز آيلق حپس صيقنتيسنه مقابل، ميوهنڭ طوقوز مسئلهسى ناصل برائتمزه بيوك بر وسيله اولمقله گوزللگنى گوسترمش ايسه، اوننجى مسئلهسى اولان چيچگى ده قرآنڭ ايجازلى إعجازندهكى خارقهلرى گوسترمكله او نسبتده گوزللگنى گوسترمكدهدر.
أوت سَوْگيلى استادم، گُلڭ چيچگندهكى فوق العاده لطافت و گوزللك، آغاجندهكى تيكنلرى نظره هيچ گوسترمديگى گبى؛ بو نورانى چيچك ده بزه طوقوز آيلق حپس صيقنتيسنى اونوتديرهجق بر شكلده او صيقنتيلريمزى ده هيچه اينديرمشدر.
مطالعهسنه طويولميهجق شكلده قلمه آلينان و عقللرى حيرته سَوق ايدن بو نورانى چيچك، محتوى اولديغى چوق گوزللكلرندن بِالخاصّه قرآنڭ ترجمهسى صورتيله نظرِ بشرده عاديلشديريلمك إهانتنه مقابل؛ او تكراراتڭ قيمتنى تام گوسترمكله، قرآنڭ جهاندگر علويتنى ميدانه قويمشدر.
سالكلرينڭ هر عصرده فوق العاده بر متانتله صاريلمالرى ايله و أمر و نهينه تمامًا إنقياد ايتمهلريله، گويا يڭى نازل اولمش گبى تازهلگى إثبات ايديلمش اولان قرآنِ معجز البيانڭ، بتون عصرلرده، ظالملرينه قارشى شدّتلى و دهشتلى و تكرارلى تهديدلرى و مظلوملرينه قارشى شفقتلى و رحمتلى مكرّر تلطيفلرى، خصوصيله بو عصريمزه باقان تهديداتى ايچنده ظالملرينه مِثلى گورولمهمش بر حالتده، صانكه فَزَعِ أكبردن بر نمونهيى آڭديران سماوى بر جهنّمله آلتى يدى سنهدن بَرى متماديًا فرياد و فغان ايتديرمسى و كذا مظلوملرينڭ بو عصردهكى كلّى فردلرى باشنده رسالۀِ النور طلبهلرينڭ بولونماسى و حقيقةً بو طلبهلرى ده اُممِ سالفهنڭ أنبيالرينه ويريلن نجاتلر گبى پك بيوك عمومى و خصوصى نجاتلره مظهر ايتمهسى و معارضلرى اولان دينسزلرڭ جهنّمى بر عذابله طوقاتلانملرينى گوسترمسى، هم ايكى گوزل و لطيف حاشيهلرله خاتمه ويريلمك صورتيله چيچگڭ تمام ايديلمسى، بو فقير طلبهڭز خسروى او قدر بيوك بر سرورله صوڭسز بر شكره سَوق ايتدى كه؛ بو گوزل چيچگڭ ويرديگى سَوينج و سرورى مدّتِ عمرمده حسّ ايتمديگمى سَوْگيلى استاديمه عرض ايتديگم گبى، قارداشلريمه ده كرّاتله سويلهمشم.
جنابِ حق، ضعيف و تحمّلسز اوموزلرينه پك عظمتلى بارِ ثقيل تحميل ايديلن سز سَوْگيلى استاديمزدن أبديًا راضى اولسون. و يوكلريڭزى تخفيف ايتمكله يوزيڭزى أبده قدر گولديرسون آمين.
أوت سَوْگيلى استادم، بز اللّٰهدن، قرآندن، حبيبِ ذىشانڭدن و رسالۀِ النوردن و قرآنڭ دلاّلى سز سَوْگيلى استاديمزدن أبديًا راضىيز. و إنتسابمزدن هيچ بر جهتله پشيمانلغمز يوق. هم قلبمزده ذرّه قدر كوتولك ايتمك ايچون نيّت يوق. بز آنجق اللّٰهى و رضاسنى ايستهيورز. گون گچدكجه، رضاسى ايچنده، جنابِ حقّه وصلت إشتياقلرينى قلبمزده تكثيف ايدييورز. بِلا إستثنا بزه فنالق ايدنلرى جنابِ حقّه ترك ايتمكله عفو ايتمك و بِالعكس بزه ظلم ايدن او ظالملر ده داخل اولديغى حالده، هركسه اييلك ايتمك، رسالۀِ النور طلبهلرينڭ قلبلرينه يرلشن بر شعارِ إسلام اولديغنى، بز ايستهميهرك إعلان ايدن حضرتِ اللّٰهه حدسز حدودسز شكرلر ايدييورز.
