(فَلَا تَجْعَلُوا لِلّٰهِ اَنْدَادًا) : باشده بولونان (ف) ، گچن درت فقرهيه باقييور. يعنى: اودر معبود، شريك ياپمايڭز. اودر قادرِ مطلق، شريكنى إعتقاد ايتمهيڭز. اودر منعم، شكرنده شريك ياپمايڭز. اودر خالق، باشقه بر خالق تخيّل ايتمهيڭز.
(تَجْعَلُوا) : بو تعبيرڭ (تَعْتَقِدُوا) تعبيرينه ترجيحى، اونلرڭ اللّٰهه إسناد ايتدكلرى شريكلرڭ و مِثللرڭ أصلى و حقيقتى اولماديغى ايچون او اويدورما شريكلرڭ إعتقاد ايديلهجك شيلر اولماديغنه، آنجق اويدورما، جعلى شيلر اولدقلرينه إشارتدر.
(لِلّٰهِ) : لفظۀِ جلالڭ (اَنْدَادًا) اوزرينه تقديمى، اللّٰهڭ دائما حاضر اولديغنى دوشونمك لزومنه؛ و نهيڭ منشئى، شريكڭ اللّٰه ايچون ياپيليشى اولديغنه إشارتدر.
(اَنْدَادًا) : أنداد، «نِدّ»ڭ جمعيدر. «نِدّ» ايسه، «مِثل» معناسنهدر. حالبوكه جنابِ حقّه ياپيلان مِثل، اونڭ ضدّى اولور. بر شى هم ضد، هم مِثل اولاماز و بر شيئڭ ضدّى، اوڭا مِثل اولاماز. اويله ايسه مِثلڭ بولونماسى، مِثلڭ محاليتنى إستلزام ايدر. «أنداد»ڭ صيغۀِ جمع ايله ذكرى، مشركلرڭ جهالتنه إشارتدر. يعنى: «هيچ بر جهتدن بر بڭزرى اولميان جنابِ حقّه ناصل بر سورى مِثل و ضد ياپيورسڭز؟» و كذا بتون أنواعِ شركڭ ردّينه إشارتدر. يعنى: «نه ذاتنده و نه صفاتنده و نه أفعالنده شريكى، شبيهى يوقدر.» و كذا وثنى، صابئى، أهلِ تثليث، أهلِ طبيعت گبى فِرَقِ ضالّهنڭ توهّم ايتدكلرى شريكلرڭ طبقهلرينه إشارتدر.