بو آيتڭ كلمهلرى آراسنده نظمى ايجاب ايدن مناسبتلره گلهلم:
(خَتَمَ) نڭ (لَا يُؤْمِنُونَ) ايله إرتباطى و اونڭ آرقهسنده ذكر ايديلمهسى، جزانڭ جُرمه ترتّبى قبيلندندر. يعنى اونلر، وقتا كه جزءِ إختياريلرينى إفساد ايتمكله ايمانه گلمديلر، قلبلرينڭ ختميله تجزيه ايديلديلر.
(خَتَمَ) تعبيرى، اونلرڭ ضلالتلرينى تصوير ايدن تمثيلى بر اسلوبه إشارتدر. شويله كه:
قلب گوزى، صانكه جواهره بر خزينه اولمق اوزره جنابِ حق طرفندن ياپيلان بر بنادر. وقتا كه سوءِ إختيارلريله إفساده اوغرادى و جوهرلره ياپيلان يرلر، ييلانلر و عقربلرله طولدى؛ قپوسى ختم ايديلدى كه، او سارى خستهلقدن باشقهلرى متضرّر اولماسين.
(اَللّٰهُ) : ضميرِ متكلّمڭ يرينه إسمِ ظاهرڭ گلمسى، تكلّمدن غيبته إلتفاتدر. و بو إلتفاتده لطيف بر نكته واردر. شويله كه:
(لَا يُؤْمِنُونَ) دن صوڭره (بِاللّٰهِ) مقدّر و منوى (مقصود) اولديغنه نظرًا، صانكه نورِ معرفت اونلرڭ قلبلرينڭ قپولرينه گلديگى زمان قلبلرينى آچوب قبول ايتمدكلرندن، اللّٰه ده غضبه گلهرك قلبلرينى ختم ايتدى.
(عَلٰى) : (خَتَمَ) فعلِ متعدّى اولديغى حالده (عَلٰى) ايله ذكر ايديلمهسى، ختم ايديلن قلبڭ دنيايه باقان قپوسى دگل، آنجق آخرته ناظر اولان قپوسى سدّ ايديلمش اولديغنه إشارتدر. و كذا ختمڭ علامت معناسنى إفاده ايدن وَسْمى (طامغه) تضمّن ايتديگنه إشارتدر. صانكه او ختم، او مُهر، قلبلرينڭ اوستنده ثابت بر طامغهدر و سيلنمز بر علامتدر كه، دائما ملائكهيه گورونور.