«أى كافرلر! سماوات و أرضڭ طيشاريسنه چيقامازسڭز. داخلده ايسه هر نرهيه قاچهجق اولورسهڭز اوراده اللّٰه علم و قدرتيله حاضر و ناظردر.»
(بِالْكَافِرٖينَ) بو كلمهيى (مُحٖيطٌ) لفظنه باغلايان (ب) حرفِ جرّى، اللّٰهڭ غضبندن قاچان كافرلر ينه اللّٰهڭ غضبنه راست گلوب مصيبت اوقلرينه هدف اولدقلرينه إشارتدر.
(كَافِرٖينَ) عنوانى ايسه اوچ إشارتى طاشييور:
١ - تمثيل ايچرسنده ممثّلى، يعنى منافقلرى گوسترمكله سامعڭ تمثيل ايله مشغول اولوب ده ممثّلدن، مقصددن غافل اولمامسنى تأمين ايتمك ايچوندر.
٢ - تمثيل ايله ممثّل؛ يعنى، يولجيلرڭ دوروميله منافقلرڭ دورومى آراسنده صوڭ سيستمده بولونان مشابهتڭ قوّتندن طولايى، برى برينڭ صفتنى، يكديگرينڭ لقبنى، صوى آدينى طاشييهبيلمهلرينه إشارتدر.
٣ - كافرلرڭ قلبى گبى، اونلرڭ ده قلبلرى ظلمت و عذاب ايچنده بولونديغنه إشارتدر. زيرا ياپدقلرى جنايت و قصورلرندن، وجدانلرى دخى اونلرى تعذيب ايتمكدن گرى قالمييور. أوت بِالذّات ياپديغى جنايتڭ جزاسنى گورن بر آدمڭ وجدانى مستريح اولاماز.
(يَكَادُ الْبَرْقُ يَخْطَفُ اَبْصَارَهُمْ) بو جملهدهكى كلمهلرڭ إشغال ايتدكلرى يرلر ايله مناسبتلرى و هر بريسنڭ طاشيديغى إشارتلرى:
أوت أوّلا بو جمله مستأنفهدر. يعنى ماقبليله باغلى دگلدر. إستينافى ايسه، مقدّر بر سؤاله جوابدر: