س - برق، ظلمتلرى طاغيدان ضيادار بر آتشدر. اونلر اونڭ ضياسندن إستفاده ايتمديلر مى؟
ج - بر فائده و بر منفعت گورمهلرى شويله طورسون، برقڭ ضررندن، بلاسندن قورقديلر، دييه قرآنِ كريم بو جمله ايله او مقدّر سؤاله جواب ويرمشدر.
قربيت و ياقينلغى إفاده ايدن (يَكَادُ) كلمهسنڭ بو جملهده دلالت ايتديگى معنا شوندن عبارتدر كه: گوزلرينى خطف و كور ايدهجك أسباب موجود اولديغنه رغمًا، هر ناصلسه بر مانعدن طولايى هنوز كور اولمامشلردر.
قاپديرمق معناسنى إفاده ايدن (يَخْطَفُ) كلمهسنده پك گوزل و لطيف بر بلاغت واردر. شويله كه: أشيانڭ صورتلرينى آلوب گتيرمك ايچون گوزڭ گوندرديگى ضيا أثناىِ راهده أشيايه يتيشمزدن أوّل بردن بره شمشك چاقار، قاپديريجى بر قوش گبى او ضيايى آلير، گوتورور ويا گوزڭ شعاعى أشيانڭ شكللرينى آلوب گتيرركن گيجهنڭ گوزى حكمنده اولان شمشك كمالِ سرعتله هجوم ايدهرك ألندن او شكللرى آلير، گوتورور. صانكه ظلمتى قالديرمقله أشيايى گوسترن شمشك، او درزيلرڭ أشيايى گورمهلرينه راضى اولماديغندن، گوزڭ شعاعندن او شكللرى قاپديرييور.
(عُيُونٌ ) كلمهسنه ترجيحًا ذكر ايديلن (اَبْصَارَهُمْ) عنوانى، قرآنڭ بيان ايتديگى قطعى برهانلرينه قارشى كورلك گوسترن منافقلرڭ بصيرت و قلبلرندهكى كوتو نيّتلرينى، عمللرينى آڭديرمقله تشهير ايتمك ايچوندر. زيرا گوز قلبڭ آيينهسيدر. قلبڭ مضمراتى گوزده گورونور.