قلمڭ ايشلهمديگندن مراق ايتمه. سنڭ يريڭه و كرامتلى قلمڭڭ يادگارى اولان معجزاتِ أحمديهنڭ برى ولاياتِ شرقيهده فعالانه گزييور. ديگر صوڭ يازديغڭ نسخه ده، إستانبولده سنڭ يرڭده چاليشوب، إن شاء اللّٰه فتوحات ياپار. سنڭ يازديغڭ معجزهلى ايكى قرآنِ عظيم الشانڭ بو حواليده خصوصًا رمضانِ شريفده سڭا قزانديردقلرى ثوابلرى و تحسين و تبريكلرينى، إن شاء اللّٰه ياقينده طبعه گيرمهسيله، عالمِ إسلامدن سنڭ روحڭه ياغاجق رحمت دعالرينى دوشون، اللّٰهه شكر أيله.
حافظ علينڭ مكتوبنده، إسلامكويندهكى خواجهلره محبّته و دوستلغه قرار ويرمهسى بزى ممنون أيلدى. أوت إسلامكويى، ناصلكه رسالۀِ النوره پك زياده علاقهدارلقده إمتياز و سبقت قزانمش. اويله ده بن اوراده ايكن، سائر خواجهلره نسبةً إسلامكويى خواجهلرى دخى داها زياده إنصافلى و رسالۀِ النورى تقدير ايتدكلرينى گورديگمدن، بو حواليدهكى خواجهلرڭ لاقيدلقلرينه قارشى اونلرى حسنِ مثال گوسترييورم. إن شاء اللّٰه اونلردن ضرر گلمز. بن إسلامكوينى نورس كويى گبى بيلييورم، او خواجهلره ده أقربام نظريله باقيورم، اونلره ده سلام ايدييورم. أوت اونلرڭ إنصافى و رسالۀِ النوره قارشى دوستلقلريله، نور فابريقهسى او كويده دغدغهسز تأسّس ايتدى تخمين ايدييورم.
أى صبرى قارداش! باشڭ صاغ اولسون. جنابِ حق او والدهمزى مغفرت أيلهسين! آمين. بنم، قرابتِ نسبيهيى إحساس ايدن پارمقلرڭدهكى نشان و بو يدى سكز سنه عبد المجيددن داها حرارتلى فعالانه قارداشلق وظيفهسنى ياپديغڭزدن، ألبته سنڭ مرحومه والدهڭ بنم ده والدهمدر. اونى ده، والدهم ياننه معنوى قزانجلريمه و دعالريمه حصّهدار ايدييورم. جنابِ حق سڭا صبرِ جميل إحسان و او مرحومهيى ده غريقِ رحمت أيلهسين! آمين.
* * *