(رسالۀِ النوره إشارت ايدن اوتوز اوچنجى آيتڭ إستخراجنه دائر حافظ علينڭ بر فقرهسيدر)
﴿بِاسْمِهٖ سُبْحَانَهُ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
عزيز استادم حضرتلرى!
دون آقشام نمازينى قيلاركن ايكنجى ركعتده، فاتحۀِ شريفهدن صوڭره
﴿شَهِدَ اللّٰهُ اَنَّهُ لَٓا اِلٰهَ اِلَّا هُوَ وَالْمَلٰٓئِكَةُ وَاُولُوا الْعِلْمِ قَٓائِمًا بِالْقِسْطِ
لَٓا اِلٰهَ اِلَّا هُوَ الْعَزٖيزُ الْحَكٖيمُ﴾
آيتنى اوقوركن، هيچ دوشونمديگم، عقل و قلبمده بر شى، تحرّىيه بر سبب يوقكن، بردن بره روحڭ پنجرهسنه شو عظيم آيتِ كريمهنڭ رسالۀِ النوره، مؤلّفنه بر مناسبتِ معنويه ايله إشارتى گوستريلدى. نمازدن صوڭره دوشوندم. حقيقةً قوّتلى بر مناسبتِ معنويهسى وار. شويله كه:
بو كائناتده، وحدانيتِ إلٰهيهيى جنّ و إنس و روحانياته قارشى قطعى بر صورتده گوستروب إثبات ايدن برنجى، قرآنِ عظيم الشان اولديغى گبى؛ بو عصرده ايكنجى، اوچنجى درجهده كمالِ عدالتله و صادق و مصدّق حجّتلرله وحدانيتى واضح و باهر بر صورتده، كائنات صفحاتنده إنس و جنّڭ أنظارينه عرض ايدوب إثبات ايدن رسالۀِ النور؛ بتون طبقاتِ بشره هم مدرسه، هم مكتب، هم قيشله، هم حكيم، هم حاكم اولارق، أڭ عامى عوامدن أڭ أخصِّ خواصّه قدر درس ويروب، تعليم و تربيه ايتمهسى بزجه مشهود اولماسيله، بو آيتِ كريمهنڭ بر موضوعى، بر ماصدقى ده رسالۀِ النور اولماسنه شبههسز بر قناعت ويريلييور.
ايكنجى كلمۀِ توحيددن صوڭره (اَلْعَزٖيزُ الْحَكٖيمُ) إسملريله جنابِ حق (جلّ جلاله) ذاتنى توصيف بيوروب، ايكنجى درجهده عين إسملرڭ مظهرى