گورديگمزى سزه يازمشدق؛ فقط او گنيش سرّى تمامًا گورمك چوق زمانه محتاج اولديغندن، چوق أهمّيتلى وظيفه‌لر شيمديلك اونڭله إشتغاله مساعده ايتمدى.

عزيز قارداشلرم! بو صيقنتيلى زمانده و تضييقات آلتنده عقل و قلبى أگلنديرن و كيفلنديرن بويله تفكّهاتِ علميه‌يى إسراف صايمايڭز. حسنِ نيت اويله بر كيميادر كه؛ شيشه‌لرى، ألماسه چويرر؛ طوپراغى، آلتون ياپار. إن شاء اللّٰه او حسنِ نيتله، بو تفكّهات دخى حقيقى بر غدا آنبارينه بر آناختار اولور و خدمتده ضعفه دوشنلره قوت و قوّته يول آچار.

لفظ اللّهڭ آخر حرفى سكسان بش دفعه او لفظۀِ جلالڭ أوّلكى حرفى اولويور. (اَللّٰهُ وَاحِدٌ) عددينه معنيدار بر تك فرقله توافق لسانيله (اَللّٰهُ وَاحِدٌ) دير. (ه) بر عددى، سكسان بش دفعه همان همان عموميتله توافق ايدر. يالڭز بعضًا بر صحيفه فاصله اولور. (ه) ايكى عددى، قرق ايكى دفعه أكثريتِ مطلقه ايله توافق ايدر. (ه) اوچ عددى، يگرمى بش دفعه‌در، أكثرى توافقده‌در. هجاده ايكنجى و قرآنده و بسم اللّٰه ده برنجى حرف اولان (ب) ينه سكسان بش دفعه بر اولويور. (اَللّٰهُ وَاحِدٌ) دير. (ب) ايكى عددى قرق ئوچ اولوب، بر فرقله (ه) نڭ ايكيسنه توافق ايدر. (ب) اوچ عددى يگرمى يدى اولوب (ه) نڭ اوچنه ايكى فرقله توافق ايدر. (ت) بش عددى يگرمى اوچ دفعه، (ه) نڭ اوچ عددينه ايكى فرقله توافق ايدر. (ت) آلتى عددى اون بش دفعه، (و)ڭ درت عددينه توافق ايدر. (و) آلتى عددى يگرمى آلتى ويا يگرمى يدى دفعه‌در. (و)ڭ بش عددى يگرمى بش دفعه اولوب، آلتى عددينه بر ويا ايكى فرقله توافق ايدر. (ألف) آلتى عددى، سكز دفعه و (ألف) بش عددى سكز دفعه بربريله تام توافق ايدر. الحاصل: بش (ه) ايله آلتى (هُوَ) إسمِ مقدّسى اولدقلرى ايچون كرامتكارانه وضعيتلر گوسترييورلر.