س - بو آيتده قلبڭ سمع و بصره تقديمندهكى حكمت نهدر؟
ج - قلب ايمانڭ محلّى اولديغى گبى، أڭ أوّل صانعى آرايان و ايستهين و صانعڭ وجودينى دلائليله إعلان ايدن، قلب ايله وجداندر. زيرا قلب، حيات مالزمهسنى دوشونوركن، أڭ بيوك بر عجزه معروض قالديغنى حسّ ايدر ايتمز، درحال بر نقطۀِ إستنادى؛ كذالك أمللرينڭ تنميهسى (نمالانديرمق) ايچون بر چاره آراركن، درحال بر نقطۀِ إستمدادى آرامغه باشلار. بو نقطهلر ايسه، ايمان ايله ألده ايديلهبيلير. ديمك، قلبڭ سمع و بصره حقِّ تقدّمى واردر.
إخطار:
قلبدن مقصد؛ صَنَوْبرى (چام قوزالاغى گبى) بر أت پارچهسى دگلدر. آنجق بر لطيفۀِ ربّانيهدر كه، مظهرِ حسّياتى، وجدان؛ معكسِ أفكارى، دماغدر. بناءً عليه او لطيفۀِ ربّانيهيى تضمّن ايدن او أت پارچهسنه قلب تعبيرندن شويله بر لطافت چيقييور كه؛ او لطيفۀِ ربّانيهنڭ إنسانڭ معنوياتنه ياپديغى خدمت، جسمِ صَنَوْبرينڭ جسده ياپديغى خدمت گبيدر. أوت ناصلكه بتون أقطارِ بدنه ماء الحياتى نشر ايدن او جسمِ صَنَوْبرى بر ماكينۀِ حياتدر و مادّى حيات اونڭ ايشلمهسى ايله قائمدر. سكتهيه اوغراديغى زمان جسد ده سقوطه اوغرار. كذالك او لطيفۀِ ربّانيه، آمال و أحوال و معنوياتڭ هيئتِ مجموعهسنى حقيقى بر نورِ حيات ايله جانلانديرر، ايشيقلانديرر؛ نورِ ايمانڭ سونمهسيله ماهيتى، ميّتِ غيرِ متحرّك گبى بر هيكلدن عبارت قالير.
(وَعَلٰى سَمْعِهِمْ) ده (عَلٰى) نڭ تكرارى، قلب ايله سمعه ووريلان خاتملرڭ هر بريسى مستقل بر نوع دلائله عائد اولديغنه إشارتدر. أوت قلبڭ ختمى، دلائلِ قلبيه و وجدانيهيه عائددر. سمعڭ ختمى، دلائلِ نقليه و خارجيهيه عائددر. و كذا هر ايكى ختمڭ بر جنسدن اولماديغنه بر رمزدر.