يدنجى مسئله:
حضرتِ محمّد عليه الصلاة والسلامڭ إظهار ايتديگى محسوس و ظاهرى و إنسانلرجه مشهور و معلوم اولان خارقه و معجزهلرينڭ أكثريسى، تاريخ و سِيَر كتابلرنده مذكوردر و عين زمانده، محقّقينِ علما طرفندن ايضاح و بيان ايديلمشلردر. بناءً عليه تفصيلاتنى او كتابلره حواله ايله يالڭز او خارقهلرڭ نوعلرينى إجمالاً ايضاح ايدهجگز. أوت پيغمبر عليه الصلاة والسلامڭ ظاهرى خارقهلرينڭ هر بريسى آحادى اولوب متواتر دگلسه ده، او آحاديلرڭ هيئتِ مجموعهسى و چوق نوعلرى، متواترِ بِالمعنادر. يعنى لفظ و عبارهلرى متواتر دگلسه ده، معنالرى چوق إنسانلر طرفندن نقل ايديلمشدر. او خارقهلرڭ نوعلرى اوچدر:
برنجيسى: «إرهاصات» ايله آڭيلمقدهدر كه، حضرتِ محمّد عليه الصلاة والسلامڭ نبوّتندن أوّل ظهور ايدن خارقهلردر. مجوسى ملّتنڭ طاپديغى آتشڭ سونمهسى، صاوه دڭزينڭ صولرينڭ چكيلمهسى، كسرى سراينڭ ييقيلماسى و غائبدن ياپيلان تبشيرلر گبى شيلردر. صانكه او حضرتڭ (عصم) زمانِ ولادتى، حسّاس و كرامت صاحبى ايمش گبى او ذاتڭ قدوم و گلمسنى شو گبى حادثهلر ايله تبشيراتده بولونمشدر.
ايكنجى نوع: إخباراتِ غيبيهدر كه، بِالآخره وقوعه گلهجك پك چوق غريب شيلردن بحث ايتمشدر. أزجمله؛ كسرى و قيصرڭ دفينهلرينڭ إسلام ألنه گچمهسى، روملرڭ مغلوب ايديلمسى، مكّهنڭ فتحى، قسطنطنيهنڭ آلينمهسى گبى حادثاتدن خبر ويرمشدر. صانكه او ذاتڭ جسدندن تجرّد ايدن روحى، زمان و مكانڭ قيدلرينى قيرارق إستقبالڭ هر طرفنه اوچوب گزمش و گورديگى وقوعاتى سويلهمشدر و سويلهديگى گبى ده وقوعه گلمشدر.