قصورلى طلبهڭز
خسرو
* * *
﴿بِاسْمِهٖ سُبْحَانَهُ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
شو كائنات سماسنڭ غروبى اولميان معنوى گونشى اولان قرآنِ كريم؛ شو موجودات كتابِ كبيرينڭ آياتِ تكوينيهسنى اوقوتديرمق، ماهيتنى گوسترمك ايچون، شعاعلرى حكمنده اولان أنوارينى نشر ايدييور. عقولِ بشرى تنوير ايله صراطِ مستقيمى گوسترييور. بشريت عالمنده هر فرد، خلقتندهكى مقصدى و فطرتندهكى مطالبى و إستقامتندهكى غايهسنى، او هدايت گونشنڭ نورى ايله گورور، آڭلار و بيلير. او هدايت نورينڭ تجلّيسنه مظهر اولانلر، قلب قابليتى نسبتنده اوڭا آيينهدارلق ايدهرك قربيت كسب ايدر. أشيا و حياتڭ ماهيتى، او نور ايله تظاهر ايدهرك آنجق او نور ايله گورولور، آڭلاشيلير و بيلينير.
شمسِ أزلينڭ معنوى هدايت نورلرينى تمثيل ايدن قرآنِ كريم، قلب گوزيله حق و حقيقتى گورمگى تأمين ايدر. اونڭ ايچون، اونڭ نورندن اوزاقده قالانلر، ظلماتده قاليرلر. زيرا هر شى نور ايله گورولور، آڭلاشيلير و بيلينير.
ايشته شو كتابِ كبيرڭ، معنوى و سرمدى گونشى اولان قرآنِ كريمڭ نور تجلّيسنه، بو عصريمزده «نور» إسميله مسمّا اولان رسالۀِ نورڭ شخصِ معنويسى مظهر اولمشدر. او نورلر كه: ظلماتدن آيريلمق ايستهمين يراسه طبيعتلى، غفلت اويقوسى ايله گوندوزينى گيجه ياپان سفاهتپرست، عقلى گوزينه اينمش، ظلماتده قالارق گوزى گورمز اولانلره و يولنى شاشيرانلره قارشى پروژكسيون گبى نورلرينى ايمان حقيقتلرينه توجيه ايدهرك صراطِ مستقيمى بوسبتون كور اولميانلره گوسترييور. نور طوپوزينى أهلِ كفر و منكِرلرڭ باشنه ووروب: «يا عقلڭى باشڭدن چيقار آت، حيوان اول. ياخود ده عقلڭى باشڭه آلارق إنسان اول.» دييور.
علم بر نوع نور اولديغنه گوره، رسالۀِ نورڭ علمه اولان أڭ درين وقوفنى گوسترهجك بر ايكى دليلنه قيصه إشارت ايدرز.
أوّلا:
شونى خاطرلاملىيز كه، رسالۀِ نور، باشقه كتابلرى دگل، بلكه يالڭز قرآنِ كريمى استاد اولارق طانيماسى و اوڭا خدمت ايتمهسى إعتباريله، مقبوليتى حقّنده بزم بو موضوعده سوز سويلهمهمزه حاجت بيراقمييور. بز آنجق علم أربابى مابيْننده رسالۀِ نورڭ دگرينى تبارز ايتديرمك ايچون علاوةً ديرز كه:
رسالۀِ نور، شيمدىيه قدر هيچ بر علم آدمنڭ تام بر وضوحله إثبات ايدهمديگى أڭ مغلق مسئلهلرى غايت بسيط بر شكلده أڭ عامى عوام طبقهسندن طوت، تا أڭ عالى خواص طبقهسنه قدر هركسڭ إستعدادى نسبتنده آڭلايهبيلهجگى بر طرزده، شبههسز إقناع ايديجى و يقينى بر شكلده ايضاح و إثبات ايتمهسيدر. بو خصوصيت، همان همان هيچ بر علم آدمنڭ أثرنده يوقدر.
