معلوماتلرينه إماله ايتمهسى و بڭزتمهسى، مقتضاىِ بلاغت و إرشاد اولماز مى؟ فقط بو آيتلرڭ، حسّياتلرينه إماله ايتمهسى مسئلهسى، او حسّياته قصدًا دلالت ايتمك ايچون دگلدر. آنجق كنايه قبيلندن او حسّياتى اوقشامق ايچوندر. مع هذا حقيقته أهلِ تحقيقى ايصال ايچون، قرينه و أمارهلر وضع ايدلمشدر. مثلا أگر قرآنِ كريم، مقامِ إستدلالده شويلهجه ديمش اولسه ايدى كه: «أى إنسانلر! گونشڭ ظاهرى حركتيله حقيقى سكوننه و أرضڭ ظاهرى سكونيله حقيقى حركتنه و ييلديزلر آراسنده جاذبۀِ عموميهنڭ غريبهلرينه و ألكتريقڭ عجيبهلرينه و يتمش عنصر آراسنده حاصل اولان إمتزاجاته و بر آووج صو ايچنده بيڭلر ميقروبڭ بولونماسنه دقّت ايديڭز كه، بو گبى خارقه شيلردن جنابِ حقّڭ هر شيئه قادر اولديغنى آڭلايهسڭز.» ديسه ايدى؛ دليل، مدّعادن بيڭلرجه درجه داها خفى، داها مشكل اولوردى. حالبوكه دليلڭ مدّعادن داها خفى اولماسى، مقامِ إستدلاله اويماز. مع هذا اونلرڭ حسّياتنه إماله ايديلن آيتلر كنايه قبيلندن اولوب، إفاده ايتدكلرى ظاهرى معنالرى صدق ويا كذبه مدار اولاماز. أوت گورمييور ميسڭ (قَالَ) دهكى «ألف» خفّتى إفاده ايدييور. أصلى «واو» اولسون، «يا» اولسون، نه اولورسه اولسون بزه تعلّق ايتمز.
خلاصه: مادام كه قرآن، بتون زمانلردهكى بتون إنسانلره نازل اولمشدر، شو شبهه عدّ ايتدكلرى امورِ ثلاثه، قرآنه نقيصه دگل، قرآنڭ يوكسك إعجازينه دليللردر. أوت قرآنِ معجز البيانى تعليم ايدن جنابِ حقّه قَسَم ايدرم كه؛ او بشير و نذيرڭ (عصم) بصر و بصيرتى، حقيقتى خيالدن تفريق ايدهمهمكدن منزّهدر، جليلدر، جليدر ويا إنسانلرى قانديرارق مغلطهلره دوشورتمكدن، مسلكِ عاليلرى غنيدر، عاليدر، تميزدر، طاهردر.