جملهنڭ قائلى، پك بيوك بر إطمئنان و جدّيت ايله، شكّ و شبهه ايتميهرك بو حكمى ويرمشدر. بوندن آڭلاشيلير كه، او ذاتڭ ايشلرنده حيله يوقدر.
س - (فَاتَّقُوا) إتّقا ايله تجنّب، ايكيسى ده بر معنايى إفاده ايدرلر. إتّقانڭ تجنّبه جهتِ ترجيحى نهدر؟
ج - أوت إتّقا، ايمانه تابعدر. يعنى إتّقا، ايمان اولدقدن صوڭره حصوله گلير. تجنّبده بو تبعيت يوقدر. بناءً عليه إتّقا كلمهسى ايمانى آڭديرر و إتّقا لفظيله، ايمانه ايما و إشارت ايديلهبيلير. فقط تجنّب كلمهسى بو ايشى گورهمز. بونڭ ايچوندر كه، (اِنْ لَمْ تَفْعَلُوا) نڭ حقيقى جزاسى اولان (اٰمَنُوا) نڭ يرنده (تَجَنَّبُوا) يه ترجيحًا (فَاتَّقُوا) إختيار و إقامه ايديلمشدر.
(النَّارَ) : نارڭ (ال) ايله تعريفى، نارڭ معهوديت و معلوميتنه إشارتدر. چونكه أنبياءِ عظامدن ايشيديلمك صورتيله، ذهنلرده معلوميتى تقرّر ايتمشدر.
س - (اَلَّتٖى) أسماءِ موصولهدندر. «صله» داخل اولديغى جملهنڭ أوّلجه معلوم اولديغنى إقتضا ايدر. حالبوكه صلهسى اولان (وَقُودُهَا النَّاسُ وَالْحِجَارَةُ) أوّلجه مخاطبلره معلوم دگلمش؟
ج - (نَارًا وَقُودُهَا النَّاسُ وَالْحِجَارَةُ) آيتى بو آيتدن أوّل نازل اولديغنه نظرًا مخاطبلر اوندن كسبِ معلومات ايتدكلرينه بناءً، بوراده (النَّارَ) ايله (اَلَّتٖى) آراسنده توصيف معاملهسى ياپيلمشدر.