ايكنجيسى:
بتون نور أثرلرى، قرآنِ كريمڭ بر قسم آيتلرينڭ حقيقى تفسيرى اولوب، اونڭ معنوى إعجازينڭ لمعهلرى اولديغنى هر خصوصده گوسترمسيدر.
اوچنجيسى:
إنسانلرڭ أڭ درين إحتياجلرينه، قطعى دليل و برهانلرله علمى ماهيتده جواب ويرمهسيدر. مثلا: واجب الوجودڭ وارلغى و آخرت و سائر ايمان ركنلرينى، بر ذرّهنڭ لسانِ حال و قال صورتنده ترجمانلغنى ياپارق إثبات ايتمهسى، أڭ مشهور إسلام فيلسوفلرندن ابن سينا، فارابى، ابن رشد؛ بو مسلكلرده بتون موجوداتى دليل اولارق گوستردكلرى حالده، رسالۀِ نور او حقيقتلرى عينًا بر ذرّه ويا بر چكردك لسانيله إثبات ايدييور. أگر رسالۀِ نورڭ علمى قدرتنى شيمدى اونلره گوسترمك ممكن اولسيدى؛ اونلر، همان ديز چوكوب رسالۀِ نوردن درس آلاجقلردى.
دردنجيسى:
رسالۀِ نور، إنسانلرڭ سنهلرجه اوغراشهرق ألده ايدهميهجگى بيلگيلرى، قومپريمه خلاصهلر نوعندن قيصه بر زمانده تأمين ايتمهسي...
بشنجيسى:
رسالۀِ نور، علمڭ أساس غايهسى اولان رضاىِ إلٰهىيى تحصيله سبب اولماسى و دنيا منفعتنه، علمى هيچ بر جهتله آلَت ايتميهرك، تام معناسيله إنسانيته خدمت گبى أڭ علوى وظيفهيى تمثيل ايتمهسيدر.
آلتنجيسى:
رسالۀِ نور، قوّتلى و قدسى و ايمانى بر تفكّر ثمرهسى اولوب، بتون موجوداتڭ لسانِ حال و قال صورتنده ترجمانلغنى ياپار. عين زمانده ايمان حقيقتلرينى علم اليقين و عين اليقين و حقّ اليقين درجهلرنده إنكشاف ايتديرر.
يدنجيسى:
رسالۀِ نور، بتون علملرى جامع اولوشيدر. عادتا علم ايپلكلرى ايله طوقونمش مزيَّن قوماش گبيدر. و شيمدىيه قدر هيچ بر علم أربابى طرفندن سويلنمهمش و هر علمه اولان أڭ درين وقوفنى تبارز ايتديرن وجيزهلر مجموعهسيدر. مثال اولارق بر قاچنى ذكر ايدهرك، هيئتِ مجموعهسى حقّنده بر فكر ايدينمك ايستهينلره، رسالۀِ نور بحرينه مراجعت ايتمهسنى توصيه ايدرز.
«سيورى سينگڭ گوزينى خلق ايدن، گونشى دخى او خلق ايتمشدر.»
«بر كلهبگڭ معدهسنى تنظيم ايدن، منظومۀِ شمسى دخى او تنظيم ايتمشدر.»
«بر ذرّهيى ايجاد ايتمك ايچون، بتون كائناتى ايجاد ايدهجك بر قدرتِ غيرِ متناهى لازمدر. زيرا شو كتابِ كبيرِ كائناتڭ هر بر حرفنڭ، باخصوص ذىحيات هر بر حرفنڭ، هر بر جملهسنه متوجّه برر يوزى و ناظر برر گوزى واردر.»
«طبيعت، مثالى بر مطبعهدر، طابع دگل. نقشدر، نقّاش دگل. مسطردر، مصدر دگل. نظامدر، ناظم دگل. قانوندر، قدرت دگل. شريعتِ اراديهدر، حقيقتِ خارجيه دگل.»
