لفظ اللّهڭ اورتهدهكى حرفى اولان (ل) يتمش بش دفعه أوّلكى حرفى اولان (ألف) اولويور. همان همان عموميتله توافق ايله (هُوَ اللّٰهُ) عددينه اوچ فرقله توافق لسانيله (هُوَ اللّٰهُ) اوقويور. لامڭ ايكى عددى آلتمش بش دفعه اولوب، أكثريتِ مطلقه ايله توافق ايدهرك، فرقسز ويا ايكى فرقله (اَللّٰه) عددينه توافق لسانيله (اَللّٰه) دير، ذكر ايدر. و لامڭ اوچ عددى أكثرى بربرينه توافق ايله اوتوز اوچ دفعه اولارق، اوتوز اوچ عددِ مباركنه توافقله و لامڭ مقامِ جفريسنه اوچ فرقله توافق ايتمكله برابر يالڭز معنيدار بر فرقله (وَاحِدٌ اَحَدٌ) عددينه توافق لسانيله (وَاحِدٌ اَحَدٌ) دير، حكم ايدر. لامڭ درت عددى اون سكز اولوب (وَاحِدٌ) عددى اولان اون طوقوزه يالڭز بر معنيدار فرقله، توافق لسانيله (وَاحِدٌ) دير؛ توحيدى إعلان ايدر. بو درت عددى، ايكى عدد ايله برابر، يالڭز ايكى فرقله، توافق ديليله (لَا اِلٰهَ اِلَّاهُوَ) اوقورلر.
ايشته سكسان بش، يتمش بش، آلتمش بش اولماسى و بر عددى سكسان بش و ايكى عددى اونڭ ياريسى اولان قرقه و اوچى اونڭ نصفى (حاشيه) يگرمىيه اينمسى و بربريله توافقلرى و لفظۀِ جلالڭ و كلمۀِ توحيدڭ لمعهلرينى إفاده ايتمهلرى گبى، منتظم نسبِ عدديه و معنيدار مناسباتِ توافقيه بزه قناعت ويرييور كه؛ تصادفى دگل، بلكه علامتِ قبول بر توفيقدر، بر تنظيمدر.
قارداشڭز
سعيد النورسى
* * *
___
(حاشيه): سكسان دردنجى صحيفهنڭ ايكنجى حاشيهسنده «حمزه» آخرى (ة)در.