«ثابت، دائم، فطرى قانونلر گبى روح دخى؛ عالمِ أمردن، صفتِ إرادهدن گلمش و قدرت اوڭا وجودِ حسّى گيديرمشدر. بر سيّالۀِ لطيفهيى، او جوهره صدف ايتمشدر.»
و هكذا بيڭلر وجيزهلر وار.
اَلْبَاقِى هُوَ الْبَاقِى
در.مصطفى رمضان اوغلى
* * *
رسالۀِ نور نهدر، بديع الزمان كيمدر؟
هر عصر باشنده حديثجه گلهجگى تبشير ايديلن دينڭ يوكسك خادملرى؛ أمرِ دينده مبتدع دگل، متّبعدرلر. يعنى، كنديلرندن و يڭيدن بر شى إحداث ايتمزلر، يڭى أحكام گتيرمزلر. أساسات و أحكامِ دينيهيه و سننِ محمّديهيه (عصم) حرفيًا إتّباع يوليله دينى تقويم و تحكيم و دينڭ حقيقت و أصليتنى إظهار و اوڭا قاريشديريلمق ايستهنيلن أباطلى رفع و إبطال و دينه واقع تجاوزلرى ردّ و إمحا و أوامرِ ربّانيهيى إقامه و أحكامِ إلٰهيهنڭ شرافت و علويتنى إظهار و إعلان ايدرلر. آنجق طورِ أساسىيى بوزمادن و روحِ أصلىيى رنجيده ايتمهدن يڭى ايضاح طرزلريله، زمانڭ فهمنه اويغون يڭى إقناع اصوللريله و يڭى توجيهات و تفصيلات ايله ايفاءِ وظيفه ايدرلر.
بو مأمورينِ ربّانيه، فعلياتلريله و عمللريله ده مأموريتلرينڭ مصدّقى اولورلر. صلابتِ ايمانيهلرينڭ و إخلاصلرينڭ آيينهدارلغنى بِالذّات ايفا ايدرلر. مرتبۀِ ايمانلرينى فعلًا إظهار ايدرلر. و أخلاقِ محمّديهنڭ (عصم) تام عاملى و مشوارِ أحمديهنڭ (عصم) و حليۀِ نبويهنڭ حقيقى لابسى اولدقلرينى گوستررلر. خلاصه: عمل و أخلاق باقيمندن و سنّتِ نبويهيه إتّباع و تمسّك جهتندن اُمّتِ محمّده تام بر حسنِ مثال اولورلر و نمونۀِ إقتدا تشكيل ايدرلر.
بونلرڭ كتاب اللّٰهڭ تفسيرى و أحكامِ دينيهنڭ ايضاحى و زمانڭ فهمنه و مرتبۀِ علمنه گوره طرزِ توجيهى صددنده يازدقلرى أثرلر، كندى تلقاءِ نفسلرينڭ و قريحۀِ علويهلرينڭ محصولى دگلدر، كندى ذكا و عرفانلرينڭ نتيجهسى دگلدر. بونلر، طوغريدن طوغرىيه منبعِ وحى اولان ذاتِ پاكِ رسالتڭ معنوى إلهام و تلقيناتيدر. جلجلوتيه و مثنوئِ شريف و فتوح الغيب و أمثالى آثار هپ بو نوعدندر. بو آثارِ قدسيهيه او ذواتِ عاليشان آنجق ترجمان حكمندهدرلر. بو ذواتِ مقدّسهنڭ، او آثارِ بَرْگُزيِدهنڭ تنظيمنده و طرزِ بياننده بر حصّهلرى واردر؛ يعنى بو ذواتِ قدسيه، او معنانڭ مظهرى، مرآتى و معكسى حكمندهدرلر.
رسالۀِ نور و ترجماننه گلنجه: بو أثرِ عالىشانده شيمدىيه قدر أمثالنه راستلانمامش بر فيضِ علوى و بر كمالِ نامتناهى موجود اولديغندن و هيچ بر أثرڭ نائل اولماديغى بر شكلده مشعلۀِ إلٰهيه و شمسِ هدايت و نيّرِ سعادت اولان حضرتِ قرآنڭ فيوضاتنه وارث اولديغى مشهود اولديغندن؛ اونڭ أساسى نورِ محضِ قرآن اولديغى و أولياء اللّٰهڭ آثارندن زياده فيضِ أنوارِ محمّديهيى حامل بولونديغى و ذاتِ پاكِ رسالتڭ اوندهكى حصّه و علاقهسى و تصرّفِ قدسيسى أولياء اللّٰهڭ آثارندن زياده اولديغى و اونڭ مظهرى و ترجمانى اولان معنوى ذاتڭ مظهريتى و كمالاتى ايسه او نسبتده عالى و أمثالسز اولديغى گونش گبى آشكار بر حقيقتدر.
أوت او ذات داها حالِ صباوتده ايكن و هيچ تحصيل ياپمهدن ظواهرى قورتارمق اوزره اوچ آيلق بر تحصيل مدّتى ايچنده علومِ أوّلين و آخرينه و لدنّيات و حقائقِ أشيايه و أسرارِ كائناته و حكمتِ إلٰهيهيه وارث قيلنمشدر كه، شيمدىيه قدر بويله مظهريتِ عليايه كيمسه نائل اولمامشدر. بو خارقۀِ علميهنڭ أشى أصلا مسبوق دگلدر. هيچ شبهه ايديلهمز كه؛ ترجمانِ نور، بو حاليله باشدن باشه عفّتِ مجسّمه و شجاعتِ خارقه و إستغناىِ مطلق تشكيل ايدن خارق العاده متانتِ أخلاقيهسى ايله بِالذّات بر معجزۀِ فطرتدر، تجسّم ايتمش بر عنايتدر و بر موهبۀِ مطلقهدر.
او ذاتِ ذىخوارق داها حدِّ بلوغه ايرمهدن بر علّامۀِ بىعديل حالنده بتون جهانِ علمه ميدان اوقومش، مناظره ايتديگى أربابِ علومى إلزام و إسكات ايتمش، هر نرهده اولورسه اولسون واقع اولان بتون سؤاللره مطلق بر إصابتله و أصلا تردّد ايتمهدن جواب ويرمش، اون درت ياشندن إعتبارًا استادلق پايهسنى طاشيمش و متماديًا أطرافنه فيضِ علم و نورِ حكمت صاچمش، ايضاحلرندهكى اينجهلك و درينلك و بيانلرندهكى علويت و متانت و توجيهلرندهكى درين فراست و بصيرت و نورِ حكمت، أربابِ عرفانى شاشيرتمش و حقّيله «بديع الزمان» عنوانِ جليلنى بخش ايتديرمشدر. مزاياىِ عاليه و فضائلِ علميهسيله ده دينِ محمّدينڭ نشرنده و إثباتنده بر كمالِ تام حالنده رونما اولمش اولان بويله بر ذات ألبته سيّد الأنبيا حضرتلرينڭ أڭ يوكسك إلتفاتنه مظهر و أڭ عالى حمايه و همّتنه نائلدر. و شبههسز او نبىِّ أقدسڭ أمر و فرمانى ايله يوروين و تصرّفيله حركت ايدن و اونڭ أنوار و حقائقنه وارث و معكس اولان بر ذاتِ كريم الصفتدر.
أنوارِ محمّديهيى و معارفِ أحمديهيى و فيوضاتِ شمعِ إلٰهىيى أڭ مشعشع بر شكلده پارلاتماسى و قرآنى و حديثى اولان إشاراتِ رياضيهنڭ كنديسنده منتهى اولماسى و خطاباتِ نبويهيى إفاده ايدن آياتِ جليلهنڭ رياضى بيانلرينڭ كندى اوزرنده طوپلانماسى دلالتلريله، او ذات خدمتِ ايمانيه نقطهسنده رسالتڭ بر مرآتِ مجلّاسى و شجرۀِ رسالتڭ بر صوڭ ميوۀِ منوّرى و لسانِ رسالتڭ إرثيت نقطهسنده صوڭ دهانِ حقيقتى و شمعِ إلٰهينڭ خدمتِ ايمانيه جهتنده بر صوڭ حاملِ ذىسعادتى اولديغنه شبهه يوقدر.
١٩٤٨
آفيون حپسنده موقوف
أحمد فيضى
* * *